Беларусийн хилд болсон ОХУ, Украины хоёр талын төлөөлөгчдийн уулзалт, хэлэлцээр амжилтад хүрсэнгүй. Таван хоногийн турш үргэлжилж байгаа ОХУ, Украины мөргөлдөөнийг “Дэлхийн III дайны эхлэл болно” гэж шинжээчид мэдэгдэж байгаа. Олон улсаас Украинд санхүү, хүмүүнлэгийн тусламж үзүүлэхээс гадна ОХУ-д ч тусалж, дэмжиж байгаа хэд хэдэн орон бий. Уншигч та бүхэнд ОХУ, Украины мөргөлдөөн болон түүнд хандах дэлхийн орнуудын байр суурийг тоймлон хүргэж, хэн нь хэний найз, дайсан болох зангилааг тайлах гэж хичээе.

АНУ

          АНУ-ын Ерөнхийлөгч Жо Байден Украинд дэмжлэг үзүүлнэ гэдгээ илэрхийлж, НАТО-гийн орнуудтай хамтарч, Оросын цэргийн эсрэг хариу өгөхөө мэдэгдсэн. Улмаар АНУ-аас ОХУ-ын банк, томоохон уул уурхайн компаниудын хөрөнгийг царцааж, албан тушаалтнуудад хориг тавьсан. Ингэхдээ ОХУ-ын Ерөнхийлөгч Владимир Путины Америк дахь хөрөнгийг царцаажээ.

          Гэсэн ч мөргөлдөөн эхлэхээс өмнө Украинд хамгийн их туслалцаа үзүүлэхээр ярьж, дэмжиж байсан АНУ-ын талаас Украин руу цэрэг явуулж, батлан хамгаалахын туслалцаа үзүүлэхгүй байх шийдвэр гаргасан. АНУ-ын Ерөнхийлөгч Жо Байден ОХУ, Украины асуудлаар хийсэн мэдэгдэлдээ "Дайралтын улмаас учрах хагацал, сүйрлийн хариуцлагыг зөвхөн ОХУ хүлээнэ. АНУ болон түүний холбоотнууд, түншүүд нэгдсэн бөгөөд тэдний эсрэг шийдэмгий байдлаар хариу арга хэмжээ авах болно” гэж мэдэгдээд байгаа. ОХУ-ын цэргийн тусгай ажиллагаа эхлэхээс өмнө тус улсын Батлан хамгаалахын сайд Сергей Шойгу "АНУ болон НАТО-д анхааруулга өгсөн" гэж мэдэгдсэн. Энэ тухай Генерал Чарльз Аби Надер “АНУ болон бусад барууны орон олон улсын нөхцөл байдлыг зориудаар хүндрүүлж, Украин, ОХУ-ын асуудлыг ашиглаж, өөрсдийн талд эргүүлж байна” гэж онцолсон байдаг. Албаныхны мэдэгдсэнээр нөхцөл байдлыг илүү хүндрүүлсэн байж болзошгүй АНУ-ын талын одоогийн байр суурь хангалтгүй байгаа бөгөөд "Украиныг Сирийн араас оруулах нь" гэж зарим орны удирдагч, шинжээчид Жо Байденыг шүүмжилж байна.

НАТО

          Украин Улс сүүлийн жилүүдийн турш НАТО-гийн гишүүнээр элсэх хүсэлт удаа дараа гаргасан ч, амжилтад хүрээгүй. Барууны холбооны орнууд олон жил “НАТО холбоо шинэ гишүүн орнуудад нээлттэй байх үүрэгтэй” гэж мэдэгдээд байгаа ч, ОХУ-ын талаас шахалт хийж, Украиныг НАТО-д элсүүлэхгүй байсан байж болзошгүй талаар олон улсын шинжээчид онцолж байгаа. Өнгөрсөн сард Украины талаас ОХУ-ын төлөөлөгчидтэй уулзалт хийх хүсэлт хүргүүлж, уулзалтдаа хэд хэдэн орны төлөөлөгчийн уриад байсан. Тус уулзалт амжилттай болсон бол Украиныг НАТО-д элсүүлэх асуудал нэг тийш болох байж. Мөн тухайн үед Украины Гадаад хэргийн сайд Дмитрий Кулеба ч энэ тухайд “Манай оронд байгаа ганц найдвар бол НАТО” хэмээн мэдэгдэж байлаа. Гэсэн ч хоёр талын болон бусад орны төлөөлөгч ирээгүй учир тус уулзалт үр дүнд хүрээгүй юм.

          Тэгвэл таван өдрийн өмнөөс явуулсан Оросын цэргийн тусгай ажиллагааны талаар НАТО-ийн Ерөнхий нарийн бичгийн дарга Йенс Столтенберг “Тоо томшгүй олон энгийн иргэний амийг эрсдэлд оруулж байна” гэж шүүмжилж байгаа. НАТО-гоос хуурай газрын болон агаарын хүчин мөн түүнчлэн тэнгисийн хүчээ нэмэгдүүлж эхэлсэн гэх мэдээлэл байгаа ч, Украинд батлан хамгаалахын туслалцаа үзүүлэх шийдвэрээ нэг тийш болгож чадалгүй хүлээлтийн түвшин байгаа аж.

ГЕРМАН

Германы канцлер Олаф Шольц “Украины аймшиг, Европын хар өдөр тохиож байгаа"-г мэдэгдээд байгаа. Герман Улсаас олон улсын анхаарлыг хамгийн их татсан хориг арга хэмжээ авсан нь “Хойд урсгал-2” төслийг царцаасан хориг. Тухайлбал, өнгөрсөн хэдэн жилийн турш оросуудын “мөрөөдөл” болсон тив дамнуулан байгалийн хий дамжуулах хоолой бүтээх “Хойд урсгал-2” төслийг царцаасан талаар мөн Герман Улсын канцлер Олаф Шольц мэдэгдсэн юм. "Хойд урсгал-2" төсөл Герман, Орос Улсын худалдаа, эрчим хүчний харилцаагаа өргөжүүлэх зорилготой ОХУ-аас Герман руу байгалийн хий тээвэрлэх зорилготой 11 тэрбум ам.долларын өртөг бүхий томоохон хэмжээний төсөл байв.

ХБНГУ-ын албаныхны мэдээлж байгаагаар тус улсын "Их долоо", НАТО, Европын холбоотой хамтарч,  хориг арга хэмжээг зохицуулах, аюулгүй байдлын хэмжээг бууруулах чиглэлээр хамтран ажиллаж байгаа юм

ЕВРОПЫН ХОЛБОО

Европын холбооноос ОХУ-ын нэр бүхий албан тушаалтнуудад хориг арга хэмжээ авч, Украинд санхүүгийн болон хүмүүнлэгийн тусламж үзүүлэхээ мэдэгдсэн. Ингэхдээ Европын холбоо ОХУ-ын Ерөнхийлөгч Владимир Путин, Гадаад хэргийн сайд Сергей Лавров нарын хөрөнгийг царцааж, тус холбооны хоригийн жагсаалтад нэрсийг нь бүртгүүлсэн байна. Мөн Европын холбооны удирдагчид Оросыг шүүмжилж, “Европт эргэн дайныг авчирлаа” гэж тодотгон Москвагийн эсрэг шинэ хориг арга хэмжээ авахаа амласан.

Улмаар Европын холбоо “Russia Today”, “Sputnik” тэргүүтэй ОХУ-ын хэвлэл мэдээллийн агентлаг, нисэх онгоцнуудад хориг тавив. Тэгвэл Европын холбооны удирдагчид ээлжит хурлаараа дахин нэг хориг арга хэмжээ авсан нь Кремлийн хэвлэлийн төлөөлөгч Песков болон өөр 26 албан тушаалтан, нэг компанийг холбооны хар жагсаалтад оруулжээ.