Талибан бүлэглэл өчигдөр буюу наймдугаар сарын 11-нд Афганистаны өмнөд нийслэл гэгддэг Кандагар хотыг эзэлж, тус хотын шоронгоос 1000 гаруй хоригдлыг суллажээ.

АНУ-ын Ерөнхийлөгч Жо Байдены танилцуулсан Афганистанаас цэргүүдээ татаж, авах төлөвлөгөө өнгөрсөн тавдугаар сарын 1-нээс эхэлсэн. Харин одоогоор Афганистанд үлдсэн цэргүүд энэ сарын 31-ний дотор тус улсаас гарч дуусах юм.

АНУ, НАТО, Их Британи зэрэг холбоотон улсууд цэргээ татаж авч байгаа болон Талибан, Афганистаны нөхцөл байдалтай холбоотойгоор АНУ-ын Тагнуулын албаны нэрээ нууцалсан эх сурвалж, “Афганистаны Засгийн газар сайндаа л 90 хоног тэснэ. Энэ 90 хоногийн дотор Талибан хөдөлгөөн Афганистаны Засгийн газрыг буулгаж, авна” гэв.

          Саяхан ОХУ-ын Батлан хамгаалахын сайд Сергей Шойгу Талибан бүлэглэл Узбекистан болон Тажикистан Улстай хиллэдэг Афганистаны хилийн зурвасыг эзэлж, хянлатдаа авсан талаар мэдээлсэн. Талибан бүлэглэлийн төлөөлөл ОХУ-д айлчлах үеэрээ хил залгадаг орнууд руу халдахгүй байх амлалт өгсөн. Хэрэв уг амлалтыг зөрчиж, Тажикистан Улс руу довтолбол Батлан хамгаалахын хамтын гэрээний хүрээнд ОХУ хамгаалах ёстой. Харин Узбекистан Улс 2012 онд Батлан хамгаалахын хамтын гэрээний байгууллагын гишүүн байхаа больсон байна.

Эх сурвалж: The Guardian