Дэлгэцийн урлагийн шилдэг бүтээл шалгаруулах “Оскар-2023” кино наадмын шагнал гардуулах ёслол өнгөрсөн даваа гарагт Лос-Анжелесийн Долби театрт болсон. 95 дахь удаагийн “Оскар-2023”-ын шилдэг эрэгтэй гол дүрийн жүжигчнээр үзэгчдийн эчнээ танил Брендан Фрейзер “The Whale” кинонд бүтээсэн Чарлигийн дүрээрээ шалгарсан юм. Брендан Фрейзерийн хувьд “Оскар-2023” түүний нэр дэвшсэн анхны “Оскар” байсан бөгөөд олон жилийн турш арилжааны кинонд дүр бүтээж, замнал нь уналттай хэмээн шүүмжлэлд өртөж байсан Брендан “The Whale” киноны Чарлигийн дүрээрээ эргэн ирэлт хийлээ. Тэгвэл үүнтэй холбоотойгоор шинэхэн “Оскар”-ын шагналт Брендан Фрейзерийн шагнал гардуулах ёслол болохын өмнөхөн өгсөн ярилцлагыг хөрвүүлэн хүргэж байна. Уг ярилцлагыг “Backstage” сэтгүүлийн сэтгүүлч Винни Манкусо авсан бөгөөд ярилцлага өнгөрсөн хоёрдугаар сарын 23-нд хэвлэгдсэн “Backstage” сэтгүүлийн шинэ дугаарт гарчээ.

-“THE WHALE” КИНО НАДАД ЖИНХЭНЭ ХҮЧЭЭ ТУРШИХ БОЛОМЖ ОЛГОСОН-

Энэ бүхэн Лондонгийн “West End Stage” зуны театрын сургуулиас эхэлжээ. Багадаа аавыгаа даган хотоос хотын хооронд нүүдэг байсан Брендан “West End Stage”-ээс жүжигчин болох мөрөөдлөө олов. Жүжигчин болох мөрөөдөл тээсэн тухайгаа ч “Шинэ газарт өөрийгөө шинэчлэж, дахин эхлэхийг хүссэн” хэмээсэн юм. “Oliver” продакшны бүтээлүүд Лондонг гайхшруулж байсан тэр үед Брендан Фрейзер жүрж шиг будсан теннисний бөмбөгөөр дүүрэн түрдэг сагс унаж, “West End Stage”-ийн тайзан дээр гарч байжээ.

                              Брендан Фрейзер “West End Stage”-ийн тайзнаас эхэлсэн жүжигчний карьераа “Би багадаа уншсан үлгэр, түүхээ тэгж бусдад үзүүлэхийг хүссэн. Эхэндээ яаж хийхээ мэдээгүй. Жинхэнэ ажил ч гэж бодоогүй. Гэхдээ надад маш их утга учиртай байсан” гэв. Түүний бодит байдал болон хийсвэр төсөөллийн дундах төгс газрыг эрэлхийлсэн сониуч зан нь олон арван жилийн жүжигчний аялалд гаргажээ.

“The Whale” киноны зохиолч Сэмюэл Хантер, найруулагч Даррен Аронофски хоёр Брендан Фрейзерийг хэт таргалалттай, англи хэлний багш Чарли гэх эрийн дүрд тоглуулахыг сайн шахжээ. Кино зурганд орохын тулд дүрдээ хичээнгүйлэн хувирсан харагдах. Бренданы хэлснээр “West End Stage”-ийн тайзнаас хойш олон жилийн дараа “The Whale” кино л түүнийг жинхэнэ хүч, арга барилаа турших боломж олгосон” гэнэ. Улмаар “The Whale” кино Брендан Брейзерийн анх удаа “Оскар”-ын шилдэг гол дүрийн жүжигчинд өрсөлдсөн кино болсон бөгөөд тэрбээр 300 орчим кг жинтэй эрийн дүрээрээ “SAG Award”-ын шагнал, шүүмжлэгчдийн сонголтын шагналыг хүртээд байгаа юм. “The Whale” кино энэ зэрэг амжилт үзүүлж, түүний бүтээсэн дүр олон хүнд хүрч байгаа нь Брендан Фрейзерийг өмнө нь амьдарч байсан Лос-Анжелес хотод нь 15 жилийн дараа авчирч, зураг авалтаа хийсэнтэй ч холбоотой байж мэднэ. Энэ тухай Брендан “Би Лос-Анжелес хотод, тэр дундаа жилийн яг энэ үед хайртай хэвээрээ. Анх 32 жилийн өмнө энэ хотод ирж байжээ” гэв. Тэрбээр Гадаад хэргийн яамны хөтөлбөр, Техасын Өмнөд Методистын их сургуулиас буцаж байхдаа зориглон нэгэн алхам хийж байсан Лос-Анжелест адал явдал хайн ирсэн нь байв. Тус хотод өнгөрүүлсэн цаг хугацааныхаа талаар “Би ихэвчлэн Вилл Рожерын далайн эргийн цэцэрлэгт хүрээлэнд очиж, чийгтэй элсэн дээр суух дуртай байлаа. Давлагаа ширтэн суухдаа өөрөөсөө “Энэ амьдралдаа зориулж юу хийх гэж байна вэ” хэмээн асуудаг байв” гэсэн юм.

                              Гэсэн ч Брендан Фрейзер амьдралдаа зориуж юу хийх вэ гэсэн асуултдаа хариулт авч чадаагүй бөгөөд тэр цагаас хойш туслах дүрүүдэд тоглож эхлэв. Өсвөр насны хүү байхдаа 1992 онд “Encino Man”, 1997 онд “George of the Jungle” кинонд дүр бүтээж, хариултаа эрсээр л байв. Тэрбээр “Би ажил, мэргэжилдээ утга учиртай хандсан. Гэсэн ч гэнэн хэвээрээ байсан. Надад олон кинонд сайн дүр бүтээсэн юм шиг мэдрэмж төрдөг байлаа. Үнэндээ би шинэ хотод дасан зохицохыг хичээсэн зүгээр л нэг залуу байсан” гэв.

Ярилцлага дундуураа Брендан 1992 онд “School Ties” кинонд бүтээсэн бусдад гадуурхагддаг ахлах сургуулийн сурагчийн дүрээ онцолж байна. Тэр “Би тэр дүрээр хувь жүжигчний хувьд золиос гаргасан” гэсэн юм. Үргэлжлүүлэн “Үр дүнд нь өөрөөрөө байх ёстой гэдэг сургамж авсан” хэмээв.

                              Түүний хэлснээр жүжигчний мэргэжлийг хүсвэл өөр дотроо хэрхэн хүмүүс бий болгохыг мэддэх байх ёстой гэнэ. Брендан “Энэ зүйл хүний тархи, оюун бодлыг өөрчилж, чамайг хэзээ ч төсөөлж байгаагүй нэгэн болгон хувиргаж чадна. Би зүгээр л бусдад өөрийгөө таниулж чадах эсэхээ шалгахыг хүссэн. Хүүхэд байхдаа өөр өөр газар нүүж очдог байснаас эсрэг, өөрийн тав тухаа мэдэрсэнтэй холбоотой” гэлээ.

-НАДАД АРИЛЖААНЫ КИНОНД ТОГЛОСОН ЦАГ ХУГАЦАА МӨРӨӨДЛӨӨСӨӨ УХАРСАН МЭТ САНАГДАЖ БАЙСАН-

Брендан Фрейзер кино урлагийн технологи аналогиос шууд дижитал руу шилжсэн гэж үздэг юм байна. Ингэхдээ тэрбээр 2008 онд үзэгчдийн хүртээл болсон “Journey to the Center of the Earth”, Жеймс Камероны “Avatar” киноноос жишээ аван 3D хөдөлгөөнт камер гэхчлэн дижитал технологи дэлгэцийн урлагийг “аварсан” гэх. Намайг “Тэр үед чи хаана байсан юм бэ” гэхэд Брендан хэсэг дуугаа хураав. Тэрбээр кино урлагт дижитал технологи нэвтэрч эхлэхэд дүрийн хөгжүүлэлт бага шаарддаг “DC”-гийн "Doom Patrol", "The Affair" зэрэг телевизийн цувралд туслах дүр бүтээж, хэд хэдэн арилжааны кинонд тоглоод байсан юм. Энэ тухайгаа “Асуудал нь арилжааны кинонд “жинхэнэ” жүжигчин байдаггүй. Хэзээ нэгэн цагт өөрийн оршихуйг хүмүүст мэдрүүлэхийг хүссэн надад арилжааны кинонд тоглосон цаг хугацаа мөрөөдлөөсөө ухарсан мэт санагдаж байв” гэлээ. Харин аз болоход найруулагч Аронофски түүнтэй ярьж, санал тавьжээ. Энэ үеэр Брендан “Хүн бүрийн миний тухай бодол ижил болсон тэр үед би өөрийгөө дуусжээ л гэж бодсон. Харин Аронофски надад “Надад хүн бүрийн мэддэг, дахин харахыг хүсдэг, өөртөө санаа тавьж, шинэ арга зам хайж байгаа жүжигчин хэрэгтэй байна” гэсэн” хэмээв.

                              “The Whale” кино үзэгчид дунд гэлтгүй шүүмжлэгч, жүжигчдийн дунд ч “тахал” шиг тархсан. Тус кино түүнийг хүссэн оргилд нь авчирсан. “The Whale” киноны нүүр будагч нь Адриен Морот бөгөөд тэрбээр саяхан олны хүртээл болж, шуугиан дэгдээсэн “M3GAN” киноны нүүр будалтыг ч хийжээ. Адриен “The Whale” кинонд зориулж, Бренданыг дүрд нь тохируулахыг тулд хэдэн зуун кг-ын хиймэл эрхтэн өмсгөж, шахаж өгсөн гэнэ. Энэ тухай Брендан “Чарлигийн дүрийн хувиргалт хүн бус робот шиг болж болох байсан. Гэхдээ үгүй. Тэр бол хүн. Бусад кино бүтээгч хэт таргалалттай хүнийг хувиргахдаа хошигнол болгочихдог. Харин Адриен тийм зүйл болгоогүй. Тэр урьд өмнө нь хэний ч хийж байснаас илүүг хийсэн” гэв.

Хэдий кино зураг авалт дуусаад удаж байгаа ч Брендан Чарлигийн дүрдээ үнэнч хэвээр байгаа нь ажиглагдаж байлаа. Ярианы хэмнэл, хувцаслалт нь ч Чарли гэх дүрээс нэг ч их зөрсөнгүй. “The Whale” киног үзсэн дэмжигчдийнхээ сэтгэгдлийн талаар Брендан “Кино үзсэн олон хүнээс сэтгэгдлийг нь сонссон. Тэд миний дүр хэт таргалалттай эр гэдгийг нь мэдээд тоогоогүй. Гэхдээ театрт ирж, кино үзээд тавхан минутын дотор л Чарли ч гэсэн эр хүн болохыг мэднэ” гэсэн юм.

-“WEST END STAGE”-ИЙН ТАЙЗНААС ЭХЛҮҮЛСЭН ЗАМДАА ЭЗЭН БОЛОХ ЦАГ НЬ БОЛСОН-

“The Whale” киноны гол баатар Чарлигийн киноны төгсгөлийн үзэгдэл надад Бренданы амьдралыг санагдуулж байв. Киноны төгсгөлд Чарли шавь нараасаа үнэнч зүйл бичихийг гуйдаг. Харин тэр үед 20-иодхон насандаа жүжигчний замналаа эхлүүлсэн Брендан надад бодогдсон юм. Киноны төгсгөлийн талаар тэрбээр “Нэг хүн надад “Чиний амьдрал тийм ч сонирхолтой биш гэдгээ хүлээн зөвшөөрөх хэрэгтэй” гэж хэлсэн. Үнэндээ би өөртөө сайн яв, өгс гэсээр ирсэн. Гэхдээ 20-21 настайдаа “амьдрал”-аа эхэлсэн хүн үүнээс илүү хэр хол явж чадах юм бэ” гэв.

                              Би Лос-Анжелесийн далайн эрэг дээр суун “Амьдрал сонирхолтой байх болов уу” хэмээн өөрөөсөө асууж байсан 20 настай Бренданаас асуулт асуухыг хүссэн юм. Миний халган байж тавьсан асуултад тэрбээр “Тэр үед би өөрийгөө шагнал авдаг, эсвэл дэлхийн тавцанд гардаг кинонд тоглоно гэж төсөөлж байгаагүй” гэв. Брендан үргэлжлүүлэн “Би тэр үед шинэ хотод очсон юу хийхээ ч сайн мэдэхгүй залуу байсан. Харин одоо ойд төөрсөн нялх хүүхэд шиг байхаа больсон. Гэхдээ өнөөх хотын залуу алга болоогүй. Залуу тэр хотдоо дасан зохицсон” гэлээ.

Ярилцлагын төгсгөлд Брендан Фрейзер “Олон жилийн өмнө “West End Stage”-ийн тайзнаас эхлүүлсэн замдаа эзэн болох цаг нь болсон. Би дахин өөрөөрөө байж, хэний ч асуултад хариул чадахаар байна. Хүмүүс Чарлигийн дүрээс асуухад үнэнээр нь хариулдаг жишиг миний толгойд бий” хэмээснээр бид хоёр ярилцлагаа өндөрлүүлсэн юм.