Дуучин Чинзоригийн Цэлмүүн  “UBS” телевизийн  “Universe best songs” уралдаанаас төрөн гарсан дуучин билээ Тэрбээр  анхны Universe best songs” уралдааны   ялагч болж байлаа. Дуучин Ч.Цэлмүүнтэй ярилцлаа.

-”Universe best songs” уралдааны ялагч болж байлаа. Тухайн үед олон улсын “MIU” сургуулийн оюутан байсан билүү?
       -Тийм ээ,  “MIU” сургуулийн био технологийн хоёрдугаар дамжааны оюутан байсан. Тэр үед “UBS” телевизийн  “Universe best songs” уралдаанд оролцож түрүүлж байлаа.

-Дунд сургуульд байх даа дуулдаг хүүхэд байв уу?

     - Би дунд сургуульд байх даа зураг зурдаг байсан. Нэлээн хэдэн зургийн үзэсгэлэн гаргасан. Сургуулийнхаа сагсан бөмбөгийн багийн ахлагч байлаа.  Мөн дуулж хөгжимдөж, монгол бүжиг, R&B break dance хийдэг байв.  Гурван настай байх даа “Ямаха” төгөлдөр хуурын сургуульд нэг хэсэг явж байлаа. Төгөлдөр хуур, бөмбөр тоглож сурсан. Тэр үе л урлагт ойртох, ойр байх эхлэл болсон.  Дараа нь “Эрэл” дунд сургуульд ороод хоор дууны хоёрдугаар хоолой хийдэг болов. Харин одоо төгөлдөр хуур, бөмбөр тоглохоо больсон. Морин хуур хөгжимийг нэг хэсэг хугацаанд сонирхон тоглож байлаа.

-Танай удамд урлагийн хүн байдаг уу?
     -Аав, ээж хоёр  маань эмч мэргэжилтэй хүмүүс. Аав залуудаа дуулдаг, гитар, бөмбөр, төгөлдөр хуур тоглодог байсан гэдэг. Аав болон Б.Наранзун ах, бас нэг ах, нэрийг нь санадаггүй. Тэр гурав хамтлагтай байсан юм. “Мишээл” гэдэг дууг нь тухайн үеийн хүмүүс их сонсдог байсан.

-“UBS” телевизийн  “Universe best songs”  уралдаанд ямар зорилготой оролцов?
      -Тийм уралдаан явагдахыг мэдээгүй байсан л даа. Би Солонгост дадлага хийж байгаад ирсэн чинь уралдааны бүртгэлийн сүүлчийн өдөртэй таарсан. Найз Энхүүш маань “Оролцоод үз” гэж ятгаад бүртгүүлсэн. Ямар нэгэн зорилго тавиагүй оролцсон. Бүртгүүлсний маргааш оролцогчдыг студид цуглуулахад 400 гаруй хүн ирсэн. Тэр олон хүнийг хараад л сүрдэж, айсан шүү. Шат ахих тусам зориг орж өөртөө илүү итгэх, итгэл төрсөн.

-Урлагийн чиглэлээр мэргэжил эзэмших бодол байгаагүй юу?
     -Урлагаар тууштай явж, хүмүүсийн сэтгэлд хүрсэн, ямар ч цаг үед мөнх байх уран бүтээл хийхийг хичээнэ. Дуулах, хөгжим тоглох бол миний хобби, урлагийн мэргэжил эзэмшихгүйгээр сонирхлынхоо дагуу өөрийгөө хөгжүүлэх боломжтой гэж бодоод л өөр мэргэжил сонгосон. Надад бага боловч дуулах авьяас байгаа бол Монголынхоо урлагт тодорхой хэмжээний хувь нэмрээ оруулах юмсан гэсэн мөрөөдөл бол байсан. Тэр мөрөөдөлдөө хүрэх гараагаа  “Universe best songs” уралдаанаас эхэлсэндээ баяртай байдаг. Амьдралынхаа өмнө дуулах гэсэн ганцхан зорилго тавиад явбал миний хувьд багадна. Хүмүүсийн сэтгэлд хүрсэн, мартагдашгүй сайхан дуу дуулж чадахгүй бол хэдэн жилийн дараа мартагдаад л өнгөрнө шүү дээ.

-"Universe best songs" уралдааны сүүлчийн шатанд шалгарч үлдэхэд тань үзэгчид өөрийг тань түрүүлэх байх гэж ярилцаж байсан, Түүнийг сонссон уу?
        -Тийм үү. Манай шилдэг 25 өөлхийн аргагүй жигд, авьяаслаг залуус байсан л даа. Тэр үед намайг дэмжиж байсан үзэгчдэдээ их баярлалаа. Шагнал гардуулах үед намайг уйлсангүй, сэтгэл нь хөдөлж хөөрч, баярласангүй гэсэн яриа гарч нэлээдгүй шуугиан дэгдээсэн. Яг тэр мөчид үнэндээ би түрүүлсэн гэдэгтээ итгээгүй юм. Яагаад гэхээр эхний өдрийн тоглолт дээр санасан хэмжээндээ дуулсан. Харин хоёр дахь өдөр хөгжимчин буруу нотноос "ля"-гаас эхлэх байсныг"фа"-гаас эхлээд би өнгө алдаж дуулсан юм.

       Тэгээд л миний дуу тэр чигтээ өөр болоод явчихсан. Тайзны ард ороод өөрийн эрхгүй асгартлаа уйлсан. “За би ч шалгарч чадахгүй юм байна” гэж өөрийгөө тайвшруулсан. Тэрнээс болоод сэтгэлээр унасан байлаа. Шагнал гардуулахын өмнө хөтлөгч үзэгчдээс “Та нар хэн түрүүлнэ гэж бодож байна" гэж асуусан. Үзэгчид бүгд Цэлмүүн гэж хашхирахад бас л итгээгүй. Шагнал авсан хэрнээ нэг л итгэж чадахгүй байсан шүү, Тэмцээн дууссан гэхээр нэг л сонин санагдсан. Баяртай, бас хөнгөн гунигтай ч юм шиг. Яагаад гэхээр бид өдөр бүхэн уулзаж хамт байгаад хоорондоо их дассан байсан. Одоо ч тэднийгээ үргэлжилж санаж явдаг шүү.

-Тэр үед студи, продакшнаас хамтран ажиллах санал тавьж байсан уу?
       -Хүмүүс надаас олон зүйлийг хүсч, хүлээж байсан байх. Тэдний сэтгэлд хүрсэн чанартай, өвөрмөц дуу гаргахыг хүсдэг байв. Харин ямар нэг студи, продакшны нөмөр нөөлөг дор явахыг хүсээгүй. Би ямар нэгэн зүйлд баригдахгүйгээр эрх чөлөөтэйгөөр уран бүтээл хиймээр санагдсан. Ер нь бодлоготой хандаж, сэтгэлийн хөөрлөөр шийдвэр гаргахгүй байхыг хичээсэн.  Дуучин Т.Ариунаа эгч шиг хэнд ч захирагдахгүй хүссэн уран бүтээлээ хиймээр байсан л даа.

-"Universe best songs" уралдаанд ихэвчлэн ямар хэлээр дуулсан бэ?
     -Бүх шатанд англи хэлээр дуулсан. Миний бодлоор англи хэлээр дуулахад дууны утга санаа, аялгуу хоёр их гоё таарч нийлдэг юм шиг санагддаг. Надад хамгийн ойр нь англи хэл байсан. Манай аав, ээж, дүү бид хоёрыг бага байхаас англи хэлээр гэртээ байнга яриулж өсгөсөн юм. Монгол хэлнийхээ хэмжээнд англи хэлийг эзэмшсэн. Тийм учраас л англи хэл дээр дуу сонгосон. Эхний шатанд Сeline Dion. хоёрдугаар шатанд Сhristina Aguilerа, гуравдугаар шатанд Аlicia Кеуs, дөрөвдүгээр шатанд ахиад Сhristina Аguiler, гала тоглолтод "Америкын шүтээн"-ий ялагч Кelly Clarksonы дууг дуулсан.

-"Гала" тоглолтод шалгарч үлдсэн 24-ийн хэнтэй нь илүү ойр дотно байв?
    -Бүгдтэй нь дотно харилцаатай байсан даа. Илүү ойр дотно гэвэл  Хулан, Эрдэнэтүлхүүр нар байлаа.  Хулан маань тэр болгонд түгээмэл байдаггүй өвөрмөц хоолойтой. Хулангийн ганц хоолойны өнгө, дуулах чадвар ч биш. Түүний хувь хүний төлөвшил бусад оролцогчдоос эрс ялгарч байсан нь таалагдсан учраас дотно найзууд болж байлаа. Эрэгтэйчүүдээс Тэмүүжин ах их дажгүй санагдаж байлаа. Тэмүүжин ах ноён нуруутай, намбалаг санагдсан. Хүчтэй өрсөлдөгч нарын нэг нь Тэмүүжин ах байсан л даа. Гала концерт дээр маш нүсэр гоё тоглолт хийсэн. Би Тэмүүжин ахыг дэмжиж байсан болохоор түрүүлэх байх гэж бодож байсан юм.

-"Universe best songs" уралдааны явцад шантрах, няцах үе гарч байсан уу?
        -Тийм үе байсан. Тэмцээний хугацаа их урт байсан шүү. Тэмцээнээс гарна гээд “UBS”-ээс уйлаад гарч явж байсан ч удаа бий. Буруугаа ойлгоод эхэлсэн ажлаа дуусгах нь зөв гээд буцаж очиж байлаа.

-Тэр тэмцээн өөрийн чинь амьдралд ямар өөрчлөлтийг гаргасан бэ?
     -Өөрийн хүчинд итгэх итгэлийг тэр тэмцээнээс олж авсан. Шинэ боломж, бололцоог амьдралд минь нээн өгсөн шүү. Өөр үүд хаалга нээгдсэн гэж хэлж болно. Өмнө нь би тайзан дээр гараад хөгжимгүй, ганцхан микрофонтой дуулж үзэх юмсан. Миний хоолойны чадал ямар хэмжээнд байгаа бол. Хүмүүсийн зүрх сэтгэлд хүртэл дуулж үзэхсэн гэж мөрөөддөг байсан. Одоо тэр мөрөөдөлдөө хүрсэндээ баяртай байдаг.

-Өөрийнхөө дуулах авьяасыг хэзээнээс илүү ихээр мэдэрсэн бэ?
     -Багаасаа дуулж эхэлсэн. Дууны уралдаанд орж байгаагүй ч гадаад, дотоодын олон концертод оролцож байлаа. Хүмүүс чамд авьяас, хоолой байна. Дуучин болно шүү гэж хэлдэг байсан. Хааяа өөрийгөө дуучин болж чадна шүү гэж сэтгэлээ зоригжуулахаас хэтэрдэггүй байв. Тэрнээс биш чадалтай хоолой надад байгаа гэж хэзээ ч бардаж яваагүй. Дуучин болох боломж надад байсан. Дуучин болох гэж "В" продакшнд хүртэл орж байлаа. Түүнээс гараад "Solо" студид хэсэг явсан. Дуучин болох цаг нь болоогүй байсан байлгүй дээ.

-"В" продакшнд хэр удсан бэ. Тийш ээ орох саналыг хэн тавьсан бэ?
     -Нэг их удаагүй ээ. "В" продакшнд орох саналыг дуучин Эгшиглэн надад тавьсан юм. Хамтарч ажиллах гэрээнд гарын үсэг зурахын өмнө гарсан. Хүмүүс харьцааны соёлтой, найрсаг дотно харьцаатай хамт олонтой ажиллахыг хүсдэг. Тэгээд ч дуучин Д.Болд ах миний нэрийг өөрчилнө гэсэн юм. Харин аав түүнийг нь зөвшөөрөөгүй.

-Өөрийгөө ямар зан чанартай гэж боддог вэ?
     -Их романтик хүн байх. Миний хувьд аливааг мэдэрч, урсгалыг дагах биш, сөрж явахыг боддог. Зарчим ч байж, аль болох өөрийгөө дарж, даруу байхыг хичээдэг.

-Өөрийгөө дарж даруу байх нь авьяас чадвар, нөөц боломжоо хаах юм биш үү?
       -Мэдээж би өөрийгөө тодорхой хэмжээнд үнэлдэг. Өөртөө их хайртай. Гэхдээ бусдыг дорд үзэж өөрийгөө дөвийлгөх, гайхуулах шаардлага надад байхгүй, Авьяас надад үнэхээр байгаа бол гайхуулах шаардлагагүйгээр гараад ирэх байх. "Эзэн хичээвэл, заяа хичээнэ гэсэн үг" байдаг. Би явах ёстой замаараа явж, чадах юм аа хийх нь зөв байх. Магадгүй "Universe best songs" уралдаанд ялагч болоогүй бол би урьдын хэвийн амьдралдаа дассан, нөгөө л нэг хуучин Цэлмүүн байх байсан. "UВS"-ийн тэр уралдаан намайг илүү хурцалж өнгөлж өгсөн.

-Загвар өмсдөг, миссийн тэмцээнд оролцож байсан гэж дуулсан юм байна тэр үнэн үү?
     -Загвар өмсдөггүй ээ. "Оюутны мисс 2008" тэмцээнд орж түрүүлж байсан. Манай сургуулийн дээд курсийн эгч ороод үз гэж санал болгоод орж үзсэн юм, Тэр тэмцээнд түрүүлсэн болохоор дэлхийн оюутны миссийн тэмцээнд оролцох байсан. Хичээл, шалгалт, шүүлэг гээд явж чадаагүй.

-Ер нь тэмцээн, уралдаанд од, азтай юм биш үү. Эсвэл өөрт чинь их нуугдмал авьяас чадвар байна уу?
      -Өөрийгөө нээх, авьяас чадвараа сорих гэж л тэмцээн, уралдаанд ордог байлаа. "Universe best songs"-ийн шүүгч нар чамд материал байна гэдэг. Тэр их чухал үг. Үнэхээр надад нөөц байгаа бол түүндээ хүрч хөдөлмөрлөх нь чухал байх л даа.