Карибын тэнгисийн нутагт орших Хаити Улсад өнгөрсөн бямба гарагт 7.2 магнитудын хүчтэй газар хөдөлж, 1297 хүний амь эрсэдсэн талаар эрх баригчид мэдээлжээ. Газар хөдлөлтийн үеэр сураггүй болсон иргэдийн тоог гаргах боломжгүй байгаа бөгөөд хамгийн сүүлчийн мэдээллээр 5700 орчим хүн бэртэж, гэмтсэн байна. Аврах, эрэн хайх ажиллагаа одоог хүртэл үргэлжилж, нуранги доороос амьд үлдэгчдийг олсоор байгаа юм.

          Энэ талаар Хаити Улсын Лес-Кайс дахь Англикан сүмийн тэргүүн Архидеон Абиаде Лозама “Нью-Йорк таймз” сонинд өгсөн ярилцлагадаа “Газар хөдлөлтийн үеэр гудамж болгонд хүмүүс хашхирч, аврал эрж байлаа” хэмээжээ. Харин газар хөдлөлтийн төв цэг нь Сен-Луис Ду Суд хотоос 12 километрийн зайд байсан тухай АНУ-ын Геологийн албанаас мэдэгдсэн юм.

Эх сурвалж: BBC