“Fitch Ratings” компаниас Монгол Улсын урт хугацааны гадаад валютын зээлжих зэрэглэлийг “B” хэвээр үлдээж, эдийн засгийн төлөвийг тогтвортой гэж үнэлжээ. Гэсэн ч ирэх жилүүдэд эдийн засгийн өсөлт буурч, ДНБ өснө гэжээ.

               Эргэлт.мн мэдээллийн сайт “Тэд бидний тухай” буландаа олон улсын хэвлэл мэдээллийн сайт, агентлагуудад Монгол Улсын тухай бичсэн нийтлэлүүдийг хөрвүүлэн хүргэдэг билээ. Тэгвэл энэ удаагийн “Тэд бидний тухай” буландаа олон улсын зээлжих зэрэглэлийг тогтоодог “Fitch Ratings” компаниас Монгол Улсын зээлжих зэрэглэлийн тогтоосон болон бусад холбогдох мэдээллийг хөрвүүлэн хүргэж байна.

-“УЛСТӨРИЙН ТОГТВОРГҮЙ БАЙДАЛ НЬ МОНГОЛ УЛСЫН ЗЭЭЛЖИХ ЗЭРЭГЛЭЛИЙГ АХИУЛАХАД ХҮНДРЭЛ БОЛЖ БАЙНА” ГЭВ-

Олон улсын зээлжих зэрэглэл тогтоодог “Fitch Ratings” компани саяхан гаргасан тайландаа Монгол Улсын урт хугацааны гадаад валютын зээлжих зэрэглэлийг “B” хэвээр үлдээж, эдийн засгийн төлөвийг тогтвортой гэж үнэлжээ. Монголыг “B” зэрэглэлд хамт жагссан бусад оронтой харьцуулахад нэг хүнд ногдох ДНБ-ий орлого харьцангуй өндөр, эдийн засгийн дунд хугацааны өсөлтийн төлөв хэвийн байсан аж. Гэсэн ч Монгол Улс гадаад санхүүжилтээс “хараат”, эдийн засгийн суурь нь үндсэндээ БНХАУ руу экспотолж байгаа бараа, бүтээгдэхүүнд тулгуурласан, улстөрийн тогтворгүй байдал зэрэг хүчин зүйл Монголын зээлжих зэрэглэлийг ахиулахад хүндрэл болж байгааг онцолсон байна.

Дэлхийн эдийн засгийн төлөв.

               Цар тахлын эсрэг вакцинжуулалтын түвшин сайн байгаа, олон улсын зах зээлд түүхий эдийн үнэ өндөр байгаагаас үл харгалзан Монголын эдийн засгийн өсөлт энэ онд өнгөрсөн оныхоос 0.2 хувиар буурч, 1.2 хувьтай гарах талаар “Fitch Ratings” таамаг дэвшүүлжээ.

-ОХУ-УКРАИНЫ ДАЙНЫ “САЛХИ” НАМЖИЖ, БНХАУ РУУ ГАРАХ ЭКСПОРТ ӨНДӨР БАЙВАЛ ИРЭХ ЖИЛҮҮДЭД МОНГОЛ УЛСЫН ДНБ ӨСНӨ-

Монголын хамгийн том худалдааны түнш болох БНХАУ “ковид тэглэх” бодлогынхоо хүрээнд хилээ нээхгүй байгаа нь тус улсын нүүрсний экспорт болон бусад бүтээгдэхүүний худалдаа тасалдахад нөлөөлжээ. Хэрэв Зүүн Европт өрнөж байгаа ОХУ-Украины дайны “салхи” намжиж, БНХАУ хилээ нээж, экспортын түүхий эдийн эрэлт өндөр байвал Монголын ДНБ ирэх 2023 онд 6.3 хувиар, 2024 онд 6.8 хувиар өсөх төлөвтэй байгаа юм.

Дэлхийн банкнаас мэдээлсэн Монгол Улсын эдийн засгийн төлөв.

               Харин Оюутолгой ордын далд уурхай ашиглалтад орж, хил дамнасан дэд бүтцийн холболт сайжирвал эдийн засгийн хувьд Монгол Улс их хэмжээний байгалийн баялгийн өгөөж хүртэх боломжтой болох гэнэ.

"ОХУ, БНХАУ РУУ ТҮЛШ ТЭЭВЭРЛЭХ ШИНЭ ЗАМ МОНГОЛ УЛСЫГ ГАДНЫН ХОРИГ АРГА ХЭМЖЭЭ ДАРАМТАД ӨРТҮҮЛЭХГҮЙ"

Далайд гарцгүй Монгол Улсад эдийн засгийн хувьд хөрш орнуудтайгаа стратегийн холболт, худалдааны боомтыг зайлшгүй шаардлагатай байсан. Тэгвэл тус улс энэ ондоо багтааж, түүхий эдийн зах зээлд асар их нөлөө үзүүлж болзошгүй ОХУ, БНХАУ руу нүүрс, металл нийлүүлэхэд голчлон ашиглан авто замыг барьж дуусгахаар төлөвлөжээ. Уг авто зам нь хоёр орны эрчим хүчний аюулгүй байдлыг хангахаас гадна, Монгол Улсыг гаднын хориг арга хэмжээний дарамтад өртөхгүй байх том шалтгаан болох юм.

Экспортын уул уурхайн бүтээгдэхүүний нийт үнэ, хэмжээ

Монголын экспортын уул уурхайн бүтээгдэхүүн.

               Мөн өнгөрсөн хоёрдугаар сард БНХАУ, Монгол Улсын хоёр Засгийн газар харилцан уулзалт зохион байгуулж, Монголын Өмнөговь аймгаас эх газрын Хятад руу чиглэсэн гурван гол төмөр замын төслийг эцэслэн шийдвэрлэсэн. Монгол Улс 2009 оноос хойш дотоодын дэд бүтэц сайжруулалтад томоохон үсрэлт хийсэн гэж болно. Тухайн дэд бүтцийн сорилтууд нь Монгол Улс уул уурхайн салбарт суурилсан эдийн засгаа төрөлжүүлэх томоохон хэтийн зорилго болоод байгааг “Foreign Policy” агентлаг онцолжээ.