ТРАМП: БАЙДЕН БОЛ УЛСЫН ДАЙСАН

Холбооны мөрдөх товчооноос Флорида дахь гэрт нь нэгжлэг хийснээс хойш анх удаа олон нийтэд мэдэгдэл хийсэн АНУ-ын Ерөнхийлөгч асан Дональд Трамп одоогийн Ерөнхийлөгч Жо Байденыг “Улсын дайсан” хэмээн зарлав.

                              Трамп өчигдөр Пенсильвани мужийн Вилкс-Барре хотод дэмжигчидтэйгээ уулзаж, үг хэлсэн. Энэ үеэрээ “Америкийн түүхэн дэх аль захиргаа эрх мэдлээ ингэж урвуулан ашиглаж байгаагүй. Холбооны мөрдөх товчоо эсрэг зогсож байна” гэжээ.

Өдгөө 76 настай Дональд Трамп өнгөрсөн сард Холбооны мөрдөх товчооний үйл ажиллагааг шүүмжилсэн хоёр цаг орчмын илтгэл тавьсан. Эх сурвалжууд Холбооны мөрдөх товчоо Трампын гэрт нэгжлэж хийж, нууцын зэрэглэлтэй маш олон хоосон хавтас, оффисоос нь нууц баримт олсон гэж мэдээлж байна. Тэгвэл одоо Дональд Трамп АНУ-ын Хууль зүйн яамыг шүүхэд өгч, “дайн” зарлаж байгаа гэнэ.

-АНУ ЗАДАРЧ БОЛЗОШГҮЙ ГЭВ-

АНУ-ын Ерөнхийлөгчөөр Жо Байден сонгогдсоноос хойш тус улсын засаг захиргаа, Конгрессын танхим шинэ, хуучин Ерөнхийлөгчийнх гэж хоёр хуваагдаад байгаа талаар олон улсын хэвлэлүүд мэдээлж байгаа. Конгрессын хуралд Трампын бүлэг нөгөө талаа Афганистанд бууж өгсөн, Украинд зэр зэвсгээр туслаж байгааг буруутгаж байгаа бол, Байдены талаас Трампын бодлого “Ардчиллыг үгүй хийж байсан” гэдэг.

Ерөнхийлөгч Жо Байден ч өөрийн албан ёсны мэдэгдэлдээ “Трамп ардчилал гэж мэдэхгүй. Тэр сэтгэцийн асуудалтай нэгэн” гэж хэлж байлаа. Тэгвэл саяхан нэгэн агентлагийн судалснаар Дональд Трамп сонгогдохоос өмнө дэлхийн 150 орчим ардчилсан орон байсан бол түүнийг төрийн тэргүүнээс буухад 110 болтлоо буурсан гэнэ.

                              Харин Трампын зүгээс Холбооны мөрдөх товчоо төдийгүй хэвлэлийнхэн ч Жо Байденд ажиллаж, өөрийнх нь эсрэг босож байгаа гэж мэдэгдээд байна. Дональд Трамп өнгөрсөн тавдугаар сард нэгэн сэтгүүлчийн асуултад "Жо Байден бол гэмт хэрэгтэн бөгөөд тэр гэмт хэрэгтэн болоод удаж байна. Чи ч гэсэн гэмт хэрэгтэн, хэвлэл мэдээллийнхэн ч бас үүнийг нуун дарагдуулсан гэмт хэрэгтэн" гэсэн юм.

Мөн экс Ерөнхийлөгч Дональд Трамп долдугаар сард Вашингтонд тавьсан илтгэлдээ АНУ энэ хэвээр үргэлжилбэл ЗХУ шиг задарч болзошгүй анхааруулж байв.

-ТРАМП, БАЙДЕН ХОЁР ДАХИН ТУЛНА-

Ирэх арваннэгдүгээр сард АНУ-ын Конгрессын сонгууль болно. Харин үүний дараа болох Ерөнхийлөгчийн сонгуульд Жо Байден дахин хүч үзэх гэнэ. Ингэхдээ 2024 онд АНУ-ын Ерөнхийлөгч асан Дональд Трамптай дахин өрсөлдөх нөхцөл байдал үүсэж магадгүйг тэрбээр тодотгожээ. Хэдий тийм боловч АНУ-ын Ардчилсан намыг дэмжигчдийн дийлэнх нь Жо Байденаас өөр улс төрчийг нэр дэвшээсэй гэж хүсэж байгааг санал хураалтууд харуулж байна.

                              Жо Байден гадаад бодлого, эдийн засагт гаргасан амжилтдаа сэтгэл хангалуун байгаа бөгөөд энэ утгаараа дахин нэр дэвшихээр бэлтгэж байгаа гэж эх сурвалжууд мэдээлжээ.