-Гал түймэр унтраах 10 анги, 40 гаруй гал сөнөөгч Запорожжийн АЦС-д гарсан галыг унтраахаар ажиллаж байна-

Украин Улсын Ерөнхийлөгч Владимир Зеленский тус улсад байрлах Европын хамгийн том АЦС Запорожжийн атомын станц шатаж байгаа тухай мэдэгдсэн.

Урьдчилсан байдлаар Оросын цэргүүд дулаан хэмжигчээр тоноглосон танкаар үйлдвэрийг бөмбөгдсөн нь Запорожжийн АЦС шатахад хүргэсэн гэж үзэж байгаа юм. Гал гарч байгаа Запорожжийн АЦС-ыг 24/7 цагийн онцгой байдлын горимд шилжүүлээд байна.

          Украины цагаар 05:00 орчимд Запорожжийн АЦС-д гал гарч эхэлсэн бөгөөд одоогийн байдлаар гал түймэр унтраах 10 анги, 40 гаруй гал сөнөөг галыг унтраахаар ажиллаж байгаа аж. Украины албаны төлөөлөгч “Запорожжийн АЦС-д эвдрэл, гэмтэл гараагүй, цацрагийн хэмжээ нэмэгдээгүй, хэвийн байна” гэж мэдээлжээ.

          Запорожжийн АЦС шатаж байгаа тухай мэдэгдэхдээ Украин Улсын Ерөнхийлөгч Владимир Зеленский “Хэрэв Запорожжийн АЦС дэлбэрвэл 1986 оны Чернобылийн дэлбэрэлтээс ч илүү сүйрэл, гамшиг болно” гэж онцолсон. Үүсээд байгаа нөхцөл байдалтай холбоотойгоор олон улсын удирдагчид ОХУ-ын Ерөнхийлөгч Владимир Путинтэй утсаар холбогдож, дайралтаа зогсоохыг хүсэж байгаа гэнэ.

Хамгийн сүүлийн мэдээллээр Запорожжийн АЦС-ыг дэлбэрэхээс сэргийлэхээр АНУ-аас цөмийн ослын эсрэг баг томилоод байна.