НҮБ-ын Ерөнхий нарийн бичгийн дарга Антонио Гутерриш өчигдөр Швейцарын Женев хотод болсон хандивлагчдын бага хуралд оролцож, Афганистаны асуудлаар хэлэлцсэн. Бага хурлын үеэр Антонио Гутерриш Онцгой байдлын яаралтай тусламжийн төвөөс Исламын Бүгд Найрамдах Афганистан Улсад 20 сая ам.долларын хүмүүнлэгийн тусламж үзүүлэх болсон талаар мэдээлжээ.

НҮБ-ын Ерөнхий нарийн бичгийн дарга Антонио Гутерриш хандивлагчдын бага хуралд ирэх дөрвөн сарын хугацаанд 606 сая ам.доллар цуглуулах үүрэг өгсөн. Түүний хэлснээр Афганистан Улсад хандив оруулж, хүмүүнлэгийн тусламж хүргэхийн тулд Кабул хот дахь Хамид Карзай олон улсын нисэх буудлын үйл ажиллагааг сэргээх нь чухал байгаа юм. Хандивлагчдын бага хуралд НҮБ-ын Ерөнхий нарийн бичгийн дарга Антонио Гутерриш Афганистаны эмэгтэйчүүдэд хандан “Итгэл найдвараа унтраахгүй байхыг хүсэж байна. Тусламж очих болно” хэмээжээ.

Эх сурвалж: TASS