Аргентиний хөл бөмбөгийн шигшээ багийн нэрт тоглогч Лионель Месси энэ зун “Парис Сент-Жермен” багийг орхиж, Америкийн MLS-ийн “Интер Майами” багт нэгдэхээр болжээ. Өдгөө 35 настай Лионель Мессид Саудын Арабын “Аль-Хилал” болон түүний тоглож байсан “Барселона” клубээс санал ирсэн ч түүнд FFP буюу Санхүүгийн шударга тоглолтын хязгаарлалт тогтоосноор “Барселона” клубт нэгдэх боломжгүй болсон байна.

                  Лионель Месси “Интер Майами” багт тоглох болсон талаараа “Би Европыг орхихоор шийдсэн. Надад Европын олон багаас санал ирсэн. Гэсэн ч миний очих Европын цор ганц баг нь “Барселона” байсан. Дэлхийн аваргад түрүүлснээсээ болоод “Барса” руу явах боломжоо алдсан ч надад Америкт очиж, өөр хөл бөмбөг тоглож, өөр амьдралаас таашаал авах цаг үлдсэн. Би шийдвэрээ гаргасан” хэмээн мэдэгдсэн аж.

Ташрамд дурдахад, Америкийн лигийн “Интер Майами” багийн эзэн нь Английн хөл бөмбөгийн шигшээ багийн нэрт тоглогч асан Дэвид Бекхэм гэнэ. Өнгөрсөн дөрөвдүгээр сард Дэвид Бекхэм Францад очиж, Лионель Месситэй уулзалт хийсэн талаар олон улсын хэвлэл мэдээлж байсан. Тэгвэл тус уулзалтаар Мессигийн гэрээ, солилцоо яригдсан нь баталгаажиж байгааг аналистууд хэлж байна.