ОХУ-аас Украин Улсад цэргийн тусгай ажиллагаа эхэлснээс хойш хоёр долоо хоногийн хугацаа өнгөрлөө. Энэ хугацаанд Оросын арми Украины томоохон муж, хот руу халдаж, олонх хотыг гадна цэргийн хүчээ байршуулж, байнгын цэргийн эрхшээл дунд байлгаж байгаа талаар олон улсын хэвлэлүүд мэдээлж байна.

           Хоёр орны дунд тулаан эхэлсний дараа ОХУ-ын Батлан хамгаалах яамнаас “Энгийн иргэдэд аюул учруулахгүй” гэж мэдэгдэж байсан. Тэгвэл уг асуудлаар “Newsweek” сэтгүүл Украины Гадаад хэргийн сайд Дмитрий Кулебагаас тодруулахад “Хоёр орны мөргөлдөөнд 1424 энгийн иргэн өртсөнөөс 516 нь амиа алдаж, 908 иргэн шархадсан” тухай мэдээлжээ.

           ОХУ-ын цэргийн тусгай ажиллагааны эсрэг сөрж, тулалдсан Украины армийн довтолгоонууд “амжилттай” болж, 49 онгоц, 81 нисдэг тэрэг, долоон нисгэгчгүй онгоц, 317 танк, 1070 хуягт, 120 их буу, 56 пуужин харвагч, 482 машин, гурван завь, 28 зенитийг устгасан байна. Мөн “CBS News” агентлагт ирүүлсэн эх сурвалжийн мэдээллээр мөргөлдөөний үеэр ОХУ-ын 5000 гаруй цэрэг амиа алдаж, 15 мянга гаруй цэрэг шархадсан аж.

-ОХУ, УКРАИНЫ МӨРГӨЛДӨӨНИЙ ЦААД “ГЭМТЭН” НЬ БНХАУ ГЭВ-

          “Бээжин-2022” өвлийн олимпын наадам эхлэхээс өмнө буюу өнгөрсөн хоёрдугаар сарын 4-нд БНХАУ-ын дарга Ши Жиньпин, ОХУ-ын Ерөнхийлөгч Владимир Путин нар Олон улсын дэг журмыг өөрчлөх тухай мэдэгдэл хамтран гаргасан. Тэгвэл тус мэдэгдлээ гаргахаас өмнө зохион байгуулсан уулзалтаар БНХАУ, ОХУ-ын удирдагчид харилцан тохиролцож, хэдэн сарын турш цэргээ Украины хилд хуарагнуулж байсан оросууд өвлийн олимп дууссаны дараа цэргийн хүчээ Украин руу оруулах, Оросын цэргүүдийн дайралтад БНХАУ-аас дэмжлэг үзүүлэхээр тохиролцсон байж болзошгүйг Брукингсийн хүрээлэнгийн Гадаад бодлогын хөтөлбөрийн ахлах мэргэжилтэн Райн Хасс ОХУ, Украины асуудлаар бичсэн тоймдоо онцолжээ.

           Тухайлбал, БНХАУ нь өнгөрсөн сард “Бээжин-2022” өвлийн олимпын наадмыг зохион байгуулснаар өвөл, зуны хоёр олимпын наадмыг эх орондоо зохион байгуулсан анхны орон болсон. Дэлхийн түүхэнд бичигдэж үлдэх уг амжилтад хүрэхийн тулд БНХАУ 2021 оны II хагасаас бэлтгэж, цар тахлыг ногоон түвшинд барьж чадаагүй хөрш орнуудын эсрэг хилээ хааж байв. Түүхэнд үлдэх өвлийн олимпын наадмыг зохион байгуулахын тулд ОХУ цэргүүдээ Украин руу оруулж, олон улсын хэмжээний “асуудал” тариулахыг хүсээгүй БНХАУ-ын талаас олимп дууссаны дараа Украин руу цэргээ оруулахад нь тусламж үзүүлэхээр тохиролцсон байж болзошгүй аж.

Ардчилал болон авторитаризмын хоорондын үзэл суртал дахь нийтлэг ойлголтоор зарим олон улсын шинжээч БНХАУ, ОХУ-ыг дайснууд гэж үзэх нь бий. Гэсэн ч олон удаагийн уулзалт, айлчлал, дипломат харилцаагаараа хоорондоо “үй зайгүй” гэдгээ баталсан ОХУ, БНХАУ хоёр хоорондоо ярьж, тохиролцсон байж болзошгүй “нууц гэрээ” нь өдгөө олон улсын бүх шатны системд асар их нөлөө үзүүлж байна.

           Украинд явуулж байгаа ОХУ-ын цэргийн тусгай ажиллагааны “далд дэмжигч” гэж цоллуулаад байгаа БНХАУ үүсээд байгаа нөхцөл байдалд төвийг сахисан байр суурьтай байгаагаа илэрхийлсээр байна. Хэвлэлүүдээр түгж байгаа мэдээллийг Бээжингээс үгүйсгэж, БНХАУ-ын Гадаад хэргийн яамны хэвлэлийн төлөөлөгч Ван Вэнбин “Энэ бүрэн НАТО-гийн өдөөн хатгалгын үр дүн. Үүнээс үүдсэн асуудал дахь Москвагийн байр суурь бидний санааг зовоож байна” гэжээ.

“ДЭЛХИЙН ОРНУУДЫН ОХУ-ЫН ЭСРЭГ ЭДИЙН ЗАСГИЙГ БҮРЭН ХОРИГЛОЖ ЧАДАХГҮЙ”

Хоёр орны хооронд мөргөлдөөн эхэлснээс хойш олон улс ОХУ-ын эсрэг хориг арга хэмжээ авч, нэр бүхий албан тушаалтнуудын хөрөнгийг царцаасан. Тэгвэл энэ долоо хоногт Европын холбооноос Оросын томоохон банкнуудыг SWIFT-ээс хасах шийдвэр хэрэгжиж эхлэхтэй зэрэгцэн АНУ-аас ОХУ-ын газрын тос, байгалийн хийн импортыг хориглосон юм.

           ОХУ-ын олон улсын худалдаа, гүйлгээг хориглохын тулд Европын холбооноос ОХУ-ын зургаан банкийг олон улсын төлбөрийн систем буюу SWIFT-ээс хассан. Үүнд:

• VTB банк
• Otkritie FC банк
• Новикомбанк
• Promsvyazbank
• Россия банк
• Sovcombank
• VEB банк зэрэг ОХУ-ын долоон банк SWIFT системээс салж байгаа банкуудын тоонд багтаж байна.
• 

Өнөөгийн байдлаар дэлхийн 200 гаруй орны 11 мянга гаруй банк, санхүүгийн байгууллагыг холбодог SWIFT системээр өдөрт дунджаар 32 сая гүйлгээ/мессеж/ хийдэг. 2022 оны байдлаар ОХУ-ын гүйлгээний банкнуудын 70 хувийг SWIFT системтэй банк эзэлдэг аж.

Харин ОХУ-ыг энэ хүнд нөхцөл байдлаас гаргах “аврагч” нь БНХАУ байх талаар шинжээчид мэдээлж байна. Тэгвэл Европын холбооноос ОХУ-ын эсрэг тавсьан SWIFT-ийн хоригийг тойрч гарах боломжийг БНХАУ олговол БНХАУ-ын ч эсрэг хориг арга хэмжээ авах хуулийн төсөл боловсруулж байгаа талаар АНУ-ын Сенатын танхим дахь Бүгд найрамдах намын гишүүн Марко Рубио мэдэгджээ.

           Мөн АНУ-аас ОХУ-ын эсрэг тавьсан газрын тос, байгалийн хийн импортын хоригийг ХБНГУ-ын талаас эсэргүүцэж байна. “Politico” мэдээллийн агентлагт Герман Улсын канцлер Олаф Шольцийн АНУ-аас ОХУ-ын эсрэг тавьсан хоригийг эсэргүүцэж байгаа мэдэгдэлд “НАТО хүчээр Европоос ОХУ руу нийлүүлэх газрын тос, байгалийн хийг хааж, боогдуулж байна” гэжээ.