ОХУ-ын Курилын арлуудаас нэгэн эр Япон руу сэлж очин орогнол хүссэн талаар тус улсын хэвлэлүүд мэдээлжээ. Тэгвэл ОХУ-аас Япон руу сэлсэн орос иргэний харьяа Южно-Курилск хотын захиргааны эрх баригчид Урал гаралтай хүн байсан талаар албан мэдээлэл гаргасан. Харин энэ тухай нэрээ нууцалсан эх сурвалж “ОХУ-аас Япон хүртэл сэлсэн эр бол 38 настай Ваас Феникс Нокард байсан” гэж мэдээлжээ.

Ваас Феникс Нокард нь хуурамч бичиг баримт үйлдсэний улмаас Тайланд, Бали зэрэг орнуудаас хөөгдөж, 2011 онд Япон Улсад визний журам зөрчсөн тул түүнийг албадан гаргасан байна. Улмаар Нокард нь Алс Дорнодын бүс нутгийг сэргээх хөтөлбөрийн хүрээнд Курилын Кунашир аралд үнэгүй газар авч, амьдарч байсан талаар ОХУ-ын “Новая газета”  сонинд өгүүлсэн юм.

Курилын арлаас Япон Улс руу 20 километр сэлж, улс төрийн орогнол хүссэн Ваас Феникс Нокардыг ОХУ-ын хуулийн эсрэг үйлдэл хийсэн байж болзошгүй талаар “Риа новости” агентлаг мэдээлжээ. Эх сурвалжийн мэдээлснээр “Нокард Японд очсоныхоо дараа найз руугаа холбогдож, Курилын арал дээр үлдээсэн мотоциклыг нь зарж, мөнгийг нь шилжүүлж өгөхийг хүссэн” байна. Үүнтэй холбоотойгоор Япон Улсын холбогдох байгууллагаас “Зохих арга хэмжээ авна” хэмээжээ.

Эх сурвалж: Moscow Times