БНСУ-ын төвийн нутгаар хэдэн өдрийн турш хүчтэй аадар бороо орж, гүний гарц, хонгилууд усанд автжээ. Орон нутгийн “MBC” телевизийн мэдээлснээр өнөөдөр ус дүүрсэн хонгилоор найман хүний цогцсыг гаргаж авсан бөгөөд үерийн улмаас амиа алдсан хүний тоо 35-д хүрээд байгаа юм байна. Мөн тус улсын Дотоод хэргийн яам, Аюулгүй байдлын яамнаас мэдээлснээр 7866 хүнийг үерийн бүсээс нүүлгэн шилжүүлээд байгаа бөгөөд 10 хүн сураггүй болсон аж. Холбогдох албанаас сураггүй болсон хүмүүсийн тоог гаргахдаа ус дүүрсэн гарц, хонгилд гацсан хүмүүсийн тоог оруулаагүй гэнэ. Тиймээс Солонгос даяар нийт хэдэн хүн усанд боогдож, эрсдэлтэй бүсэд байгаа нь тодорхойгүй байгаа талаар “Yonhap” агентлаг мэдээлжээ.