Албан тушаалдаа сар гаруйн хугацаанд ажилласан Лиз Трасс огцорсноос хойш Их Британи Засгийн газрын тэргүүнээ "эрэн хайж", Британийн Консерватив намын Удирдах зөвлөл, парламентын хурал өнгөрсөн өдрүүдэд олон улсын анхаарлын төвд орлоо. Харин дэлхийд эдийн засгаараа тэргүүлэгч орнуудын нэг БНХАУ-ын даргыг сонгох Хятадын Коммунист намын 20 дугаар их хурал болж, Ши Жиньпин дахин сонгогдсон нь дэлхийн улс төрд өрнөсөн онцлох үйл явдал болсон. Их гүрнүүдийн төрийн тэргүүн солигдож, бүрэн эрхийн хугацаагаа дахин баталгаажуулаад байгаа энэ үед Зүүн Европт ОХУ, Украины асуудал дахин газар авч, дайн болж болзошгүй тухай олон улсын байгууллагууд анхааруулж байгааг уншигч та бүхэнд тоймлон хүргэж байна.

-БНХАУ-ЫН ТҮҮХЭНД ГУРАВ ДАХЬ УДААГАА ДАРГААР СОНГОГДСОН ШИ ЖИНЬПИН-

Хятадын Коммунист намын 20 дугаар их хурал нийслэл Бээжин хотод болж, өнгөрсөн ням гарагт өндөрлөсөн. Тус хурлаар Ши Жиньпин дахин ХКН-ын Ерөнхий нарийн бичгийн даргаар сонгогдож, бүрэн эрхийнхээ хугацаанд гурав дахь удаагаа БНХАУ-ын даргаар ажиллах буюу Мао Зэдунаас хойших хамгийн хүчирхэг удирдагч болж байгааг гаднын хэвлэлүүд онцолж байна. Мөн Ши Жиньпин ХКН-ын Улс төрийн товчооны Байнгын хорооны гишүүдээ зарласан юм.

Ирэх таван жилд Ши Жиньпиний хамт БНХАУ-ыг удирдах бүрэлдэхүүнд Шанхай хотын Коммунист намын хорооны дарга, 63 настай Ли Чиан багтсанаар гуравдугаар сард албан тушаалаа өгөх Ерөнхий сайд Ли Көцианийг залгамжлах нь тодорхой болсон байна. Түүнчлэн Ши Жиньпиний Тамгын газрын дарга Динь Шуэшянь, Бээжингийн Намын хорооны дарга Цай Чи, Гуандуны Намын хорооны дарга Ли Ши нарын улс төрчид шинэ бүрэлдэхүүнд багтжээ.

                        Харин Ши Жиньпиний бодлогын хэрэгжилтэд голлох үүрэгтэй оролцсон Сахилга, хяналтын төв хорооны дарга Жао Лэжи, намын Хэрэг эрхлэх газрын дарга Ван Хунин нар Байнгын хорооны гишүүн хэвээр үлдсэн байна.

-РИШИ СУНАК ИХ БРИТАНИЙН ЕРӨНХИЙ САЙД БОЛНО-

Их Британи Засгийн газрын тэргүүнээ "эрэн хайсан" өдрүүд өчигдрийн Британийн Консерватив намын Удирдах зөвлөлөөр дуусгавар болов. Лиз Трасс огцорсны дараа парламент дахь Торигоор гурван хүн Ерөнхий сайдад санал болгосны нэг нь Ерөнхий сайд асан Борис Жонсон. Гэсэн ч Борис Жонсон “Дахин Ерөнхий сайдын албан тушаалд очихгүй” тухайгаа мэдэгдсэнээс хойш Засгийн газрын тэргүүний өрсөлдөөн Риши Сунак, Пенни Мордаунт нарын дунд өрнөсөн аж.

Тэгвэл Британийн Консерватив намын Удирдах зөвлөлийн хурлаар Энэтхэг гаралтай парламентын гишүүн Риши Сунакыг Ерөнхий сайдад батламжилсан. Харин түүний өрсөлдөг Пенни Мордаунт парламентын гишүүдээс хангалттай санал аваагүй гэх шалтгаанаар ялагдал хүлээсэн байна.

                   Өдгөө 42 настай Риши Сунак нь Оксфордын их сургуульд дээд боловсрол эзэмшсэн, хинду шашинтай нэгэн. Тэрбээр 2015 онд парламентын доод танхимын гишүүнээр сонгогдож, 2020 онд Сангийн яамны сайдын үүрэг гүйцэтгэсэн бөгөөд энэ оны долдугаар сарын эхээр тэрээр энэ албан тушаалаасаа огцорч, дараа нь Консерватив намын удирдагчийн сонгуульд оролцсон ч Элизабет Трасст ялагдсан юм. Энэтхэгийн тэрбумтны хүргэн Риши Сунак Их Британийн түүхэн дэх анхны ази гаралтай Ерөнхий сайд бөгөөд сүүлийн 100 гаруй жилийн хугацаан дахь Их Британийн хамгийн залуу Ерөнхий сайд болно. Түүнийг ирэх долоо хоногт III Чарльз хаан батлах юм.

-УКРАИН "ОРОСЫГ ХАШРААНА" ГЭСЭН МЭДЭГДЭЛ НҮБ-Д ХҮРЧЭЭ-

Украины нэр бүхий улстөрчид "Оросыг хашраана" гэсэн утгатай мэдэгдэл хийсэн талаар өчигдөр ОХУ-ын төлөөлөгчид мэдээлсэн. Тэгвэл "Reuters" агентлагийн шинэ мэдээллээр Украины тал ОХУ-д цацраг идэвхт бодисоор хордуулдаг зэвсэг ашиглах гэж байгаа гэнэ. ОХУ, Украин төдийгүй олон улсын анхаарлыг татан байгаа цацраг идэвхт бодисоор хордуулдаг шинэ төрлийн зэвсэг нь массын хөнөөл учруулж болзошгүй бөгөөд уг асуудлаар ОХУ-ын тал НҮБ-д мэдэгдэж, өнгөрсөн өдөр НҮБ-ын Аюулгүйн зөвлөл шуурхай хурал хийсэн байна.

НҮБ-ын Аюулгүйн зөвлөлийн шуурхай хуралд 15 орны төлөөлөгч оролцсон бөгөөд хаалттай түвшинд болсон. Хурлаар юу хэлэлцэж, ямар шийдвэрт хүрсэн тухай мэдээлэл одоо ч олон нийтэд ил болоогүй байгаа юм. Мөн гаднын зарим хэвлэлийн сануулж буйгаар өнгөрсөн хоёрдугаар сард ОХУ-ын нэрлээд байгаа цэргийн тусгай ажиллагаа эхэлснээс хойш НҮБ-ын Аюулгүйн зөвлөл хэд хэдэн удаа уг асуудлаар хуралдсан ч, ОХУ-д хориг арга хэмжээ аван өндөрлөж байгаа юм байна. Харин шинэ төрлийн зэвсгийн талаар ОХУ-ын тагнуулаас Украин хоёр ч үйлдвэртээ хийж эхлээд буйг анхааруулжээ.