Тайланд-Солонгосын реппер, дуучин, бүжигчин, К-Поп од Лиза албан ёсны “Инстаграм” хуудастаа 90 сая дагагчтай болж, уг амжилтад хүрсэн анхны Тайланд, К-Попын од болжээ. Өдгөө 25 настай Лиза нь Солонгосын “BLACKPINK” охидын хамтлагийн гишүүн бөгөөд 2021 оны есдүгээр сард “Lalisa” нэртэй бие даасан цомгоо олны хүртээл болгоод байв. Тэгвэл Лизагийн талаарх сонирхолтой таван баримтыг уншигч та бүхэнд хүргэж байна.

1.ЗӨНЧИЙН ХЭЛСНЭЭР НЭРЭЭ СОЛЬЖЭЭ

Лизаг төрөхөд аав, ээжээс нь өгсөн нэр Пранприя байжээ. Гэтэл нэгэн зөнч Лизад “Пранприя нэрээ сольж, Лализа болговол илүү аз жаргал авчирна” гэсэн байна. Лализа нэр нь хөгжил, цэцэглэлтийг хүлээн авагч гэсэн утгатай нэр аж.

2.14 НАСТАЙДАА “YG ENTERTAINMENT”-ЫН АНХНЫ ГАДААД УРАН БҮТЭЭЛЧ БОЛЖЭЭ

Одоог хүртэл “BLACKPINK” хамтлагийн зарим сонсогч Лизаг Тайланд гаралтай гэдгийг сонсоод гайхдаг. Тэгвэл Лиза анх “YG Entertainment”-ын уран бүтээлч болохдоо 14 настай байсан бөгөөд тус студийн анхны гадаад уран бүтээлч болж байжээ. Лиза “YG Entertainment”-д ороод таван жилийн турш бэлтгэл хийхдээ бүх үзүүлэлтдээ “А” үнэлгээ авч байсан гэнэ.

3.ЛИЗА ЗУРГААН МУУРТАЙ

Лиза зургаан муур тэжээдэг бөгөөд чөлөөт цагаа тэжээвэр амьтадтайгаа хамт өнгөрөөх дуртай гэнэ. Тэрбээр Лука, Лео, Лили, Луис, Тайгер, Хантер гэх зургаан мууртай. Мөн Хайр нэртэй шинэ гөлгөн нохойтой болсон аж.

4.БОКСЫН СПОРТООР ХИЧЭЭЛЛЭДЭГ

“Rolling Stone” сэтгүүлийн нэгэн нийтлэлд “BLACKPINK” хамтлагаас бие бялдрын хувьд хамгийн хүчтэй нь Лиза хэмээн онцолж байв. Тэгвэл түүнтэй зэрэгцээ Лизагийн боксоор хичээллэж байгаа дүрс бичлэг цахим сүлжээнд түгж, шуугиан дэгдээгээд байсан юм.

5.ЛИЗА ТРИПАНОФОБИК

Лиза трипанофобик буюу зүү, тариураас айх эмгэгтэй гэнэ. Нэгэн удаа “BLACKPINK” хамтлагийнхаа гишүүн Рөүзтэй хамт тариа хийлгэх гэж байгаад ухаан алдаж унаж байсан аж.