Аргентиний хөл бөмбөгийн шигшээ багийн нэрт тоглогч Лионель Месси Америкийн MLS-ийн “Интер Майами” багт нэгдэж, 10 дугаарыг өмсгөлт тоглохоор болсон. Тэгвэл “Leagues Cup”-ын хүрээнд Месси шинэ багийнхаа төлөө хоёр тоглолт хийж, хоёуланд нь ялалт байгуулаад байна. Тухайлбал, Мексикийн “Cruz Azul” багийн эсрэг хийсэн тоглолтод шүүгчийн мэдлийн цагт хожлын гоол оруулж, өнөөдөр Америкийн “Atlanta Uniter” багийн эсрэг хийсэн тоглолтод хоёр гоол оруулж, хоёр гоолын дамжуулалт өгсөн аж. Улмаар “Интер Майами” багийн төлөө тоглосон эхний хоёр тоглолтдоо л гурван гоол, хоёр гоолын дамжуулалт өгсөн сайн үзүүлэлттэй Америкийн лигийн замналаа эхлүүлж байна.

                       Лионель Месси хөл бөмбөгийн замналдаа дэлхийн оны шилдэг хөл бөмбөгчид олгодог Ballon d’Or шагналыг долоон удаа хүртэж, Олон улсын хөл бөмбөгийн холбооноос олгодог шилдэг эрэгтэй хөл бөмбөгчөөр гурван удаа шалгарсан. Мөн тэрбээр дэлхийн аварга, аваргуудын лигийн аваргын цом тэргүүтэй 43 цом хүртсэнээрээ дэлхийн рекордыг эзэмшдэг. Месси хөл бөмбөгийн замналдаа нийт 1030 тоглолт оролцож, 810 гоол, 358 гоолын дамжуулалт өгсөн үзүүлэлттэй байгаа юм.