АНУ-ын Ерөнхийлөгч Жо Байдены засаг захиргаа 750 сая ам.долларын зэвсгийн худалдааг Тайваньтай хийхээр төлөвлөж байгаа талаараа Конгресст танилцуулжээ. Тодруулбал, АНУ-аас Тайваньд "M109A6" дунд тусгалын өөрөө явагч гаубицын 40 ширхэг  систем болон холбогдох тоног төхөөрөмжүүдийг нийлүүлэх гэнэ.

Өнгөрсөн 2020 оны аравдугаар сард АНУ-ын Ерөнхийлөгч асан Дональд Трампын засаг Тайваньд 1.8 тэрбум ам.долларын дэвшилтэт систем худалдаалахаар төлөвлөж байгаагаа Конгресст мэдэгдэж байсан. Мөн үүнээс өмнө хэдэн арван "F-16" сөнөөгч онгоц, "M1A2T" абрамс танк, онгоц устгах зориулалттай зөөврийн "Stinger" пуужин, "MK-48 Mod6" торпед зэрэг нийт 13 тэрбум ам.доллараар үнэлэгдэх томоохон зэвсгийн худалдааг баталж байжээ.

АНУ-аас Тайвань руу галт зэвсэгт нийлүүлэх уг худалдаа нь бүс нутгийн асуудалтай холбоотой Вашингтон, Бээжингийн харилцааг илүү зөрчлийн түвшинд хүргэж, хурцатгах магадлалтай байгаа юм.  

Эх сурвалж: CNN