Америкийн мэргэжлийн хөл бөмбөгийн холбоо буюу MLS-ийн “Интер Майами” баг өнгөрсөн өдөр албан ёсоор нэрт хөл бөмбөгч Лионель Месси багт нь элсэж буйг зарласан байна. Өдгөө 36 настай Лионель Мессиг зарлах үйл ажиллагааг “Интер Майами” багийн цэнгэлдэхэд 20 мянга гаруй үзэгч үзжээ. Үйл ажиллагааны үеэр “Интер Майами” багийн удирдлагууд Мессид 10 дугаарыг нь өмсгөхөөр болсноо зарласан бөгөөд энэ талаар Лионель Месси “Энэ бол Америкийн 10 дугаар. Дэлхийн шилдэг 10 дугаар” хэмээсэн байна.

                       Дэлхийн оны шилдэг хөл бөмбөгчид олгодог Ballon d’Or-ийн долоон удаагийн шагналт, дэлхийн аварга Лионель Месси “Интер Майами” багтай 2025 оныг дуустал гэрээ байгуулсан. Ташрамд дурдахад, Лионель Месси Америкт тоглохоор болсон баяр хүргэж, Super Bowl-ийн долоон удаагийн аварга Том Брэди, NBA-ийн дөрвөн удаагийн аварга Стефен Көрри тэргүүтэй алдартан мэндчилгээ дэвшүүлжээ.