Барууны орнууд “ОХУ цэргүүдээ Украин руу оруулж, дайн эхлүүлнэ” гэх мэдээлэл цацсанаас хойш Украин даяар эмх замбараагүй байдал үүсэж, иргэдийн сэтгэл зүйг үймүүлж байна. Их Британийн Зэвсэгт хүчний яамнаас мэдээлснээр Бүгд Найрамдах Украин Улсын хилийн бүс орчимд ОХУ 130 орчим зэвсэглэсэн цэргээ байршуулаад байгаа юм. Мөн үүнтэй холбоотойгоор Украин Улсын импортын бүтээгдэхүүний үнэ өсөж, барууны орнууд тус улсаас иргэдээ татах ажиллагаа эхлүүлж, олон улсын агаарын тээврийн компаниуд ч Украин руу нисэх бүх нислэгээ цуцлаад байна.

-УКРАИНД ҮЛДСЭН ГАНЦ НАЙДВАР НЬ НАТО БОЛОН ЕВРОПЫН ХОЛБОО-

            ОХУ, Украинтай холбоотой асуудалд удаан хугацааны туршид албан ёсны мэдэгдэл хийгээгүй Ерөнхийлөгч Владимир Зеленский орон нутгийн нэг телевизэд ярилцлага өгчээ. Тэрбээр албан ёсны ярилцлагадаа “Украины талаас НАТО, Европын холбоонд үнэнч үлдэж, болзошгүй дайнаас сэргийлэх болно” хэмээн онцлон хэлсэн байна. Мөн Украины Гадаад хэргийн сайд Дмитрий Кулеба ч энэ тухайд “Манай оронд байгаа ганц найдвар бол НАТО” хэмээн мэдэгджээ.

НАТО бол АНУ, Их Британи, Канад, Франц тэргүүтэй 30 гишүүн орноос бүрдэх дэлхийн хамгийн хүчирхэг бүс нутгийн батлан хамгаалах холбоо. Тус холбооны дүрмэнд гишүүн орон руу өөр нэгэн улс зэвсэгт халдлага хийсэн тохиолдолд холбоо бүрэн туслах тухай заасан байдаг. Тэгвэл НАТО холбооны уг заалт өнөөгийн Украинд үлдсэн цор ганц болж болоод байна.

            Гэсэн хэдий ч Украин Улс сүүлийн жилүүдийн турш НАТО-гийн гишүүнээр элсэх хүсэлт удаа дараа гаргасан ч, амжилтад хүрээгүй. Барууны холбооны орнууд олон жил “НАТО холбоо шинэ гишүүн орнуудад нээлттэй байх үүрэгтэй” гэж мэдэгдээд байгаа ч, өдгөө ОХУ-ын талаас шахалт хийж, Украиныг НАТО-д элсүүлэхгүй байсан байж болзошгүй талаар олон улсын шинжээчид онцолж байна.

            Энэ талаар Бүгд Найрамдах Украин Улсаас Лондонд суух Бүрэн эрхт Элчин сайд Вадим Пристайко “Украин Улс НАТО-гийн гишүүн орон биш байгаа нь өнөө цагийн хамгийн том асуудал. Тиймээс ч бид дайнаас зайлсхийж, ОХУ-ын талтай яриа хэлэлцээ хийхийг хүсэж байгаа” гэж мэдэгджээ.

Болзошгүй дайнаас сэргийлэхийн тулд Украин Улсаас 48 цагийн дотор ОХУ-ын талтай уулзалт зохион байгуулах хүсэлт гаргаад байна. Албан ёсны хүсэлтэд хоёр орны хоорондын харилцаа, бүтээн байгуулалтын асуудлаар ярилцах тухай тусгасан ч, Оросын цэргүүд хүсэлтийг үл тоомсорлосон гэнэ.

ОХУ Украины хилийн бүсэд 100 мянга орчим цэрэг байрлуулсан ч, тус улс руу цэрэг оруулах асуудлыг үгүйсгэж байгаа юм. Харин Цагаан ордноос “ОХУ-ын тал хэзээ ч агаарын бөмбөгдөлт хийж болзошгүй” хэмээн анхааруулж байна.

            Олон улсын хэвлэлүүдийн мэдээлж байгаагаар ирэх 48 цагийн дотор болох уулзалт нь Украины ирээдүй болон тус улсыг НАТО-д гишүүнээр элсүүлэх тухай асуудлыг эцэслэн шийдэх юм. Урьдчилсан байдлаар тус уулзалтад Украин Улсын Ерөнхийлөгч Владимир Зеленский, Их Британийн Ерөнхий сайд Борис Жонсон, Германы канцлер Олаф Шольц нар оролцох тухай зарлаад байна. Мөн Украины Ерөнхийлөгч Владимир Зеленский уг уулзалтдаа АНУ-ын Ерөнхийлөгч Жо Байденыг ирж оролцохыг уриад байгаа юм.

-ОХУ, УКРАИН ХОЁР ДУНДАХ “ЗОХИОМОЛ” ДАЙН-

Үүсээд байгаа нөхцөл байдалтай холбоотойгоор Кремлээс АНУ, ОХУ-ын хоорондын дипломат харилцаа “шалан дээр” унаж байгааг анхааруулжээ. Кремлийн хэвлэлийн төлөөлөгч Дмитрий Песков “Хоёр тал зөвхөн сөрөг талын тухай л ярьж байна” гэсэн байна.

            Мөн Украин, ОХУ-ын дундах асуудлаар Их Британийн Зэвсэгт хүчний сайд Жеймс Хиппи “Дипломат хэлэлцээг үргэлжлүүлэх шаардлагатай. Энэ дипломат шоу байхаа больсон” гэжээ. Гэсэн ч Жеймс Хиппи Украиныг НАТО-д элсүүлэх саналыг дэмжихгүй байгаа юм.

Нөгөөтээгүүр хоёр орны дунд үүсээд байгаа нөхцөл байдлыг “зохиомол дайн” байж болзошгүй талаар зарим олон улсын хэвлэл мэдээлж байна.

            Их Британийн “BBC” агентлагийн Москва дахь сурвалжлагч Стив Розенберг “ОХУ Украин руу довтлох гэж байна” гэсэн барууныхны мэдээ Москвад шуугиан дэгдээж байна” гэсэн мэдэгдэл гаргажээ. Сурвалжлагч Стив Розенбергийн мэдээлснээр ОХУ-ын иргэд, албаныхан барууны орнуудыг тийм мэдэгдэл гаргахаас өмнө дайны талаар огт мэдээгүй. Харин ч “Уг мэдэгдэл цацагдсанаар иргэд цочролд орсон” гэсэн байна.

            Тэгвэл “BBC” агентлагийн Киев дэх сурвалжлагч Жеймс Уотерхаус “Украин дайнд бэлдээгүй. Нар манддагаараа мандаж, жаргадагаараа жаргаж, амьдрал хэвийн үргэлжилж байна. Хэн ч болзошгүй дайны талаарх мэдээг сонсоохгүй юм шиг” гэжээ.

Дипломат сурвалжлагч Жеймс Ландейл уг “зохиомол дайн”-ы талаар “Түрэмгий үгс болзошгүй аюулыг бодит болгодог” хэмээн онцолж, болзошгүй дайныг улам бодит болгож байгаа гэсэн байна.

-ХЭРЭВ ОХУ УКРАИН РУУ ДОВТОЛБОЛ ЮУ БОЛОХ ВЭ-

Хэрэв ОХУ цэргүүдээ Украин руу оруулбал Европ тивийн түүхэнд сүүлийн 70 жилд болоогүй тивийн хэмжээний дайн эхэлж болзошгүй талаар олон улсын шинжээчид анхааруулж байна. Хэрэв тийм зүйл бол ОХУ, Украины асуудал бүхэл Европыг хамарч, хүйтэн дайнаас гадна кибер халдалт, маш их хэмжээний хүн амын шилжилт хөдөлгөөн болж болзошгүй байгаа юм.

            ОХУ бүрэн зэвсэглэсэн 130 мянган цэргээ Украины хилийн бүс орчимд байрлуулсан гэх мэдээлэлтэй холбоотойгоор дэлхийд эдийн засгаараа тэргүүлдэг “Их долоо”-гийн орнууд ОХУ-д маш том хориг арга хэмжээ авахаа мэдэгдээд байгаа.

            ОХУ-ын эсрэг хориг арга хэмжээ авах асуудалтай холбоотойгоор ам.доллартой харьцуулах рублийн ханш суларч байна. Албан эх сурвалжуудын мэдээлснээр өчигдөр буюу хоёрдугаар сарын 14-ний өдрийн даваа гарагаас эхэлж, рублийн ханш огцом унаж, өнгөрсөн хоёр долоо хоногийн турш өсөлттэй байсан үзүүлэлтээ унагасан талаар мэдэгдэж байна.

Мөн НҮБ-ын Аюулгүйн зөвлөл, Европын холбоогоос ОХУ-д хатуу хориг арга хэмжээ авахаа тус тус мэдэгдээд байгаа юм.