Умард Ирланд, Их Британийн Нэгдсэн Вант Улсын хатан хаан II Элизабет нас бараад гурван хоног өнгөрч байна. Хатан хаан II Элизабет Шотландын хойд нутагт орших Балморалын ордонд өөд болсон талаар Букингемийн ордноос мэдээлснээр II Элизабетийн ууган хүү хунтайж Чарльз 73 насандаа хаан ширээнд сууж байгаа юм.

-70 ЖИЛИЙН ТУРШ АНГЛИЙН ХАТАН ХААНЫ ШИРЭЭНД СУУСАН II ЭЛИЗАБЕТ-

Хатан хаан II Элизабет 1926 оны дөрөвдүгээр сарын 21-нд Йоркийн гүн болон гүнгийн авхай нарын гэр бүлд төржээ. Багадаа гэрийнхэн нь өхөөрдөж Лилибэт хэмээн дууддаг байсан II Элизабет 1936 онд VIII Эдвард хаан ширээнээсээ бууж, түүний аав VI Жорж хаан ширээг залгамжлахад гүнж болсон байдаг.

                 II Элизабетын бага нас ордноос гаралгүй өнгөрсөн бөгөөд багш хөлсөлж, боловсрол эзэмшсэн гэдэг. Харин дэлхийн II дайн эхлэх үеэр Элизабет гүнж дайны төлөө үйл хийхээр эмэгтэйчүүдийн нутаг дэвсгэрийн туслах албан эмнэлгийн машины жолооч болж, таван сар цэргийн алба хааж, дайны үеийн нийгмийн ажилд тусалж байв. Эцэг VI Жоржийнх нь бие муудах үеэр нийгэм, төрийн ажилд өөрийгөө дайчлан Канад, АНУ, Кени Улсаар ажиллаж, амьдарч байсан гэдэг. Харин Жорж хаан 1952 оны хоёрдугаар сарын 6-нд нас барахад II Элизабет Кени Улсаас Лондонд хүрч, 1952 оны хоёрдугаар сарын 8-нд тангараг өргөж, хаан ширээг залгамжилжээ. Тухайн үед Хамтын нөхөрлөлийн тэргүүн, Их Британи, Канад, Австрали, Шинэ Зеланд, Өмнөд Африк, Пакистан, Цейлон гэсэн долоон улсын хатан хаан болсон гэдэг. 25 насандаа хатан хаан болсон II Элизабет 70 жил 214 өдөр хаан ширээнд сууж, дэлхийн түүхэнд хаан ширээнд хамгийн удаан суусан эмэгтэй удирдагч болсон юм.

-II ЭЛИЗАБЕТЫГ ОРЛОХ IIII ЧАРЛЬЗ ХААН-

Хатан хаан II Элизабет өөд болсноор түүний ууган хүү III Чарльз хаан ширээг өвлөж авсан. Ингэснээр III Чарльз хаан Британийн хаан ширээг залгамжилж байгаа түүхэн дэх хамгийн өндөр настай хаан болж байгаа юм.

                 III Чарльз хаан 1948 оны арваннэгдүгээр сарын 14-нд тухайн үеийн Эдинбургийн гүнж байсан II Элизабет, Эдинбургийн гүн Филипп нарын анхны хүүхэд болон мэндэлсэн. Чарльз хаан багадаа аавынхаа сурч байсан Чеам, Гордонстоуны сургуульд сурч, урлагийн боловсрол эзэмшсэн. Харин ээжийгээ хатан хаан болсны дараа хатан хааны агаарын болон тэнгисийн цэргийн хүчинд алба хааж байв. Хатан хаан II Элизабетыг өөд болсон өдөр Лондон дахь Гэгээн Жеймсийн ордонд нууц зөвлөл хуралдаж, III Чарльзыг хаанд өргөмжилжээ.

-ХААНЫ АЙЧЛАЛ БА ХАТАН ХААНЫГ ОРШУУЛАХ ЁСЛОЛ-

Хатан хаан II Элизабетыг оршуулах ёслолыг есдүгээр сарын 19-ний дараа гарагийн 11:00 цагт төвлөсөн. Оршуулах ёслолыг Вестминстерийн сүмд хийх юм. Харин одоогоор хатан хааны цогцсыг Балморал шилтгээний цэнгэлдэх хүрээлэнд Шотландын хааны гэх царс модон авс дотор байлгаж байгаа юм байна.

                 Харин хаан ширээг залгамжилсан III Чарльз хаан шинэхэн Ерөнхий сайд Лиз Трассын хамт хатан хааныг оршуулах ёслолоос өмнө Британийн гурван улсаар дамжих айлчлалын тов гаргажээ. Чарльз хаан, Ерөнхий сайд Трасс нарын айлчлал өнөөдрөөс эхлэн Шотланд, мягмар гарагт Умард Ирланд, баасан гарагт Уэльсээр үргэлжлэх гэнэ.