Эргэлт.мн мэдээллийн сайтын Гадаад мэдээллийн албанаас 2021 онд дэлхийн эдийн засаг, улстөр, нийгэм, соёл урлаг, спортод хамгийн их үр нөлөө үзүүлж, амжилтад хүрсэн онцлох 10 хүнийг нэрлэж байна.

БИЗНЕС, ЭДИЙН ЗАСАГ

Элон Маск

Автомашин үйлдвэрлэгч “Тесла” компанийн гүйцэтгэх захирал Элон Маск энэ оны хамгийн онцлох хүн байлаа.

           Өдгөө 50 настай Элон Маскын үүсгэн байгуулсан “SpaceX” компанийн Starship хөлөг дэлхийн гадаргуугаас 10 км өндөрт хөөрч, алсын удирдлагатай буултаа амжилттай хийсэн. Starship хөлгийн амжилтыг эрдэмтэд Ангараг гарагийн судалгаанд олон алхам нэмсэн том үйл явдал гэж үзэж байгаа юм. Мөн Starship хөлөг хэдийнэ энгийн иргэдийн хэрэглээнд шилжиж, есдүгээр сард тэрбумтан Жаред Айзекман зохих ёстой төлбөрөө төлж, 29 настай Хэйли Арсено, мэдээлэл зүйн шинжээч Крис Семброски, геологич Сион Проктор нарыг элсүүлж, гурван өдрийн турш үргэлжлэх сансрын аялалд гарч, амжилтай газардсан.

           Мөн Элон Маск өнгөрсөн аравдугаар сард нэг өдрийн дотор 36 тэрбум ам.долларын ашиг олж олны анхаарлыг татсан. Үүний дараагаар Элон Маск дэлхийн түүхэн дэх 300 тэрбум ам.долларын хөрөнгөтэй болсон анхны хүн болж, дэлхийн баячуудын жагсаалтыг хол тасархай тэргүүлэх болсон юм.

Жефф Безос

“Амазон” компанийг үүсгэн байгуулагч, дэлхийн хоёр дахь баян хүн Жефф Безос ч мөн сансрын хөлөг бүтээх “уралдаан”-аас хоцроогүй нь түүнийг оны онцлох хүн болгов.

           Жефф Безос өөрийн “Blue Origin” компанид New Shepard сансрын хөлгийг бүтээж, хамгийн анхны нислэгт нь өөрийн биеэр оролцсон билээ. Тэрбээр New Shepard хөлөг амжилттай газардсаны дараа сансрын хөлгөө аялал жуулчлал, зах зээлийн үйлчилгээнд нэвтрүүлэх зорилгоор бүтээснээ зарласан. New Shepard сансрын хөлөг нь хамгийн тод цонхтой сансрын хөлөг гэдгээрээ онцлог.

УЛСТӨР, НИЙГЭМ

Жо Байден

АНУ-ын Ерөнхийлөгч болж, албан ёсоор ажлаа авсан эхний өдрөө л өмнөх төрийн тэргүүн Дональд Трампын бодлогыг халж, ажлаа эхэлсэн Жо Байден 2021 оны онцлох 10 хүний нэгээр нэрлэгдэж байна.

           Жо Байден ажлын эхний өдрөө өмнөх Ерөнхийлөгч Дональд Трампын “Коронавирусийн томоохон голомттой улс руу зорчих, тухайн улсаас ирэх нислэгийг хориглох тухай” шийдвэрийг цуцалж, дүрвэгсдийг нутаг буцааж, харь оронд суугаа америк иргэдийг татаж эхэлсэн. Өдгөө 79 настай АНУ-ын Ерөнхийлөгч Жо Байден олноор хоморголон устгах зэвсгийн эсрэг үзэл бодлоо илэрхийлж, ОХУ-ын Ерөнхийлөгч Владимир Путин, БНХАУ-ын дарга Ши Жиньпин, БНАСАУ-ын удирдагч Ким Жон Ун нар хатуу үг, анхааруулга өгч байсан нь олон. Бүр ОХУ-ын Ерөнхийлөгч Владимир Путиныг “алуурчин” гээд хэлчихсэн.

           Харин хамгийн гол онцлох үйлдэл нь 20 жилийн үргэлжилсэн Афганистаны дайны дуусгахад хүргэсэн шийдвэр байв. Дайны үр дүн сайн төгсөөгүй ч Афганд байрлах бүх цэргийн хүчээ татаж, холбоотон орнууддаа санал тавьсан нь итгэмээргүй, гайхширмаар шийдвэр болсон юм.

Алексей Навальный

Хэлсэн үгс, хийсэн үйлдэл нь олон нийтэд цацагдаагүй ч энэ онд хамгийн их дуулиан тарьж, олны анхаарлыг татаж чадсан эрхэм бол ОХУ-ын сөрөг хүчний удирдагч Алексей Навальный.

           Өнгөрсөн оны наймдугаар сарын 20-нд Алексей Навальныйг хордуулсан байдаг. Тэрбээр уг хэрэгт өөрийг нь ОХУ-ын Ерөнхийлөгч Владимир Путин хордуулсан гэх мэдэгдэл хийж байсан. Харин Герман Улсад эмчлүүлж байгаад энэ оны нэгдүгээр сарын 17-нд ОХУ-д очсон Алексей Навальныйг баривчилж, хорьсон юм.

           Үүнтэй холбоотойгоор ОХУ-ын 100 орчим хотод сөрөг хүчний удирдагч Алексей Навальныйг суллахыг шаардсан иргэдийн эсэргүүцлийн жагсаал өрнөсөн. Улмаар жагсагчид болон албаныхны дунд мөргөлдөөн үүсэж, цагдаа, цэргийнхэн 5000 гаруй жагсагчийг баривчилсан байдаг. Харин сөрөг хүчний удирдагчийн хүчээр баривчилж хорьсон ОХУ-д АНУ болон Европын холбооноос хориг тавиад байв.

           ОХУ-ын шүүхээс 2019 онд Алексей Навальныйд оноож байсан 3.5 жилийн тэнсэн харгалзах ялыг өөрчилж, гэрийн хорионд байсан хугацааг нь хасаж, 2.8 жилийн хорих ял болгосон. Үүнийг эсэргүүцсэн Навальный 20 гаруй хоногийн турш өлсгөлөн зарлаж, бие нь ноцтой муудсаны улмаас өлсгөлөнгөө зогсоосон.

           Алексей Навальный хамгийн сүүлд “Бүх зүйл сайхан байна” гэх утгатай захидал илгээснээс хойш сураггүй болсон. Одоогоор түүнийг ОХУ-ын Владимир мужийн Колчуниго хотын хорих ангид хорьж байгаа юм.

Даниш Сиддики

Өнгөрсөн долдугаар сард Афганистанд болсон мөргөлдөөнийг сурвалжилж байх үеэрээ амиа алдсан “Пулитцер”-ийн шагналт сэтгүүлч Даниш Сиддикиг 2021 оны онцлох 10 хүний нэгээр нэрлэж байна.

           Даниш Сиддики нь “Ройтерс” агентлагт 2010 оноос эхлэн фото сэтгүүлчээр ажиллаж, “Хонконгийн эсэргүүцэгчид”, “Рохинжагийн дүрвэгсэд”, “Афган, Иракийн дайн”, “Балба дахь газар хөдлөлт” сэтгүүл зүйн бүтээлүүдээ олон нийтэд хүргэж байснаас “Рохинжагийн дүрвэгсэд” бүтээлээ 2018 онд “Пулитцер”-ийн шагнал хүртэж байжээ. Тэрээр өнгөрсөн долдугаар сарын 15-нд Пакистан Улсын хилийн ойролцоох бүсэд Афганистаны аюулгүйн хүчнийхэн болон Талиба бүлэглэлийн хоорондын мөргөлдөөнийг сурвалжилж байхдаа амиа алдсан юм.

СОЁЛ УРЛАГ

The Weeknd

Канадын дуучин Weeknd буюу Абел МакКоннелл Тесфайегийн “Blinding Lights” дуу “Billboard” хөгжмийн жагсаалтын бүх цагийн хамгийн шилдэг дуу болсон билээ.

           “Blinding Lights” дуу “Billboard”-ын шилдэг 100 дууны жагсаалтад нийт 90 долоо хоногийн турш багтаж, 1960-аад онд хит болж байсан “The Twist” дууны амжилтыг эвдэж, бүх цаг үеийн шилдэг болсон байна.

           2019 оны арваннэгдүгээр сард цацагдсан “Blinding Lights” дуу 2021 оны арваннэгдүгээр сарын байдлаар “Youtube” хуудсанд 600 сая орчим үзэлттэй, “Spotify” сүлжээнд 2.5 тэрбум гаруй удаа тоглогджээ.

Энтони Хопкинс

Уэльсийн найруулагч, жүжигчин Энтони Хопкинс энэ онд хоёр дахь “Оскар”-ын шагналаа хүртэж, оны онцлох нэгэн боллоо.

           Энтони Хопкинс 1991 онд “The Silence of the Lambs” кинонд бүтээсэн Ханнибал Лектерийн дүрээрээ “Оскар”-ын шагнал хүртсэнээсээ хойш 30 жилийн дараа буюу энэ онд 83 насандаа “The Father” кинонд гол дүр бүтээж, “Оскар”-ын шагналыг хоёр дахь удаагаа хүртсэн юм.

СПОРТ

Момижи Нишия

Япон тэшүүрээр гулгагч, хамгийн залуу зуны олимпын аварга болсон 13 настай Момижи Нишияг 2021 оны онцлох хүнээр нэрлэж байна.

           Тэрбээр “Токио-2020” зуны олимпод шинээр нэмэгдсэн скейтбординг буюу дугуйт тэшүүрийн төрөлд нийт 15.26 оноо цуглуулан тэргүүлснээр хамгийн залуу олимпын аварга болсон юм. Түүхэн амжилт тогтоосныхоо дараа баярын сэтгэгдлээ хуваалцахдаа Момижи Нишия “Би ганц өөрийнхөө бус гэрийнхнийхээ ч хүслийг биелүүллээ” хэмээснээ “2024 оны олимпод түрүүлмээр байна” гэж олны анхаарлыг өөртөө татсан билээ.

Лионель Месси

17 жил хүчин зүтгэсэн Испанийн мэргэжлийн хөл бөмбөгийн “Барселона” клубээ орхисон Аргентины нэрт хөл бөмбөгч Лионель Месси “Парис Сент-Жермен” клубт элссэн даруйдаа бүх цаг үеийн шилдэг хөл бөмбөгч боллоо.

           Өдгөө 34 настай Лионель Месси энэ онд Испанийн “Барселона” клубын төлөө 28, Францын “Парис Сент-Жермен” клубын төлөө дөрөв, Аргентины шигшээ багийн төлөө найман гоол оруулж, “Копа Америк”-т түрүүлэхэд өндөр хувь нэмэр оруулснаа үнэлүүлж, оны шилдэг хөл бөмбөгч шалгаруулах наадмын тэргүүн дээд шагнал “Алтан бөмбөг”-ийн шагналын эзэн болсон. Тэрбээр өмнө нь 2009, 2010, 2011, 2012, 2015, 2019 онуудад оны шилдэг хөл бөмбөгчийн “Алтан бөмбөг” шагналыг хүртэж байв. Улмаар Лионель Месси “Алтан бөмбөг”-ийн шагналыг долоо хүртсэн анхны хөл бөмбөгч болж, бүх цаг үеийн шилдэг болсон юм.

Анна Щербакова

17 настай тэшүүрээр гулгагч олныг гайхшруулж, дэлхийн аварга болов.

           ОХУ-ын 17 настай уран гулгагч Анна Щербакова Шведэд болсон уран гулгалтын дэлхийн аварга шалгаруулах тэмцээний ганцаарчилсан төрөлд түрүүлж түүх бүтээлээ. Тэрбээр ганцаарчилсан төрлийн хоёр үзүүлбэртээ нийт 233.17 оноо авч, дэлхийн аварга болсон юм. Мөн тус тэмцээнд ОХУ түүхэндээ анх удаа алт, мөнгө, хүрэл медаль хүртсэн билээ.