АНУ-ын төлөөлөгч болон Талибаны Засгийн газрын төлөөлөгчид Катар Улсын нийслэл Доха хотод өнгөрсөн амралтын өдрүүдэд уулзалт зохион байгуулжээ. Уулзалтын талаар АНУ-ын Төрийн департаментын төлөөлөгч Нед Прайс “Талибан Афганистаны Засгийн эрхийг авснаас хойших анхны нүүр тулсан уулзалт илэн далангүй бөгөөд мэргэжлийн түвшинд болсон” хэмээн мэдэгдсэн байна.

          Уулзалтаар хоёр талын төлөөлөгчид Исламын Бүгд Найрамдах Афганистан Улсад амьдарч байгаа америкчууд болон афганистанчуудад хүмүүнлэгийн тусламж үзүүлэх, Афганистаны иргэдийн аюулгүй байдал, хүний эрх, эмэгтэйчүүдийн оролцоог чухалчлах талаар ярилцжээ. Харин Талибаны Засгийн газрыг төлөөлж, тус уулзалтад оролцсон сайд Амир Хан Муттаки “АНУ Афганистанд коронавирусийн эсрэг вакцин санал болгохоо мэдэгдсэн” гэсэн бөгөөд хоёр тал дахин “шинэ хуудас” нээж байгаа талаар батлан ярьсан байна. Гэвч тус уулзалтаас ямар шийдвэр гарч, тохиролцоонд хүрсэн талаар одоогийн байдлаар хоёр талын аль ч төлөөлөгч мэдэгдээгүй байгаа юм.

Эх сурвалж: Reuters