Япон Улсын Ерөнхий сайд агсан Шинзо Абэг оршуулах ёслол болж өнгөрлөө. Оршуулах ёслолд нийт 11.4 сая ам.доллар зарцуулж, төрийн оршуулга болгосныг Япон даяар 10 мянга гаруй хүн эсэргүүцэж, жагсаал зохион байгуулж байсан ч Ерөнхий сайд агсныг оршуулах ёслол саадгүй болов.

Оршуулах ёслол Ниппон Будокан цэнгэлдэхэд болсон бөгөөд талийгаачийн чандрыг Токио дахь гэрээс нь цэнгэлдэхэд хүргэжээ. Шинзо Абэгийн чандрыг түүний гэргий Аки Абэ барьж, цэнгэлдэхэд оруулсан байна. Ерөнхий сайд агсны оршуулах ёслол дөрвөн цаг орчим үргэлжилсэн гэнэ.

                        Ерөнхий сайд агсан Шинзо Абэг оршуулах төрийн ёслолд дэлхийн 218 орны 4300 гаруй зочин, төлөөлөгч оролцжээ. Тухайлбал, АНУ-ын дэд ерөнхийлөгч Камала Харрис, Сингапурын Ерөнхий сайд Ли Хсиен Лун, Австралийн Ерөнхий сайд Энтони Албанес нар оролцсон байна. Мөн Британийн хатан хаан II Элизабетыг оршуулах ёслолыг алгасаад байсан Энэтхэгийн Ерөнхий сайд Нарендра Моди Шинзо Абэгийн оршуулгад оролцож, БНХАУ-ын дарга Ши Жиньпин хүндэтгэх шалтгааны улмаас оролцох боломжгүй болсноо цахимаар мэдэгдсэн гэнэ.

Шинзо Абэ нь 1954 оны есдүгээр сарын 21-нд Япон Улсын Ямагүчи аймгийн Нагато хотод төржээ. Тэрээр Сэйкэй их сургуулийн хууль зүйн факультет, улс төр судлалын тэнхимийг төгссөн улс төр судлалын магистр зэрэгтэй байсан аж. Абэ их сургуулиа төгссөний дараа Японы “Кообэ Сэймоо” компаниас ажлын гараа эхлүүлж, Гадаад хэргийн яамны Төрийн нарийн бичгийн дарга, парламетын гишүүнээр сонгогджээ. Улмаар Японы парламентын гишүүнээс ЗГХЭГ-ын дэд дарга, Либерал намын Ерөнхий нарийн бичгийн дарга, ЗГХЭГ-ын даргын албан тушаал хашиж байгаа Ерөнхий сайдад томилогдсон байдаг. Тэрээр 2022 оны долдугаар сарын 9-нд Нара хотод Либерал намын дэмжигчидтэй уулзалт хийж, үг хэлж байх үедээ буудуулж, амиа алдсан юм.