Австрали Улсын хоёр дахь том хот болох Мельбурн хотод тогтоосон хатуу хөл хорионы дэглэм дэлхийд хамгийн урт үргэлжилсэн хөл хорио болсон. Мельбурн хотод өнгөрсөн 2020 оны гуравдугаар 30-наас эхлэн хатуу хөл хорионы дэглэм тогтоосон бөгөөд нийт зургаан удаа хатуу хөл хорио тогтоосон.

          Эрх баригчдын зүгээс зургаа дахь удаагийн хатуу хөл хорионы дэглэмийг энэ сарын 26-ныг дуустал тогтоосон. Харин өмнө нь “16-гаас дээш насны иргэдийн вакцинд хамрагдалт 70 хувьд хүрсэн тохиолдолд хатуу хөл хориог сулруулна” хэмээн Мельбурн хотын эрх баригчид мэдэгдэж байжээ. Тэгвэл Австрали Улсын Ерөнхий сайд Скотт Моррисон “Мельбурн хот вакцинжуулалтын зорилтот түвшиндээ хүрч, 16-гаас дээш насны нийт иргэний 80-90 хувь вакцинжуулалтад хамрагдсан” талаар баталгаажуулсан. Үүнтэй холбоотойгоор дэлхийн хамгийн урт, удаан хугацаанд үргэлжилсэн хатуу хөл хорио Мельбурн хотод сулрах болсон талаар олон улсын хэвлэлүүд мэдээлжээ.

Эх сурвалж: Reuters