ОХУ-ын Ерөнхийлөгчийн 2001 оноос хойш уламжлал болсон жил бүр иргэдтэйгээ утсаар холбогдож, асуултад нь хариулдаг “Прямая линия с Владимиром Путиным” телевизийн шууд нэвтрүүлэг 18 жилийн дараа анх удаа цуцлагджээ.

Лхагва гарагт сэтгүүлчидтэй уулзахдаа Кремлийн хэвлэлийн төлөөлөгч Дмитрий Песков энэ жилийн шууд ярилцлага тодорхойгүй хугацаагаар хойшилсныг мэдээлсэн ч шалтгааныг тайлбарлаагүй байна.

Сүүлийн үед Путин жил бүр оролцдог байсан хэд хэдэн үйл ажилгаагаа дайны улмаас алгасаад байгаа аж.

Тухайлбал жил бүр ОХУ-ын Холбооны Зөвлөлд хандаж үг хэлдэг арга хэмжээ нь дөрөвдүгээр сард болох байсан ч тодорхойгүй хугацаагаар хойшлогдон одоо болтол шинэ тов зарлагдаагүй байна. Өнгөрсөн сард тэр Сочи хотод жил бүр болдог мөсний хоккейн тэмцээндээ оролцох ёстой байсан ч бас л оролцолгүй өнгөрчээ.

Уламжлал болсон үйл явдлууддаа оролцолгүй өнгөрсөн нь түүний биеийн эрүүл мэндтэй холбоотой байж болзошгүй гэсэн таамаг яригдаж байна.

“Прямая линия с Владимир Путиным” шууд нэвтрүүлэгт жил бүр 2-3 сая хүн утсаар холбогдож, ерөнхийлөгчөөсөө асуулт асууж, хариулт авдаг уламжлалтай. Өнгөрсөн онд болсон энэхүү шууд ярилцлага дөрвөн цаг гаруй хугацаанд үргэлжилж байжээ.

ЭХ СУРВАЛЖ:YAHOO NEWS