УРЛАГТ МАНДСАН Б.НАРАНСОЛОНГО

2026-04-27, 108

“Солонго, Үүл” киног хоёр дахиа үзлээ, өнгөрсөн амралтын өдрөөр. Хоёр өөр зовлонтой, зорилготой ч эрх чөлөө, амьдралынхаа утга учрыг хайсан эрэл нь ижилхэн бүсгүйтэй “хамт байж”, хамтдаа уйлж, дуулж, бүжиглэж үзсэн. Тэр дундаа Жаргалыг тийм хүнд, хөндүүр амьдралаас нь авч зугтан, өөрөө эрсдэлд ороод ч хамаагүй аз жаргал, амар амгаланг богино хугацаанд өгч чадсанд Гэрлэж хамгаас илүү баярлаж байлаа. Зөөлөн, дулаан атлаа харуусал дүүрэн Гэрэлийн дүрийг жүжигчин Г.Нарансолонго чадварлаг бүтээжээ. Түүний тэр харц, царайны хувирал, хамт тоглож байгаа уран бүтээлчтэйгээ харилцах харилцаа үнэхээр үлгэр жишээ юм.

Оюутан ахуй цагаасаа "Х-ТҮЦ" продакшнд ажиллаж, алдарт "Сэргээш"-ээс эхлэн тайз, дэлгэцнээ гарч өөрийн өнгө төрхтэй олон сайхан дүр бүтээсэн түүний "Харьд одсон бүсгүйн заяа", "Мөрөөдлийн хөлөг онгоц", "Миний хөрш чөтгөр" киноны дурлалт бүсгүйн дүрийг онцлохгүй байх аргагүй. Энгийн даруу гоо, зөөлөн дүрүүд түүнийх байдаг.

Мөн сэргэлэн цовоо, аливаа зүйлийн аргыг олдог, ухаанаар шийддэг дүрээр ч "Гурван найз яасан байх нь уу", "Хотын залуус" зэрэг киногоор уулзсан. Бүр түүнээс ч зоригтой, өөрийгөө өмнөх дүрүүдээсээ илүү эвдсэн дүр нь "Солонго үүл", "No Rules-2" киноноос харсан билээ. Тэгэхээр тэрбээр уран бүтээлчийн хувьд аль ч дүрийг торохгүй гаргаж, мэргэжлийн үзүүлж чадах чадвар, туршлага дүүрэн байхаас гадна адтай, авхаалжтай.

"Эмоци" продакшны үүсгэн байгуулагчдын нэг тэрбээр дүү нартаа үлгэрлэж, харилцан суралцаж, шинэ бүхэнд өөрийгөө сорьсоор байгааг ч үзэгчид андахгүй. Жүжигчин Д.Түвшинтөр, О.Тэмүүжин нартай хамт продакшнаа үүсгэн байгуулж, өдгөө олон сайхан бүтээлээр өнгөлөн яваа.

Тэдгээрээс онцолбол тэрбээр "Нэгэн зуны цэцэг" жүжгийн Оюутын дүрд чадварлаг тоглосон. Үргэлж зөөлөн дөлгөөн түүний дүрээс арай өөр араншин характерыг үзүүлсэн. Үүгээрээ ч үзэгчдэд шинэлэг, содон байв. Түүний мөн нэг онцлох дүр бол "Аянгын бороо" жүжгийн дүр нь. Түүнийг урлагт тодотгож, илүү өрж, байгуулж, суулгаж өгсөн бүтээл нь гэхэд хилсдэхгүй байх.

Тэрбээр "Оюутан байхад хэн нэгний дэмжлэг, хэн нэгний тус маш сайхан санагддаг шүү дээ. Нэг жишээ дурдахад, би "Сэргээш 1"-ийн “Төрсөн өдөр” номер дээр голлож тоглодог шүү дээ. Тэгэхэд би дөнгөж оюутны ширээнээс холдсон байсан юм. Манай хамтлагийн ах, эгч нар намайг ямар хүүхэд вэ гэдгийг мэдэхгүй. Авьяастай ч юм уу, үгүй ч юм уу, цаашдаа жүжигчнээр ажиллах ч юм уу ажиллахгүй ч юм уу. Гэтэл тийм гоё голлох дүрийг надад итгэж өгч, надад итгэл хүлээлгэж байсан. Түүнээс гадна Хятадын алдарт зохиолч Цао Юй-ийн “Аянгын бороо” гэх тэр том зохиолын бас нэг чухал дүр болох Сы Фань гэдэг охины дүрийг надад өгч байсан. Маш их итгэл хүлээлгэж буй нь тэр шүү дээ. Ингэж их итгэл хүлээлгэсэн учир аливаа зүйлийг хийхэд маш гоё урам зориг өгдөг байхгүй юу. Тийм болохоор яг түүнтэй адил бид ч бас "Эмоци"-ийнхоо дүү нарт мөн л адил боломж олгохыг зорьдог. Аль болох нээлттэй, боломжийг нь олгож ажилладаг" гэж ярьсан байдаг. Тийм ч болохоор тэр залуу дүү нартаа итгэл, урам өгч, түүгээрээ жигүүр ургуулан урагшлуулдаг байх аа.

Ийм л зан чанар болоод авьяас билгээрээ өөрт оногдсон олон сайхан дүрийг урлагт мэтгэн хатгаж, Нарансолонгын гэсэн өнгө төрхийг үзэгчдэд хүргэж, үзэгчдийг дүрээрээ хүлээлгэх болсон.

Цааш түүний уран бүтээлээс онцолбол, “ОI” энтертайнментийн “NO RULES”. Хууль дүрэм нь хөрөнгө мөнгөтэйд нь үйлчилж, гэмт хэрэгтээ идэгдсэн тухай өгүүлэх эл кинонд эгчийн дүрд тоглосон. Тэр амьдрал дээр ч киноны уран бүтээлчдээс нас илүү, туршлага давуу.

Уран бүтээлчийнхээ хувьд аль болох эерэг байж, учрыг нь олж, чадварлагаар дүрээ гаргахыг хичээдэг гэх түүний урлагт үлгэр дууриалал авч, өнөөдрийг хүртэл хөглөсөн уран бүтээлч бол МУГЖ И.Одончимэг. Одноо эгчээсээ уран бүтээлч хүн ямар байх ёстойг харж, олон жил нэг продакшнд хажуугаас нь суралцсан нь түүнд мөн их нөлөөлжээ. И.Одончимэг жүжигчний залуусыг дагуулж, зааж, сургаж, хамтдаа хөгждөг шиг нь өдгөө "Эмоци" продакшнд Б.Нарансолонго жүжигчин яг нэг тийм байр суурьнаас дүү нартайгаа харилцаж, тэдэнтэй найз нь юм шиг дотно, ойр байж, түшиж тулж, өөрөө ч суралцаж яваа. Өнөө л итгэл, урамаа өгөөд шүү дээ.

Чамбай, нямбай, авсан дүр бүрээ өөрийн өнгөөр чадварлаг бүтээж, үзэгчдэд хүргэж чаддаг нар шиг, солонго шиг цацарсан, гэрэлтсэн уран бүтээлч түүнд амжилт хүсье. Олон ч сайхан дүрийг үзэгчид түүнээс хүлээдэг биз ээ.

УРЛАГТ МАНДСАН Б.НАРАНСОЛОНГО

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.