АНУ-ын сэтгүүлч, найруулагч Брент Рено Украины Ирпин хотод амиа алдсан талаар өчигдөр цагдаагийн байгууллагаас мэдээлжээ. Урьдчилсан байдлаар Брент Реног Оросын цэргүүдийн дайралтад өртөн буудуулж, шархаа дийлэлгүй амиа алдсан болохыг тогтоосон байна. Энэ үйл явдал нь Украинд гаднын сэтгүүлч амиа алдсан анхны тохиолдол болж байгаа юм.

          Сэтгүүлч, найруулагч Брент Рено нь Америкийн нэрт “Нью-Йорк таймз” сонинд ажиллаж, өөрийн ах Крэйгтэй хамтран “HBO”, “Vice News” зэрэг хэвлэлд кино бүтээж байжээ. Мөн тэрээр сэтгүүлчээр ажиллаж байхдаа Ирак, Афганистан, Мексикийн хар тамхины дайн, 2010 оны Хаитигийн газар хөдлөлтийг газар дээрээс нь сурвалжилж байсан аж. Тэрээр амиа алдахаасаа өмнө Украин Улсын Ирпин хотод аж төрж, орон нутгийн “Time” сэтгүүлд ажиллаж байжээ.