АНУ-ын олон хотод өнгөрсөн амралтын өдөр галт зэвсгийн хэрэглээг хязгаарлах, хяналтыг чангатгахыг шаардсан жагсаал болсон. Тус улсад галт зэвсгийн хэрэглээ гарч, өнгөрсөн сард Техас мужийн бага сургуульд зэвсэгт халдлагын улмаас бага насны 19 хүүхэд, хоёр багш амиа алдаж, Нью-Йорк хотын томоохон дэлгүүрт болсон халдлагад Африк-Америк гаралтай 10 хүн амиа алдсан юм.Энэ зэрэг олон шалтгаанд тулгуурлан иргэд галт зэвсгийн эсрэг хатуу арга хэмжээ авах шахалт улстөрчдөд үзүүлж, өчигдөр АНУ-ын Сенат дахь хоёр намын төлөөлөгч Галт зэвсгийн хэрэглээг хязгаарлах, хяналтыг чангатгах хуулийн төсөл хамтран боловсруулж, өргөн барьжээ. Тус хуулийн төсөлд 21 хүртэлх насныханд галт зэвсэг худалдахдаа өндөр шалгуур тавьдаг болох, галт зэвсгийн хууль  бус наймааг хориглох, мужуудын галт зэвсгийн хэрэглээнд хяналт тавих чадавхыг нэмэгдүүлэх зэрэг арга хэмжээг тусгасан байна.

Хоёр намын сенатын гишүүдийн хамтран боловсруулсан хуулийн төслийг АНУ-ын Ерөнхийлөгч Жо Байден сайшааж, эл хуулийн төслийг яаралтай хэлэлцэж, дэмжихийг уриалжээ. Гэсэн ч шинэ хуулийн төсөл галт зэвсэгтэй тэмцэхэд хангалтгүй гэсэн байр сууриа илэрхийлж, “Байлдааны зориулалттай галт зэвсгийн худалдааг бүрэн хориглож, худалдан авагчийн насны босгыг өндөр болгох зэрэг илүү эрс арга хэмжээ авах хүсэлтэй байгаа”-гаа мэдээлсэн байна.

Тэгвэл Ардчилсан намын олонх болдог Төлөөлөгчдийн танхим галт зэвсэг худалдан авагчийн насны босгыг 18-аас 21 нас болгох хуулийн төслийг дэмжиж байсан ч, Сенатад авах шаардлагатай саналынхаа 60 хувийн босгыг давж чаддаггүй байсан аж. Харин энэ удаад хоёр намын сенатын гишүүдийн хамтран боловсруулсан дээрх хуулийн төсөл дэмжигдэх магадлал өндөр байгааг хэвлэлүүд мэдээлж байна.

ЭХ СУРВАЛЖ:BBC