Эргэлт.мн мэдээллийн сайт “Тэд бидний тухай” буландаа олон улсын хэвлэл мэдээллийн сайт, агентлагуудад Монгол Улсын тухай бичсэн нийтлэлүүдийг хөрвүүлэн хүргэдэг билээ.

            Тэгвэл энэ удаагийн “Тэд бидний тухай” буландаа “Reuters” агентлагийн Шанхай дахь сурвалжлагч Дэвид Стэнвэйгийн нийтлэлийг хөрвүүлэн хүргэж байна.

-ОХУ-ын эсрэг авсан хориг арга хэмжээтэй холбоотойгоор Монголд бараа, бүтээгдэхүүн тасалдаж болзошгүй-

ЗХУ-ын ноёрхол дор олон жилийн турш “дарлагдсан” монголчууд эх орныхоо төв талбай дээр дайныг, ОХУ-ыг эсэргүүцэн Украины туг барин жагсах нь 1990-ээд оны үед олсон ардчиллыг нь илтгэх мэт. Гэсэн ч өнгөрсөн хоёрдугаар сард Улаанбаатар хотын төв талбай болох Сүхбаатарын талбайд болсон жагсаалын үеэр ОХУ-ын талыг дэмжигч аль эсвэл Оростой дайсагналцахаас болгоомжилж буй гэж нэрлэж болох иргэд жагсагчидтай мөргөлджээ.

            Монгол Улс хойд талаараа ОХУ, урд талаараа БНХАУ-аар хүрээлүүлсэн далайд гарцгүй орон. Харин өөрийн бүрэн эрхт тусгаар тогтнолынхоо хүрээнд гуравдагч хөршөөр Япон, БНСУ, АНУ-тай холбоотой байдаг ч, эдийн засаг нь хоёр хөршдөө тулгуурладаг гэж хэлж болно. Гэсэн ч зарим тодорхой бус шалтгааны улмаас ОХУ Украин руу дайрч, олон улс Москвагийн эсрэг хатуу хориг арга хэмжээ авахад Монгол Улсын эдийн засаг “хог дээр” үсрэв. Мөн үүсээд байгаа нөхцөл байдлаас шалтгаалж, Монголын улстөрчид “хөл, толгойгоо олохгүй” гүйж яваа сурагтай. Олон улсын харилцаа, дайны эгзэгтэй энэ үед Монголын талаас гаргах шийдвэр нь хойд хөрш ОХУ-ын хамтын дипломат харилцааг эвдэж болзошгүй байдалтай байна.

-SWIFT-ийн хориг Монгол Улсад ч сөргөөр нөлөөлнө-

Монгол Улсын Төв банкны гадаад худалдааны олонх нь ОХУ-ын банкуудаар дамждаг. Гадаад худалдаагаар зогсохгүй монголчууд газрын тос, автобензины бараг бүх нөөцөө хойд хөршөөсөө авдаг юм байна. Энэ талаар Монголбанкны ерөнхийлөгч Б.Лхагвасүрэн “Европоос Монголд ирэх өргөн хэрэглээний бараа, бүтээгдэхүүний нийлүүлэлт тасалдаж, төлбөр, тооцоо хийх боломжгүй болж болзошгүй” талаар анхааруулсан байна. Харин Монголын улстөр судлаач, социологич Л.Сумати “Бид ОХУ-аас хэт их хамааралтай байна. Зөвхөн автобензин төдийгүй түүнээс ч олон зүйлээс хамааралтай байгаа” гэдгийг онцолж байгаа аж. Түүний тайлбарлаж байгаагаар “Монголын банкууд ихэнх гүйлгээгээ ОХУ-ын банкуудаар дамжуулж хийдэг учир ОХУ-ын эсрэг тавьсан SWIFT-тэй холбоотой хориг арга хэмжээ нь Монголын экспортод ч нөлөөлнө” гэжээ.

ОХУ-ын тэргүүлдэг Эдийн засгийн хамтын ажиллагааны олон улсын банкнаас Украины асуудалтай холбоотойгоор олон орон гарсан ч, Монгол Улс үлдсэн хэвээр байгаа юм.

            Монголын эдийн засагч Ч.Отгочулуу “Далайд гарцгүй, эдийн засаг нь хоёр их гүрний дунд хавчуулагдсан Монгол Улс шиг улсын хувьд экспортод тулгуурладаг. Монголын эдийн засаг муу байх үеэр ОХУ, Украины дайн улам бүр дордуулж байна” гэж тайлбарлажээ.

-У.Хүрэлсүх ОХУ, БНХАУ-ын Ерөнхийлөгч нарын “уурыг хүргэх”-ээс “айж” байгаа-

Монгол Улс ихэвчлэн геополитикийн маргаанаас хол байж, зайлсхийж байдаг. Өнгөрсөн жил АНУ Афганистанаас цэргээ татахад ч, ОХУ-аас Казахстан руу цэргээ оруулахад ч ямар нэгэн тайлбар хийгээгүй. Гэтэл ОХУ-ын цэргүүдийг Украинаас гаргах НҮБ-ын тогтоолд түдгэлзсэн хариу өгсөн юм.

            Колумбын их сургуулийн шинжээч Жулиан Диеркес “Монгол Улсын одоогийн удирдагч нь Путин, Ши Жиньпиний бухимдлыг хүргэх дургүй нэгэн байх. Энэ байр  суурь нь Монголыг геополитикийн хувьд хэт нэг талыг барьж байгаа гэж харагдуулдаг. Ийм нөхцөл байдал нь үүсээд байгаа асуудалтай холбоотойгоор улстөр, эдийн засгаа хөгжүүлэх гарц гаргахад хэцүү байх болно” гэсэн байна. Харин Монголын эдийн засагч Ч.Отгочулуу “Монгол Улс эрх чөлөө, ардчиллыг эрхэмлэдэг. Гэвч эдийн засгийн хувьд бие дааж чадахгүй байгаа нь асуудалтай байна” гэжээ.