Япон Улсын Ерөнхий сайдаар ердөө ганц жилийн турш ажилласан Ёшихидэ Сүга албан тушаалаасаа чөлөөлөгдөх өргөдлөө өгсөн. Үүнтэй холбоотойгоор өнгөрсөн долоо хоногт Японы эрх баригч Либерал намын тэргүүлэх өрсөлдөөн болж, Фүмио Кишида тэргүүлсэн билээ. Тэгвэл өнөөдрөөс Фүмио Кишида албан ёсоор Япон Улсын Ерөнхий сайдын албан үүрэгт ажлаа хийж эхэлсэн байна.

-ФҮМИО КИШИДА ГЭЖ ХЭН БЭ-

          Өдгөө 64 настай Япон Улсын шинэ Ерөнхий сайд Кишида хэмээх Японы томоохон улстөрийн гэр бүлээс гаралтай. Фүмио Кишидагийн аав болон өвөө нь Японы Засгийн газрын гишүүнээр ажиллаж байсан аж. Тэрбээр 2012-2017 онд Япон Улсын Засгийн газрын Гадаад хэргийн сайдаар ажиллаж, тус улсын түүхэн дэх хамгийн удаан Гадаад хэргийн сайдын албан тушаалыг хашсан байна.

          Япон Улсын шинэ Ерөнхий сайд Фүмио Кишида цөмийн зэвсэгтэй холбоотой асуудалд ямагт сөрөг байр суурьтай байдаг. Тэрбээр цөмийн бөмбөгт өртсөн Японы Хирошима хотод төрж өссөн бөгөөд 2016 онд цөмийн бөмбөгийн эсрэг АНУ-ын Ерөнхийлөгч асан Барак Обамагийн айлчлалыг Хирошима хотод зохион байгуулсан байна.