Ливан Улсын нийслэл Бейрут хотод өнгөрсөн жил боомтод болсон дэлбэрэлтийг мөрдөн шалгаж буй шүүгчийг эсэргүүцсэн шийт шашны Хезболлах, Амаль бүлэглэл үймээн дэгдээж, буудалцаан эхлүүлжээ. Шийт шашны бүлэглэлүүдийн мэдээлснээр Ливан дахь “Христийн шашны бүлэглэлийн мэргэн буудагчид олон хүн цугласан газар руу гал нээж, буудалцааныг эхлүүлсэн” гэсэн байна. Гэвч шийт шашны бүлэглэлүүдийн мэдээллийг албаныхан няцаагаад байгаа юм.

Буудалцааны үеэр нийслэлийн олон барилга сүйдэж, зургаан хүн амиа алдаж, 32 хүн шархадсан мэдээлэл байна. Ливаны Засгийн газраас үймээнийг дарахын тулд нийслэлд цэргийн хүч, хуягт танк оруулж ирсэн. Харин шашны бүлэглүүдэд пуужин харвагчаар зэвсэглэсэн байсан аж.

2020 оны наймдугаар сард Ливан Улсын боомтод дэлбэрэлт гарч, 219 хүний амь үрэгдсэн. Тус дэлбэрэлтийг шалгах, мөрдөн байцаах ажилтай холбоотойгоор Ливанд хурцадмал байдал үүсэж байгаа юм.

Эх сурвалж: BBC