Исламын Бүгд Найрамдах Афганистан Улсын нийслэл Кабул хотын Хамид Карзай олон улсын нисэх буудалд өчигдөр буюу наймдугаар сарын 27-нд хоёр дэлбэрэлт болсны улмаас АНУ-ын тэнгисийн цэргийн алба хаагчид зэрэг 90 хүн амиа алдаж, 150 гаруй хүн шархадсан. Тэгвэл уг халдлагыг Афганистан дахь Исламын улс бүлэглэл үйлдсэн талаар Талибан хөдөлгөөний төлөөлөгч Забихулла Мужахид мэдээлээд байгаа юм.

          Тэгвэл АНУ-ын эрх баригчид ч Кабул хотын нисэх онгоцны буудалд болсон дэлбэрэлтэд Исламын улс бүлэглэл буруутай гэж үзсэн байна. Үүнтэй холбоотойгоор АНУ-ын Ерөнхийлөгч Жо Байден “Шанг нь хүртээх болно” гэж мэдэгдэж, Исламын улс бүлэглэлийн объект болон толгойлогчдынх байгаа газрыг илрүүлж, цохилт өгөхөд бэлтгэх үүргийг холбогдох албаныханд өгчээ. Хамид Карзай олон улсын нисэх буудалд болсон дэлбэрэлтийг Исламын улс бүлэглэлийн жигүүрүүдийн нэг болох Вилаят Хорасан террорист бүлэглэл үйлдсэн болохыг эх сурвалжууд мэдээлсэн аж.