Талибан бүлэглэл Афганистан Улсын нийслэл Кабулыг эзэлж, Засгийн эрхийг гартаа авснаас хойш тус улсаас дүрвэх хүсэлтэй хүмүүс ихсэж, Хамид Карзай олон улсын нисэх буудалд эмх замбараагүй байдал үүссэн. Нисэх буудалд гал нээсний улмаас таван хүн нас барсан тухай эх сурвалжууд мэдээлж байсан бол дүрвэх гэсэн хүмүүс онгоцноос зүүгдэж, улмаар онгоц нисэж байхад хоёр хүн унаж, амиа алдсан талаар албаныхан мэдээлсэн билээ.

          Тэгвэл Афганистанаас нисэж, Катарт газардсан АНУ-ын армийн нисэх онгоцны дугуйны бүхээгээс нэг хүний цогцос олдсон байна. Үүнтэй холбоотойгоор Афганистаны нисэх буудалд эмх замбараагүй байдал үүсэж, хүний амь эрсэдсэн болон Катарт газардсан онгоцны дугуйн бүхээгээс цогцос олдсон хэргийг Пентагоноос шалгаж эхэлжээ. Энэ талаар Пентагоны хэвлэлийн төлөөлөгч Энн Стефанек “Амиа алдсан хүмүүсийн ар гэрийнхэнд эмгэнэл илэрхийлье” хэмээн мэдэгдсэн ч яг дээрх төрлийн осолтой холбоотойгоор нийт хэдэн хүний амь эрсэдсэн талаар мэдээлэл өгөөгүй юм.

Эх сурвалж: AFP