“Бээжин-2022” өвлийн олимпын XXIV наадам 16 өдрийн турш үргэлжилж, хаалтын ёслолоо хийсэн. Ээлжит өвлийн олимпод нийт 91 орны 2871 тамирчин долоон спортын 15 төрөлд 109 багц медалийн төлөө өрсөлдөв. Спорт шинжээчдийн үзэж байгаагаар “Бээжин-2022” спортын түүхэнд хамгийн дуулиантай өвлийн олимп” гэж дурсагдах үлдэх гэнэ. Олон арван шинэ дээд амжилт тогтоож, өвлийн олимпын түүхийг өөрчилж, сэргээшийн шинжилгээтэй холбоотой зэрэг асуудал нь дэлхий дахинд түгэж, “хамгийн дуулиантай” тодотгол авсан “Бээжин-2022” наадмын онцлох үйл явдлуудыг тоймлон хүргэе.

“НЭГ ДЭЛХИЙ, НЭГ ГЭР БҮЛ”

           “Бээжин-2022” өвлийн олимпын наадам цар хүрээ, нээлтийн ёслолоо ч “сүртэй” хийсэн. Наадам болохоос өмнө БНХАУ-ын дарга Ши Жиньпин “БНХАУ сүүлийн 1000 жилд болоогүй олимпын наадмын нээлтийг хийх болно” гэж хэлж байсан. Ши Жиньпиний хэлсэнтэй адил шинэ өнгө төрх, дэвшилтэт технологийг олон орны уламжлалтай хослуулсан нээлтийн ёслол үзэгчдийн сэтгэлд хүрсэн, тааламжтай үзүүлбэр байж чадсан.

Мөн “Бээжин-2022” өвлийн олимп нь түүхэн дэх хамгийн олон өвлийн спортын шинэ төрөл нэмж, оролцуулж байгаагаараа онцлог болсон. Үүнд:

• Эрэгтэй freestyle
• Эмэгтэй big air
• Бобслейний эмэгтэй ганцаарчилсан
• Трамплин
• Snowboard
• Шорт трек
• Холимог багийн freestyle aerials төрлийг шинээр нэмж оруулсан.

Гэхдээ “Бээжин-2022” өвлийн олимпын наадмын шинэ, шинэлэг зүйлс зөвхөн үүгээр дуусаагүй. Өвлийн олимпын түүхэнд хамгийн олон буюу 19 мянган сайн дурын ажилтан эгнээндээ нэгтгэсэн.

“БЭЭЖИН-2022” НААДМЫГ НОРВЕГИ УЛС 37 МЕДАЛЬТАЙГААР ТЭРГҮҮЛЭВ

“Бээжин-2022” олимпод норвегичууд нийт 84 тамирчны бүрэлдэхүүнтэй оролцож, 16 алт, найман мөнгө, 13 хүрэл, нийт 37 медаль хүртсэн амжилтаар багийн дүнгээр хол тасархай өнгөлж, өвлийн олимпын наадмыг тэргүүлэв. Норвеги Улсын 37 медаль хүртсэн амжилт нь 2010 оны Канад, 2018 оны Герман, Норвеги 14 алт авсан нь өмнөх дээд амжилтыг шинэчлэл тогтоож, нэг олимпоос 16 алтан медаль хүртсэн анхны орон болж олимпын түүхийг бүтээсэн юм.

Германчууд чарга, бобслей, скелетоны төрөлд тэргүүлсээр олимпын наадмын медалийн хүснэгтийн хоёрдугаар байрт бичигдэв. Харин зохион байгуулагч БНХАУ есөн алт, нийт 15 медальтайгаар өвлийн олимпын дээд амжилтаа тогтоожээ.

-ӨВЛИЙН ОЛИМПЫН БААТРУУД-

“Бээжин-2022” өвлийн олимпод дөрвөн тамирчин таван медаль хүртсэн нь мөн нэгэн сонирхолтой дээд амжилт болсон юм. Норвегийн тамирчин Йоханнес Бё дөрвөн алт, нэг хүрэл медал хүртэж, эрчүүдийн биатлоны “босоо” аварга гэдгээ дахин нэг батлан харуулав. Тэрбээр Солт-Лейкийн олимпоос дөрвөн алт авсан нутаг нэгт Оле Эйнар Бьорндалений дээд амжилтыг давтсаны зэрэгцээ нэг олимпоос таван медаль хүртсэн анхдагчдын нэг болж байв. Мөн Норвегийн тамирчин М.Розеланд, Францын тамирчин К.Фийон нар адил таван медаль хүртсэн.

          Францын Кантен Фийон Майе зургаан төрлөөс бүгдээс нь медаль авч, түүхэнд нэрээ бичүүлэх боломжтой байсан ч сүүлийн масс стартад дөрөвдүгээр байр эзэлсэн. Харин ОХУ-ын Олимпын хорооны Александр Большунов нэг олимпоос таван медаль хүртсэн анхны цаначин болсноос гадна “Пёнчан-2018”-ыг оролцуулаад олимпын есөн гараанд хурд сорьж, бүгдээс нь медаль хүртсэн өвөрмөц амжилтын эзэн болсон билээ.

-ДЭЭД АМЖИЛТ ТОГТООГЧИД-

“Бээжин-2022” өвлийн олимпын наадам албан ёсоор нээлтээ хийснээс хойш 20 цагийн дараа анхны алтан медальтнаа шалгаруулсан. Нээлтээс хойш өвлийн спортын үндсэн долоон төрлийн тэмцээнүүд эхэлсэн бөгөөд эмэгтэйчүүдийн цанын 15 км-ын төрөл хамгийн эхэнд шилдгүүдээ шалгаруулсан юм. Улмаар тус төрөл Норвеги Улсыг төлөөлөн оролцсон Тереке Йохауг алтан медаль хүртэж, тус наадмын анхны алтан медальтан болсон.

Харин хоёр өдрийн турш үргэлжилсэн “Бээжин-2022” наадмаас дахин онцлох зүйл нь Шинэ Зеландын түүхийг бичсэн, өвлийн олимпын түүхийг эвдсэн хоёр алтан медальтан байв.

 “Бээжин-2022” өвлийн олимпын наадмын эрэгтэйчүүдийн тэшүүрийн таван км-ын төрөлд өрсөлдсөн Нидерландын тамирчин Патрик Роест олимпын шинэ дээд амжилт тогтоож, алтан медаль хүртсэн. Тэрбээр эрэгтэйчүүдийн тэшүүрийн таван км-ын зайн өмнөх дээд амжилт болох Шведийн нэрт тамирчин Нилс ван дер Поэлийн амжилтаас 0.47 секундын өмнө барианд орсон юм. Хагас секундын хугацааг алтан медалиас илүүтэй үнэлсэн нидерландчуудын баярын жагсаал үргэлжилсээр.

          Тэгвэл олимпын түүхэн амжилтыг эвдээгүй ч, эх орныхоо түүхийг бичсэн нэг үйл явдал тохиосон юм. “Бээжин-2022” өвлийн олимпын наадмын эмэгтэйчүүдийн слоупстайлд төрөлд өрсөлдсөн Шинэ Зеландын тамирчин Зой Садовски-Синнотт алтан медаль хүртэж, Шинэ Зедандын өвлийн олимпын түүхэн дэх анхны алтан медалийг хүртсэн юм. Өдгөө 20 настай Шинэ Зеландын түүхийг бичсэн тамирчинд хамгийн түрүүнд тус улсын Шадар сайд баяр хүргэж, маш том бай, шагнал амласан аж.

“Бээжин-2022” олимпын наадамд Франц Улсыг төлөөлөн оролцсон хос гэгээн хайрын баярын өдөр өвлийн олимпын наадмын аварга болжээ. Шинэхэн өвлийн олимпын наадмын аваргууд болох Гарбиелла Пападакис, Гийом Сизерон нар нь “Бээжин-2022” уран гулгалтын хосын бүжиг төрөлд бөгөөд нийт 226.98 оноо авсан нь дэлхийн шинэ дээд амжилт болсон юм.

Ташрамд сонирхуулаад, Франц хос Гарбиелла Пападакис, Гийом Сизерон нар “Сочи-2014”, “Пёнчан-2018” наадмуудад оролцож, 2018 оны оны өвлийн олимпын наадмыг мөнгөн медаль хүртсэн. Харин хос хоёр дэлхийн аваргын тэмцээнд дөрвөн ч удаа түрүүлж байжээ.

          Өвлийн олимпын наадмын түүхэнд дөрвөн эргэлттэй үсрэлт хийсэн анхны эмэгтэй тамирчин болж, мөн сэргээш хэрэглэсэн гэх шалтгаанаар дэлхий нийтийн анхаарлыг татсан ОХУ-ын Олимпын хорооны 15 настай уран гулгагч Камила Валиева өвлийн олимпын наадмын анхаарлын төвд байлаа. Багийн төрөлд амжилттай оролцож, тэргүүлсэн ч, сэргээшийн шинжилгээндээ бүдэрсэн Камилаг багийнхан нь нөхөж, ганцаарчилсан төрөлд ОХУ-ын Олимпын хорооны уран гулгагчид сайн оролцсон. Үзүүлбэрийн нийт дүнгээр Анна Щербакова алтан медаль медаль хүртэж, түүний араас мөн ОХУ-ын Олимпын хорооны тамирчин Александра Трусова удаалж, Японы уран гулгагч Каори Сакамото гуравдугаар байрт шалгарсан.

Хэдий Анна Щербакова түрүүлсэн ч, чөлөөт үзүүлбэрт дөрөвлөсөн харайлтыг таван удаа гүйцэтгэсэн Александра Трусоваг үзэгчид ялалт байгуулна гэж байлаа. Энэ ч утгаар Александра Трусова тамирчдын хэсэгт хүрмэгцээ ОХУ-ын Олимпын хорооны бусад уран гулгагчтайгаа маргалдаж, алтан медаль хүртсэн Анна Щербаковад хандан “Үзэн ядаж байна” гэж хэлсэн талаар “The Guardian” агентлаг мэдээлсэн байна. Мөн шагнал гардуулах ёслолын дараа Александра Трусова хэвлэлийнхэнд “Тэмцээний үр дүнд сэтгэл хангалуун бус байгаа”-гаа мэдээлсэн аж.

          ОХУ-ын Олимпын хорооны тамирчдын хувьд “Бээжин-2022” өвлийн олимпын наадмын уран гулгалтын төрөл нулимстай, маргаантай, уур бухимдалтай өндөрлөж байна. Харин допинг хэрэглэсэн гэгдэж буй 15 настай уран гулгагч Камила Валиевагийн асуудлыг өвлийн олимп дууссаны дараа Спортын арбитрын шүүхээс эцэслэн шийдэх юм.

-БЭЭЖИНД “БАДАМЛАСАН” ОЛИМПЫН БАМБАР МИЛАНЫГ ЗОРИЛОО-

16 хоногийн турш цэнхэр дэлгэцийн өмнө “уяж”, хүн төрөлхтөнд спорт, олимпизмын гайхамшгийг мэдрүүлсэн Бээжингийн өвлийн олимп хөшгөө хаав. Одоо өвлийн олимпын цаг тоолол “Милан-Кортина-2026” эхлэх мөчийг тоолон цохилж эхлэв.

          Цар тахлын аюул бүрэн холдоогүй амаргүй үед маш амжилттай зохиогдсон гэдгээрээ “Бээжин-2022” олимп түүхэнд тэмдэглэгдэн үлдэх нь гарцаагүй. Зохион байгуулагчид хаалттай менежментийн системийг бүрэн утгаар нь хэрэгжүүлж чадсаны үр дүнд олимпын наадам ковидын аюулаас ангид байж чадав.

Энэ олимпын үеэр олимпын дээд амжилт 16 удаа эвдэгдсэнээс гадна тамирчид хамгийн олон төрөлд хамгийн олон багц медалийн төлөө өрсөлдсөн, хамгийн олон эмэгтэй тамирчин оролцсон, хүйсийн харьцаа хамгийн тэнцвэртэй өвлийн олимп болсон гээд онцлог зүйл их байлаа.

          ОУОХ-ны ерөнхийлөгч Томас Бах олимпын наадмыг хааж хэлсэн үгэндээ “Бээжингийн олимпын тосгон тав тухтай, цэнгэлдэх хүрээлэн гайхамшигтай, зохион байгуулалт дахин давтагдашгүй байлаа. Цар тахлыг даван туулсны дараа бид хурднаас хурдан, өндрөөс өндөр, хүчтэйгээс хүчтэй, хамтдаа байх ёстой” хэмээн энэ олимпыг дүгнэнгээ ирээдүйн зорилгоо сануулан хэлэв.