ОХУ-ын нийслэл Москва хотод 20 дахь удаагаа зохион байгуулж “Russian Energy Week” зөвлөгөөнд ОХУ-н Ерөнхийлөгч Владимир Путин оролцож, хэд хэдэн сэдэвт өөрийн байр сууриа илэрхийлжээ. Олон улс дахь зөрчил болон тус улсаас Европын холбооны орнуудад нийлүүлэхээр болсон шатдаг хийн экспортын талаар хэлсэн түүний байр суурийг хөрвүүлэн хүргэж байна.

          “Russian Energy Week” зөвлөгөөний эхлэлд ОХУ-ын Ерөнхийлөгч Владимир Путин шатдаг хийн экспортын талаар байр сууриа илэрхийлжээ. Тэрбээр “ОХУ Европын холбооны орнуудад нийлүүлэхээр гэрээ байгуулсан шатдаг хийгээ бүрэн өгөх болно. Манай улс шатдаг хийг геополитикийн шинэ зэвсэг болгож ашиглахгүй. Харин Европын нэмэлт эрчим хүч хэрэгтэй орнуудад тусламж үзүүлэхэд ашиглана” гэсэн байна.

2016 онд “Хойд урсгал II” хэмээн нэрлэгдсэн ОХУ-аас Герман хүртэл хий дамжуулах хоолойн барилгын ажил эхэлсэн. Гэвч анх төлөвлөсөн ёсоор бололгүй, ердөө хоёр жилийн дараа зогссон уг төсөлд ОХУ-ын Ерөнхийлөгч Владимир Путинийг оролцож, гацаанд оруулсан тухай маргаан үргэлжилж байгаа. Тэгвэл энэ талаар тэрбээр “Хойд урсгал II” төслийг намайг гацаасан гэж шүүмжилж байгаа нь үнэхээр утгагүй зүйл” хэмээн няцааж, тус төслийг “Цэвэр арилжааных байсан” гэж онцолжээ.

Түүнчлэн, аравдугаар сарын 31-нээс арваннэгдүгээр сарын 12-ны хооронд Шотланд Улсын Глазго хотод НҮБ-ын цаг уурын хэлэлцүүлэгт Владимир Путин биечлэн оролцож чадахгүй байж магадгүй гэнэ. ОХУ-ын Ерөнхийлөгч Владимир Путин Шотландад дэгдэж буй цар тахлын нөхцөл байдлаас шалтгаалж уг айлчлалд оролцохгүй байх гэнэ.

Харин БНХАУ болон Тайванийн дунд үүсээд байгаа нөхцөл байдлаар талаар Путин “БНХАУ үндэсний зорилгодоо хүрэхийн тулд хүч хэрэглэх шаардлагагүй” хэмээсэн юм. Тэрбээр байр сууриа илэрхийлэх үеэрээ БНХАУ-ыг үнэхээр найдвартай түнш, холбоотон гэж тодорхойлж, “Хятадад хүч хэрэглэх шаардлага байхгүй” гэв.

Газрын тосны талаар ОХУ-ын Ерөнхийлөгч Владимир Путин “Эрчим хүчний хэрэгцээ нэмэгдэхийн хэрээр газрын тосны үнэ 100 ам.долларт хүрч, түүнээс илүү гарах боломжтой” талаар үзэл бодлоо илэрхийлжээ.

Харин тус зөвлөгөөний хамгийн чухал үе буюу АНУ, ОХУ-ын дунд үүсэж байгаа зөрчилдөөний талаар “АНУ, ОХУ-ын дундах дипломат харилцаа аажмаар сайжрах болно гэж найдаж байна”  хэмээсэн юм.

Эх сурвалж: CNBC