БНПУ-ын Ерөнхийлөгч Анжей Дудагийн Монгол Улсад төрийн айлчлал өнөөдөр эхэлсэн. Тэрбээр Ерөнхийлөгч У.Хүрэлсүхтэй ганцаарчилсан уулзалт зохион байгуулж, харилцаа, хамтын ажиллагааны баримт бичигт гарын үсэг зурах ёслолд оролцоод байгаа юм. Тэгвэл Монголд төрийн айлчлал хийж байгаа Ерөнхийлөгч Анжей Дудаг уншигч танд танилцуулж байна.

-АНЖЕЙ ДУДА ГЭЖ ХЭН БЭ-

Анжей Дуда 2015 онд Польш Улсын Ерөнхийлөгчөөр сонгогдсон бөгөөд найм дахь жилдээ ажиллаж байгаа аж. Тэрбээр Ерөнхийлөгчөөр сонгогдохоосоо өмнө Польшийн парламентын Доод танхмын гишүүн, Европын парламентын гишүүнээр ажиллаж байжээ. Польшийн Ерөнхийлөгч Анжей Дуда нь хуульч мэргэжилтэй юм байна.

Тэрбээр 1972 оны тавдугаар сарын 16-нд төрсөн бөгөөд энэ жил 51 нас хүрнэ. Түүний аав шинжлэх ухаан, технологийн их сургуулийн профессор, өвөө нь Поль-Зөвлөлтийн дайн, дэлхийн II дайнд оролцож байсан ахмад цэрэг байжээ. Анжей Дуда  Собиескийн дунд сургуульд сурч, Ягеллонийн их сургуульд хуулийн зэрэг хамгаалсан байна. Улмаар 2001 онд Ягеллонийн их сургуулийн Хууль, удирдлагын факультетийн Захиргааны эрх зүйн тэнхимд туслахаар томилогдож, 2005 онд хууль зүйн ухааны докторын зэрэг хамгаалтлаа ажиллаж байжээ. Хууль зүйн ухааны доктор болсныхоо дараа Познань дахь боловсрол, удирдлагын коллежид багшилж байсан аж.

                       Ерөнхийлөгч Анжей Дуда их сургуулийн тэнхимийн туслахаар томилогдохоосоо өмнө Эрх чөлөөний холбоо намаас улс төрийн карьераа эхлүүлсэн ч тус нам 2000-аад оны эхээр татан буугджээ. Тэрбээр 2005 оны Польшийн парламентын сонгуулийн дараа Хууль ба шударга ёс намд элссэн бөгөөд 2006-2007 онд Польшийн Хууль зүйн яамны Төрийн нарийн бичгийн даргын орлогч, 2007-2008 онд төрийн шүүхийн гишүүнээр ажиллаж байв.

Лех Качински Ерөнхийлөгчөөр ажиллаж байх үед Анжей Дуда Ерөнхийлөгчийн Канцлерийн Төрийн нарийн бичгийн даргын орлогч байсан бөгөөд 2010 онд Варшав хотын захирагчийн сонгуульд Хууль ба шударга ёс намаас дэвшсэн ч сонгогдож чадаагүй аж. Харин 2011 онд болсон парламентын сонгуульд 79 мянга гаруй санал авч, парламентын Доод танхмын гишүүн болжээ. Улмаар Польшийн парламентын Доод танхимын гишүүнээр ажиллаж байгаад 2014 онд Европын парламентад сонгогдсон байна.

               Анжей Дуда 2015 онд наймдугаар сард Бүгд Найрамдах Польш Улсын Ерөнхийлөгчөөр сонгогдсон бөгөөд Ерөнхийлөгчийн сонгуульд Хууль ба шударга ёс намаас нэр дэвшиж, нийт саналын 34.7 хувь буюу 5.1 сая гаруй хүний санал авч, Польшийн төрийн тэргүүн болж байжээ.