“Sony” компаниас зохион байгуулсан дэлхийн гэрэл зургийн уралдаанд Германы гэрэл зурагчин Борис Елдагсений явуулсан уран бүтээл тэргүүлжээ. Гэсэн ч Борис Елдагсен уралдааны шагналын 5000 ам.долларыг авахаас татгалзаж, “Би энэ гэрэл зургийг дараагүй. Хиймэл оюун ухаанаар зуруулсан” гэсэн байна. Борис Елдагсен хиймэл оюун ухаанд юу дүрсэлж, хийх, өнгө, сүүдрийг нь хэрхэн тааруулахаас эхлэн зааж өгч хийлгэсэн байна. Тэрбээр хиймэл оюун ухаанаар зурсан зургаа зарлахдаа “Би хиймэл оюун ухаанаар бүтээсэн зурагт дэлхийн уралдааны шүүгчид бэлэн байгаа эсэхийг нь шалгахын тулд тэмцээнд орсон юм” гэжээ.

Ташрамд дурдахад, Германы уран бүтээлч Борис Елдагсен нь Майнзын Урлагийн академид дүрслэх урлаг, гэрэл зураг, Прагагийн Дүрслэх урлагийн академид концептуал урлаг, Хайдарабад дахь Сарожини Найдугийн Урлаг, харилцааны сургуульд дүрслэх урлагийн чиглэлээр тус тус сурч байсан аж.