Талибан хөдөлгөөнийхөн өнгөрсөн амралтын өдөр Исламын Бүгд Найрамдах Афганистан Улсын нийслэл Кабул хотыг эзэлсэн. Талибууд Кабул хотод нэвтрэхэд тус улсын Ерөнхийлөгч Ашраф Гани төрийн ордноо орхиж, эх орноосоо дүрвэсэн байсан. Тэгвэл төрийн ордноо орхиж, дүрвэснийхээ дараа хэсэг хугацаанд чимээгүй байсан Ашраф Гани өөрийн албан ёсны цахим хуудсаараа дамжуулан мэдэгдэл хийжээ.

 Тэрбээр “Би Арабын Нэгдсэн Эмират Улсад ирсэн. Гэхдээ би тун удахгүй эх орондоо эргэж очих болно. Афганистанд дахин шударга ёсыг тогтоохын тулд үргэлжлүүлэн ажиллаж байна. Эх орондоо очихоос өмнө хийх зөвлөгөөн хүлээж байгаа.

          Би эх орноосоо урваагүй. Надад Кабулаас явахаас өөр сонголт үлдээгүй. Хэрэв би байсан бол Кабулд үймээн үүсэж, олон энгийн иргэн амиа алдах байсан.

          Афганистаны дайн дуусна гэж найдаж байна. Энэ бүтэлгүйтэлд манай зэвсэгт хүчин, улстөрчид буруутай” гэсэн байна.

Мөн Исламын Бүгд Найрамдах Афганистан Улсын Ерөнхийлөгч Ашраф Ганиг “Дөрвөн автомашин дүүрэн бэлэн мөнгө нисэх буудалд авчирч, нисдэг тэргэнд багтахгүй болохоор заримыг нь нисэх буудалд хаяад зугтсан” гэж ОХУ-ын Элчин сайдын яамны хэвлэлийн төлөөлөгч Никита Ищенко мэдэгдээд байгаа юм.

Эх сурвалж: BBC, TASS