ОХУ бүрэн зэвсэглэсэн 150 мянга гаруй цэргээ Украин Улсын хилийн бүсэд байршуулсантай холбоотой олон улсын улстөрийн нөхцөл байдал хурцадмал байдалд шилжлээ.

-ОХУ “ЭНХИЙГ САХИУЛАХ” НЭРЭЭР УКРАИН РУУ ЦЭРГЭЭ ОРУУЛНА ГЭВ-

ОХУ-ын Ерөнхийлөгч Владимир Путин Орос, Украины асуудалтай холбоотойгоор өнгөрсөн даваа гарагт 55 минутын мэдэгдэл хийж, Украинаас салан тулгаарлагчдын тусгаар тогтнолыг хүлээн зөвшөөрч байгаа тухайгаа мэдэгдэж, энэ тухай баримт бичигт гарын үсэг зурсан. Улмаар Украин Улсын зүүн бүсийн Донецк, Луганск муж нь БНУ-ын статустай болов.

          Ерөнхийлөгч Владимир Путин мэдэгдлийнхээ үеэр “Украиныг В.Ленин үүсгэсэн” тухай онцолж, одоо ч Украин Улс холбооны нэгэн орон байх тухай дурдсан. Тэрбээр Украины талыг Донбасс дахь ажиллагаагаа нэн даруй зогсоохыг шаардаж, “Дайн болох, олон хүний цус урсгаж болзошгүй энэ үеийн бүх хариуцлагыг Киев хүлээнэ” гэж мэдэгдсэн юм.

          В.В.Путины салан тусгаарлагчдыг хүлээн зөвшөөрсөн асуудлаар өчигдөр НҮБ-ын Аюулгүйн зөвлөл шуурхай хуралдаан зохион байгуулж, эл асуудлаар хэлэлцсэн. Хуралдааны үеэр 15 орны төлөөлөгчид байр сууриа илэрхийлж, “ОХУ-ыг улстөрийн түрэмгий байдлаа зогсоох”-ыг уриалсан юм. Мөн хуралдаанаар ОХУ-ын салан тусгаарлагчдыг зөвшөөрсөн шийдвэрийн тухайд санал хураахад хуралдаанд оролцсон орны төлөөлөгчид бүрэл бүрэлдэхүүнээрээ эсэргүүцсэн. Олон улсын зарим хэвлэлийн мэдэгдэж байгаагаар Москва нь Донецк, Луганск мужийн тусгаар тогтнолыг хүлээн зөвшөөрсөн нь “Энхийг сахиулах” нэрээр Донецк, Луганск руу цэргийн хүчээ оруулж, Киевтэй илүү ойртоно гэж үзэж байна.

-НАТО, ОХУ-ЫН ДУНДАХ “ДАЙН”-

Одоогоос 10 гаруй жилийн өмнө 2010-аад оны үед барууны батлан хамгаалах холбоо буюу НАТО-гоос Украин зэрэг Европын оронд цэргийн хүчээ байршуулж, зэр зэвсэг, хамгаалалтын систем байгуулж эхэлсэн байдаг. Тухайн үед НАТО-гийн цэргийн хүч Европт байршуулж байгааг Москвагаас эсэргүүцэж, ОХУ-ын бүрэн бүтэн байдалд заналхийлж байгаа тухай мэдэгдэж байв.

          ОХУ-ын Ерөнхийлөгч Владимир Путин салан тусгаарлагчдыг хүлээн зөвшөөрсөн мэдэгдэл хийсний дараагаар Украин Улсын Гадаад хэргийн сайд Дмитрий Кулеба “ОХУ, барууны орнуудын дундах дайнд Украин бамбай болж байна” гэж мэдээлсэн.  Харин алан хядагч Осама бин Ладенаар шалтагласан барууны цэргийн хүч өдгөө Европт маш их хэмжээгээр хүчирхэгжиж, ядуу буурай орнуудыг Европын холбоонд элсүүлэх нэрээр тус тивийн ядуу буурай орнуудыг өөртөө татаж, “алан хядагчдаас илүү аюултай” болсныг зарим олон улсын хэвлэл анхааруулж байна.