Монгол Улсын Ерөнхий сайд Л.Оюун-Эрдэнэ АНУ-ын дэд ерөнхийлөгч Камала Харрисын урилгаар тус улсад албан айлчлал хийж байгаа. Айлчлалын хүрээнд Ерөнхий сайд Л.Оюун-Эрдэнэ АНУ-ын Ерөнхийлөгч Жо Байдентай албан уулзалт хийх хуваарьтай байсан ч уулзалтыг АНУ-ын талаас цуцалсан байна.

Тодруулбал, АНУ-ын Ерөнхийлөгч Жо Байден өнгөрсөн сарын 30-наас эхлэн долоо хоногийн амралт авсан бөгөөд тус улсын хэвлэлүүд “Ерөнхийлөгч нуугдахаар амралтаа авсан” талаар мэдээлжээ.

                         Ерөнхийлөгч Жо Байдены хүү Хантер Байден хууль бусаар галт зэвсэг эзэмшсэн, татвараас зайлсхийсэн хэргээр өнгөрсөн хавар цагдаагийн байгууллагад шалгагджээ. Улмаар Хантер Байден хууль бусаар галт зэвсэг эзэмшиж байснаа хүлээн зөвшөөрч, хариуд нь ял авч, хоригдохгүй байхаар прокуроруудтай тохиролцсон гэнэ. Галт зэвсгийн хэрэг намдаж байхад Хантер Байдены эцгийнхээ нэрийг барьж, их хэмжээний мөнгө босгодог байсан хэрэг дахин сэргэжээ. Тухайлбал, Жо Байденыг АНУ-ын дэд ерөнхийлөгчөөр ажиллаж байхад Хантер Байден эцгийнхээ нэрийг барьж, БНХАУ, Украины компаниудтай гэрээ байгуулж, их хэмжээний мөнгө босгодог байсан хэрэг дахин сэргэсэн талаар Америкийн хэвлэлүүд мэдээлсэн байна. Уг хэргийг Дональд Трампыг АНУ-ын Ерөнхийлөгчөөр ажиллаж байхад шалгаж эхэлсэн байдаг аж. 

АНУ-ын Ерөнхийлөгч Жо Байдены хүүгийн нэр холбогдсон хэргүүд хэвлэлүүдээр дахин сэргэж байгааг ирэх 2024 онд АНУ-ын Ерөнхийлөгчийн сонгуультай холбоотой байж болзошгүй гэж үзэж байгаа юм байна.