-10 ОРЧИМ АЛБА ХААГЧ АМИА АЛДАЖ, 200 ГАРУЙ ХҮН ШАРХАДЖЭЭ-

Казахстаны Засгийн газар 2022 он гармагц шатахууны үнийн хяналтыг цуцалснаар тус улсад өргөн хэрэглээний шатахууны үнэ огцом өсөж, Мангистау мужид л гэхэд 11 центээр өссөн.

23:00 цаг

Казахстаны орон нутгийн цагаар нэгдүгээр сарын 4-ний 23:00 цагт Алматы хотод эсэргүүцлийн жагсаал эхэлж, бусад хотуудад тархаж, эмх замбараагүй байдал үүсэв. Жагсагчид шатахууны үнийн өсөлттэй холбоотойгоор төрийн тэргүүдээ огцрохыг шаардаж, аюулгүй хүчнийхэн, цагдаагийн алба хаагчидтай мөргөлдсөн. Удалгүй эсэргүүцлийн жагсаал хяналтаас гарч, үймээн дэгдэхэд албаныхан жагсагчдын эсрэг нулимс асгаруулагч, хийн гранат ашиглажээ.

Казахстаны Аюулгүй байдлын зөвлөлөөс улс даяар дэгдсэн үймээнийг дарахын тулд 14 хоногийн хугацаатай онц байдал зарласан. Онц байдлын хүрээнд гурван хот, 14 бүс нутагт тээврийн хэрэгслийн хөдөлгөөнийг энэ сарын 19 хүртэл хязгаарлав.

           Гэсэн ч үймээн улам ширүүсэж, Казахстан Улсын Засгийн газар бүрэн бүрэлдэхүүнээрээ огцрох шийдвэр гаргасан. Мөн энэ үеэр Ерөнхийлөгч асан Нурсултан Назарбаев Аюулгүй байдлын зөвлөлийн даргын албан тушаалаас буусан юм.

-ЖАГСАГЧИД ЮУ ШААРДАЖ БАЙГАА ВЭ-

Шатахууны үнийн өсөлттэй холбоотой эхэлсэн эсэргүүцлийн жагсаал дундаасаа нийгмийн олон талд асуудлуудыг хөндөж эхэлсэн. 

Тухайлбал, 

- Хүнсний үнэ бууруулах,

- Шатахууны үнэ бууруулах,

- Тэтгэвэрт гарах насыг 58/60 болгох бууруулах,

- Засгийн газрыг бүрэн бүрэлдэхүүнээр нь огцруулах,

- Жагсаалын үеэр хоригдож байсан бүх хоригдлыг суллах,

- Энгийн иргэдийн цалинг нэмэгдүүлэх,

- Үндэсний компаниудын бүх охин компанийг татан буулгах,

- Хог хаягдал цуглуулахыг цуцлах,

- Казахстаны тээврийн хэрэгслийн төлбөртэй замыг цуцлах,

- Тэтгэврийн доод хэмжээг нэмэгдүүлэх,

- Хүүхдийн тэтгэмжийг нэмэгдүүлэх,

- Ерөнхийлөгч Касым-Жомарт Токаевтай уулзаж, улс төрийн шаардлага тавих зэрэг зүйлийг шаардаж байгаа юм.

-ИНТЕРНЭТ, ЦАХИЛГААН ТАСАЛДАЖ, ЖАГСАГЧИД ЗАХИРАГЧИЙН ГАЗРЫГ ШАТААВ-

Эсэргүүцлийн жагсаал зарим хотод ширүүсэж, жагсагчид гурван хотын Захирагчийн газрыг шатааж, төрийн албан тушаалтнуудад халдсан байна. Харин нийслэл хотын томоохон хэдэн бүс, Алматы хотын цагдаа, прокурорын байгууллагад гал гарч, Ерөнхийлөгчийн ордны бүс нутгийн цахилгаан тасарсан талаар Казахстан Улсын Дотоод хэргийн яамнаас мэдээлсэн юм.

Мөн өнгөрсөн өдрөөс хойш Казахстан Улс даяар интернэт тасарсан.

-АЮУЛГҮЙН ХҮЧНИЙХЭН БОЛОН БОСОГЧДЫН ДУНД ЗЭВСЭГТ МӨРГӨЛДӨӨН ГАРСААР БАЙНА-

Эсэргүүцлийн жагсаал эрчээ авч, сүүлдээ бослого болсон талаар олон улсын хэвлэлүүд мэдээлж байна. Казахстан Улс даяар интернэт тасарсны улмаас албаныхны мэдээлэл хоцорч байгаа ч Казахстанд тусгай сурвалжлагч нар нь ажиллаж байгаа хэвлэлүүд зэвсэгт мөргөлдөөн эхэлсэн талаар мэдээлжээ.

           Монголын цагаар нэгдүгээр сарын 5-6-нд шилжих шөнө зэвсэгт мөргөлдөөн болсон байна. Эсэргүүцлийн жагсаалд оролцоогүй энгийн иргэд гэр гэртээ аюулгүй байдлаа хамгаалж үлдсэн бол жагсаалыг дагасан гэмт хэрэг, дээрэм, хүчирхийллийн гэмт хэрэг тасрахгүй байгаа аж.

Казахстан Улсын Дотоод хэргийн яамны хамгийн сүүлийн мэдээллээр бослого, мөргөлдөөний үеэр нийт есөн хүн амиа алдсаны найм нь цэрэг, цагдаа, аюулгүйн хүчнийхэн байна. Мөн 100 гаруй цагдаагийн алба хаагч, 200 орчим иргэд шархадсан мэдээлэл бий.

           Казахстан Улс даяар өрнөж буй бослоготой холбоотойгоор 200 гаруй иргэнийг баривчлаад байгаа юм.

-ХОЛБООНЫ ОРНУУД ЦЭРГИЙН ХҮЧЭЭ КАЗАХСТАН РУУ ОРУУЛЖ, БОСЛОГЫГ ДАРНА-

Босогчид өнгөрсөн шөнө Алматы хотын нисэх онгоцны буудлыг эзэлсэн. Нисэх онгоцны буудалд болсон мөргөлдөөний үеэр олон хүн бэртэж, зарим нь амиа алдсан тухай албан бус мэдээлэл байгаа. Тэгвэл босогчдын эзэлсэн Алматы хотын нисэх онгоцны буудлыг аюулгүйн хүчнийхэн чөлөөлжээ.

           Казахстан Улс даяар өрнөж байгаа үймээний талаар Казахстан Улсын Ерөнхийлөгч Касым-Жомарт Токаев “Төрийн тэргүүний хувьд энэ асуудлын эсрэг хатуу арга хэмжээ авахаар төлөвлөсөн. Энэ бол Казахстан Улсын аюулгүй байдлын түвшний асуудал. Ард түмэн намайг дэмжинэ гэдэгт итгэлтэй байна” гэж мэдэгдэж, гаднын орнуудаас бослогын дарахад туслахыг хүссэн.

           Ерөнхийлөгч Касым-Жомарт Токаев мэдэгдэл хийснээс хойш удалгүй ОХУ болон түүний холбоотон орнууд бослогын дарахын тулд Казахстан руу цэргийн хүчээ оруулахаар болсон тухай албан мэдээлэл олон улсад цацагдав. Бослогыг дарахаар Казахстан руу нэвтэрч байгаа ОХУ-ын тэргүүлдэг Хамтын аюулгүй байдлын гэрээнд Беларусь, Армени, Киргизстан, Тажикистан зэрэг орон багтдаг.

Олон улсын шинжээчид Казахстан Улсад өрнөж байгаа бослого, үймээнийг сөрөг хүчингүй, ганц нам ноёрхсон засаглал үүнд хүргэж байгааг онцолсон. Харин Казахстан Улсын Ерөнхийлөгч Касым-Жомарт Токаев “Энэ бол эртнээс төлөвлөж, зохион байгуулсан бослого” гэж мэдэгдсэн байна.