АНУ-ын Элчин сайдын яамнаас өнгөрсөн нэгдүгээр сарын 27-нд хийсэн мэдэгдлээс хойш барууны орнууд Бүгд Найрамдах Турк Улсын нийслэл Истанбул хотод суух Элчин сайдын яамаа тодорхойгүй хугацаагаар хаахаар шийдвэрлэжээ. Тухайлбал, Герман, Нидерланд, Их Британи зэрэг орон Элчин сайдын яамаа хаахаар шийдвэрлэсэн нь Элчин сайдын яамд байрладаг, гаднын жуулчид ихээр зорчдог Таксим гудамжид төлөвлөсөн террорист халдлага явуулж болзошгүй гэж үзсэнтэй холбоотой аж.

БНТУ-ын Шударга ёс, хөгжлийн намын төлөөлөгч Өмер Челик өөрийн албан ёсны цахим хуудастаа “Манай оронд суух зарим орны Элчин сайдын яам, Ерөнхий консулын газар улсын аюулгүйн нөхцөл байдалд эргэлзсэн мэдэгдэл гаргаж байгааг бид харж байна. Энэ нь үл тоосон, хариуцлагагүй мэдэгдлүүд болсон бөгөөд бид үүнд хариуцлага хүлээхгүй” хэмээн мэдэгдсэн байна.

                                    АНУ-ын Элчин сайдын яамны мэдэгдлийн дараа буюу нэгдүгээр сарын 27-нд Франц, Герман, 29-нд Их Британийн Элчин сайдын яамнаас иргэддээ сэрэмжлүүлэг хүргүүлжээ. Мөн Франц Улсаас Истанбулд байрлах Пиерре Лоти ахлах сургуулийг хоёр өдрийн турш хаах, Швед Левентэд байрлах Ерөнхий консулын газрыг хааж, хоёрдугаар зэргийн өндөржүүлсэн бэлэн байдал зарласан бөгөөд барууны орнууд Истанбул хотын Бэйоглу, Галата, Таксим, Истиклалын гудамж зэрэг газраар зорчихгүй байхыг иргэддээ анхааруулж байна.

Д.ЭНХБИЛГҮҮН