Эргэлт.мн мэдээллийн сайт “Тэд бидний тухай” буландаа олон улсын хэвлэл мэдээллийн сайт, агентлагуудад Монгол Улсын тухай бичсэн нийтлэлүүдийг хөрвүүлэн хүргэдэг билээ. Тэгвэл энэ удаагийн “Тэд бидний тухай” буландаа ОХУ-ын Гадаад хэргийн сайд Сергей Лавров Монгол Улсад айлчилсан талаар гаднын хэвлэлүүдэд гарсан мэдээллүүдийг тоймлож, хөрвүүлэн хүргэж байна.

DIPLOMATIC: С.Лавров Монголоос тусламж “гуйж” айлчиллаа

Барууны орнуудаас ОХУ-ын дипломат байдлыг тусгаарласантай холбоотойгоор тус улсын Гадаад хэргийн сайд Сергей Лавров дэмжлэг авахаар Монгол Улс руу айлчилж, төрийн дээд албан тушаалтнуудтай уулзаж, хэлэлцээ хийжээ.

Монгол Улсын бол ОХУ, БНХАУ-ын дунд оршдог далайд гарцгүй орон. Сүүлийн жилүүдэд Москва, Бээжинтэй харилцах харилцаа хурцадсантай холбоотойгоор АНУ-тай нягт харилцаа тогтоохоор эрмэлзэж яваа улс. Харин энэ удаад ОХУ-ын Гадаад хэргийн сайд Сергей Лавров Монгол руу айлчилж, удирдлагуудтай уулзсан ч, Украины асуудлаар мэдэгдэл хийгээгүй нь Орос-Монголын харилцаа хүчтэй байгааг илтгэж байна.

CENTRAL ASIA MEDIA: Монголчууд “ОХУ-ын цэргийн тусгай ажиллагаанд оролцоно” гэж мэдэгдсэн ч, дайны асуудалд төвийг сахижээ

ОХУ-ын Гадаад хэргийн сайд Сергей Лавровыг Монголын талаас тус улсын ЗГХЭГ-ын дарга Ц.Нямдоржийн хүү Гадаад харилцааны Төрийн нарийн бичгийн дарга Н.Анхбаяр угтаж авсан байна. Албан ёсны айлчлал эхэлснээр ОХУ-ын Гадаад хэргийн сайд Сергей Лавров Монголын Гадаад харилцааны сайд Б.Батцэцэгтэй хэлэлцээ хийж, тус улсын УИХ-ын дарга Г.Занданшатар, Ерөнхийлөгч У.Хүрэлсүхэд бараалхсан талаар орон нутгийн хэвлэл мэдээлжээ.

Хоёр орны Гадаад явдлын сайд нар хэлэлцээ эдийн засаг, зам тээвэр, эрчим хүч, хүмүүнлэгийн салбарыг онцлов. Орос-Монголын харилцааг өргөжүүлж, ОХУ-аас ч Украинд явуулж байгаа “цэргийн тусгай ажиллагаа”-ныхаа явцын талаар Монголын хамтрагчдадаа “илэн далангүй” мэдээлж байгаа гэнэ.

                      Өмнө нь Улаанбаатараас “ОХУ-ын цэргийн тусгай ажиллагаанд оролцоно” гэж мэдэгдэж байсан. Гэсэн ч өнгөрсөн гуравдугаар, дөрөвдүгээр сард болсон НҮБ-ын Ерөнхий Ассамблейн хуралд Украины асуудлаар төвийг сахиж, ОХУ-ын эсрэг хориг арга хэмжээний санал асуулгад хоёр ч удаа түдгэлзсэн нь хачирхалтай.

POSTIMEES: Сергей Лавров Монголын Ерөнхийлөгчид бэлэг болгон барьсан хас хээтэй самоварын жинхэнэ утга юу вэ

ОХУ-ын Гадаад хэргийн яамны төлөөлөгч Мария Захарова өөрийн албан ёсны “Telegram” хуудастаа “С.Лавров Монголд. Самоварын доод талыг сайн хараарай” гэсэн утгатай гэрэл зураг нийтэлжээ. Олон жилийн өмнө суртал ухуулгад ашигладаг байсан эртний бэлгэдэл бүхий самоварыг Монголын удирдагчид өргөн барьсан нь “Telegram”-аар “дүүрэн” асуулт болсон аж.

Цахим сүлжээнд өргөн барьсан самовар дээрх хас тэмдгийг онцолж, “Славян тэмдэг. Энэтхэг-Европын эрт үеийн язгууртнуудыг слав гэдэг байсан” гэх зэргээр таамаг дэвшүүлжээ. Тэнд ч “Telegram” хэрэглэгчид “Монгол бол неонацизмын өлгий. Монголыг нацизмаас ангижруулах цаг нь болжээ” гэсэн байр сууриа илэрхийлсэн байна.

Тэгвэл цахим сүлжээнд дээрх зургийн нийтэлж, сэдэл өгсөн ОХУ-ын Гадаад хэргийн яамны төлөөлөгч Мария Захароваг хэт даврагч нацистуудын бэлгэдлийг харуулсан хэргээр буюу ОХУ-ын Захиргааны зөрчлийн тухай хуулиар долоон жилээр хорих ял ногдуулахыг хүссэн хүмүүсийн давлагаа эхэлжээ.

Харин ОХУ-ын Гадаад хэргийн яамны албан мэдэгдэлд “Айлчлал Орос-Монголын уламжлалт харилцаа илүү халуун дулаан итгэлцсэн уур амьсгалд болж, хамтын ажиллагаагаа эрчимтэй хөгжүүлэх, зохицуулалтыг гүнзгийрүүлэхэд анхаарч, хэлэлцээ хийсэн” гэсэн юм.

TRT Avaz: ОХУ, Монголын Гадаад хэргийн сайд нар НҮБ-ын зарчмуудыг баримтална гэв

ОХУ-ын Гадаад хэргийн сайд Сергей Лавров Монголын Гадаад харилцааны сайд Б.Батцэцэгтэй хэлэлцээ хийснийхээ дараа хамтарсан мэдэгдэл хийсэн.

Сергей Лавровын хэлснээр Орос, Монголын худалдаа сүүлийн үед эрчимтэй өсөх болжээ. Хоёр орны худалдааны салбар өнгөрсөн онд 30 гаруй хувиар өссөн бол, энэ оны эхний хагаст 40 гаруй хувиар өссөн аж. Харин Монгол Улсын Гадаад харилцааны сайд Б.Батцэцэг “ОХУ-тай худалдааны чөлөөт бүс байгуулахад хөрөнгө оруулж, гаалийн татварыг бууруулах ёстой” гэж мэдэгдэв.

                      Хамтарсан мэдэгдэлд ОХУ, Монгол хоёул НҮБ-ын дүрэм, зарчмуудыг баримтлахаа мэдээлсэн. Тэгэхдээ “Ялангуяа улс орнуудын бүрэн эрхт байдал, тэгш эрх зэрэг дотоод хэрэгт хөндлөнгөөс оролцохгүй байх зарчмыг баримтална” гэсэн юм.