Эцэг, эхээ залхаахгүйн тулд толгой дээрээ хувинтай дуулж, хоолны ширээн төгөлдөр хуурын товчлуурыг наан бэлтгэл хийж, өдрийн 90 центээр дуулдаг байсан Үмеки Миёошиг багад нь харсан хэн  ч, хожим “Оскар”-ын шагнал хүртэнэ гэж төсөөлөөгүй байх даа...

Японы хойд хэсгийн Хоккайдо арал дээр төрж, өссөн жирийн нэгний гайхалтай түүхийг уншигч та бүхэнд “ярьж” өгье.

-ИЧИМХИЙ, ДАРУУ ДҮР “ЗӨВХӨН” ТҮҮНИЙХ-

Японы нэрт дуучин, жүжигчин Үмеки Миёоши 1929 оны тавдугаар сарын 8-нд мэндэлжээ. Хоккайдо аралд бага насаа өнгөрүүлсэн Үмеки Америкийн поп хөгжимд дуртай байсан бөгөөд “Дайн дуусахаар л АНУ-д очно доо” гэж мөрөөддөг байсан гэдэг. Гэсэн ч охины хүсэл тийм ч хялбар биелээгүй. Цаг үе ч хэцүү байлаа. Үмеки эцэг, эхийгээ залхаахгүйн тулд гэртээ толгой дээрээ хувинтай дуулж, хоолны ширээн дээр төгөлдөр хуурын товчлуур нааж, түүн дээрээ бэлтгэл хийдэг байж. Өсвөр насандаа бусад хамтлагтай хамтарч, цэнгээний газар өдрийн 90 центээр дуулдаг байжээ.

Гэсэн хэдий ч эцсээ хүртэл бууж өгөлгүй тэмцсэн Үмекигийн “Америк мөрөөдөл” 1955 онд биеллээ олсон юм. Тэрээр 1955 онд Нью-Йорк руу нүүж очсоноосоо ердөө хоёр жилийн дараагаас Марлон Брандо, Ред Баттонс нартай хамтран “Sayonara” кинонд дүр бүтээсэн байдаг. Кинонд америк онгоцны нисгэгчийн сайхан сэтгэлт, хүлцэнгүй гэргийн дүр бүтээж, олон хүний зүрхийг шимшрүүлсэн жүжиглэлтээрээ “Оскар”-ын шилдэг туслах дүрийн шагнал хүртсэн юм.

Тэрээр саяхныг хүртэл “Оскар”-ын шагнал хүртсэн цор ганц ази жүжигчин хэвээр байлаа.

Үмеки Миёоши “Оскар”-ын шагналаа гардан авахдаа “Яг одоо хэн нэгэн надад туслаасай гэж хүсэж байна. Бүх америкчуудад талархал илэрхийлмээр байна” гээд үзэгчдийн өмнө бөхийн ёсолсон байдаг. Харин америкчууд Холливудын хүндхэн давааг туулсан түүнээс өөрийг нь хүлээгээгүй байжээ.

“Оскар”-ын шагнал хүртсэнээс хойш Үмеки Миёошигийн замнал уруутай, өөдтэй явсаар замаа өндөрлүүлэхээс өөр аргагүй болсон юм. Замналаа орхихоосоо өмнөхөн Бродвейн мюзиклийн "Цэцэгт хүрдний дуу" кинонд дуу оруулсан нь кино үзэгчдийн хүртээл болсноос хойш гурван жилийн дараа “Алтан бөмбөрцөг”-ийн шилдэг кино шагналыг хүртсэн билээ.

Японы нэрт дуучин, жүжигчин Үмеки Миёоши 2007 онд 78 насандаа хорт хавдрын улмаас өөд болсон юм. Түүний хүү Майкл Худ нэгэн ярилцлагадаа “Би ээжээс “Та яагаад англи хэлээр жүжиглэхийг зөвшөөрсөн юм бэ” гэж асуухад ээж “Хэн нэгэн чамд ажил хий гээд мөнгө өгвөл хариуд нь чадах бүхнээ хийдэг байх ёстой” гэсэн” хэмээн дурссан байдаг. Дэлхийн кино урлагийн дээд шагнал гэгддэг “Оскар”-ын шагналыг хүртсэн анхны ази жүжигчин болж, “Тони”-гийн шагнал болон “Алтан бөмбөрцөг”-т нэр дэвшсэн анхны япон эмэгтэй болсон Үмеки Миёошигийн түүх. Тэр хүн төрөлхтний дунд оньсого мэт үлдсэн юм.