Монгол Улсын Засгийн газрын ээлжит бус хуралдаанаар цар тахлын улбар шар түвшинг бууруулж, шар түвшин болгосон. Үүний дагуу Монгол Улс хилээ нээж, гаднын орноос ирсэн иргэдийг тусгаарлахгүй байх шийдвэр гараад байгаа юм.

          Эргэлт.мн мэдээллийн сайт сүүлийн нэг сарын хугацаанд цар тахлын түвшингээ бууруулж, шар түвшинд шилжсэн орнуудын баримталж, хэрэгжүүлж байгаа бодлогын талаар тоймлон хүргэе.

-ШАР ТҮВШИНД ШИЛЖСЭН НЬ ОМИКРОН ХУВИЛБАР ЗОНХИЛОХ ЭРСДЭЛ БОЛОВ-

Баруун өмнөд Азийн Бахрейн Улс өнгөрсөн сарын 31-нээс цар тахлын үеийн дэглэмээ  сулруулж, шар түвшинд шилжсэн. Тус улсын Засгийн газраас баталсан тогтоолын дагуу өдөрт бүртгэгдэх коронавирусийн тохиолдлын хэмжээ долоо хоногийн дунджаар 51-100 болсон учир цар тахлын үеийн шар дэглэмд шилжүүлсэн байдаг.

          Гэсэн ч  Бахрейны зарим олон нийтийн үйлчилгээний төв коронавирусийн эсрэг вакцины бүрэн тунд хамрагдсан буюу вакцины ногоон гэрчилгээтэй хүнд үйлчилж, 12-оос доош насныханд үйлчлэхгүй байгаа аж. Мөн цар тахлын үеийн шар дэглэмд хэд хэдэн үйлчилгээнд хязгаарлалт тавьсан нь

• Худалдааны төв
• Кафе, ресторан
• Биеийн тамирын газар
• Үсчин, салон
• Кино театр
• Тоглоомын талбай
• Олон хүн цуглах арга хэмжээ, хурал зэрэг үйлчилгээ багтаж байгаа юм.

          Гэсэн ч цар тахлын дэглэмээ сулруулж, шар түвшинд шилжсэн Бахрейн Улсад сүүлийн хоёр долоо хоногийн турш өдөрт бүртгэгдэх халдварын тохиолдлын олонхыг коронавирусийн омикрон хувилбар эзлээд байна. Мөн үүнтэй холбоотойгоор Бахрейн Улсын дахин хилийн хориг тавих, цар тахлын дэглэмээ чангатгах эсэх асуудлаар хуралдах аж.

-ЕВРАЗИЙН ОРНУУД ЦАР ТАХЛЫН ШАР ТҮВШИНД ШИЛЖИЖ БАЙГАА НЬ ЕВРОПЫН ХОЛБООНЫ БОДЛОГО УУ-

          Өнгөрсөн даваа гараг буюу 2022 оны хоёрдугаар сарын 14-нд Латви Улс удаан хугацааны турш үргэлж байсан цар тахлын дэглэмийг сулруулж, шар түвшинд шилжив. Латвийн SchengenVisaInfo.com мэдээллийн сайт дээр коронавирусийн улаан, улбар шар түвшинд хамаарагдаж байсан орнуудын ойрын хугацаанд “Цар тахлын шар түвшинд шилжих ёстой” тухай Европын холбоо, Шенгений орнууд анхааруулж байгаа талаар мэдэгджээ.

          Латви Улсын цар тахлын дэглэмийг шар түвшин руу бууруулахдаа Цар тахлын тухай хуульд тусгасан хэд хэдэн заалтыг өөрчилсөн байна. Тус улсын хил нээгдсэнтэй холбоотойгоор гаднын орноос ирэх жуулчдаас зайлшгүй коронавирусийн вакцины гэрчилгээ шаардаж байгаа аж. Мөн үүнд, зөвхөн Comirnaty, Spikevax, Vaxzevria, Janssen, Nuvaxovid, Covishield вакцины тунд хамрагдсан иргэдийг “Вакцинд хамрагдсан” гэж тооцож байгаа гэх. Хэрэв өөр вакцины бүрэн дунд хамрагдсан бол нэмэлт тунг заавал дээрх тунгуудаас хийлгэсэн байх шаардлагатай аж.

-МЕКСИКИЙН МУЖ УЛС ЦАР ТАХЛЫН ШАР ТҮВШИНД ШИЛЖИВ-

          Мексикийн Нэгдсэн Улсын Кинтана Роо муж энэ сарын 7-ноос амбан захирагчийн тушаалаар цар тахлын шар түвшинд шилжсэн. Нэгэн үе коронавирусийн тархалтын хамгийн аюултай бүс болоод байсан тус газар өдгөө аялал жуулчлалын эдийн засгаа эргэн нөхөх гэнэ.

          Мужийн амбан захирагчийн тушаалын дагуу зочид буудлууд 85 хувийн дүүргэлт, ресторан, баар, клубыг мөн 85 хувийн дүүргэлт, танхимын суудлын дүүргэлт 70 хүртэлх хувьтай байгаа юм. Мөн амбан захирагчийн тушаалын хавсралтад тусгасан эрүүл мэнд, ариун цэврийн аюулгүй байдлын төлөөлөгч гэх шинэ албан тушаал гаргасан байна. Мужийн захиргааны албаны мэдээлснээр шар түвшинд шилжиж, эдийн засгаа сэргээхийн тулд дахин хэд хэдэн шинэ ажлын байр бий болгох аж.

-КОРОНАВИРУСИЙН “МАШ ЭРСДЭЛТЭЙ БҮС” НИДЕРЛАНД УЛС ЦАР ТАХЛЫН ШАР ТҮВШИНД ШИЛЖИНЭ-

          Коронавирусийн шинэ төрлийн хувилбарууд эрчимтэй тархсан Нидерланд Улсын коронавирусийн “Маш эрсдэлтэй бүс” гэж онцолсон. Тэгвэл Нидерланд Улс энэ сарын 25-наас хөл хорио, хатуу дэглэмийг бүрэн цуцалж, цар тахлын шар түвшинд шилжихийг тус улсын Эрүүл мэндийн яамнаас мэдэгдэв.

          Одоогийн байдлаар коронавирусийн “Маш эрсдэлтэй бүс” гэж онцлоод байгаа АНУ, Их Британи тэргүүтэй 20 орчим орон байгаа бөгөөд Нидерланд Улс шар түвшинд шилжсэн ч, эдгээр орноос ирэх жуулчдад “хатуу” байх гэнэ. 14 хоногийн тусгаарлалтад оруулж, тусгаарлалтад байх хугацаанд нь нийт гурван удаа PCR шинжилгээ авах аж.