Японы эрх баригч намын тэргүүнээр Суга Ёшихидэ сонгогдож, шинэ Ерөнхий сайд тодорлоо. Чамгүй урт хугацаанд засагласан Абэ Шинзогийн халааг авах тэрбээр улс төрд олон жил зүтгэсэн, тууштай, эрх баригч нам дотроо нэр хүндтэй нэгэн. Гэвч Ёшихидэ дэлхий дахинд дэгдсэн цар тахал, эдийн засгийн хүндрэл, олимпын наадам, гадаад харилцааны асуудлууд зэрэг амаргүй сорилтуудтай нүүр тулна гэж ажиглагчид үзэж байна. 

Итгэл алдарсан үе 

Өмнөх Ерөнхий сайд Абэ Шинзо эрүүл мэндийн шалтгаанаар ажлаа өгсөн агаад түүний нэр хүнд өмнө байгаагүйгээр унасан үетэй энэ нь давхацлаа. Өнгөрсөн сарын 23-нд “Kyodo”-гоос танилцуулсан судалгаанаас харвал Абэ Шинзогийн Засгийн газрын рейтинг 36 хувиар унасан байна. Хоёр дахь удаагаа засагласнаас хойш түүний нэр хүнд ийм дор унаж байсан удаагүй. “Yahoo News Japan”-аас явуулсанАбэгийн засаглалыг 10 оноогоор дүгнэх санал асуулгад 294 882 хүн оролцсоны 34.6 хувь нь  хамгийн доод буюу нэг гэсэн үнэлгээг өгсөн бөгөөд 17.4 хувь нь дээд буюу 10 гэсэн үнэлгээг өгсөн байна. 
Мөн NHK телевизийн тоймчдын онцолж буйгаар урт удаан хугацаанд засагласан Абэ Шинзогийн Засгийн газрын үед эдийн засаг зогсонги байдалд орж, татвар нэмэгдсэн нь иргэдэд хүнд туссан гэнэ. Нөгөө талаар АНУ-ын Ерөнхийлөгч Д.Трамптай хэт нөхөрсөг харилцаа тогтоосон, Оростой хийсэн удаа дараагийн хэлэлцээр амжилтгүй болсон зэрэг шалтгаанаар эрх баригч намын нэр хүнд ч доошилсон  гэж тэд онцолж байна. 

Олон улсын харилцаа 

Ерөнхий сайдын албыг хаших Суга Ёшихидэгийн сул тал нь гадаад харилцаа, бодлогын талд туршлагагүй, олон улсын удирдагчидтай Абэ шиг нээлттэй, ил тод харилцаж чадахгүй байж магадгүй гэсэн болгоомжлол юм. Тэр тусмаа Абэ Шинзогийн үед  газар нутгийн маргаантай асуудлыг шийдэхэд ахиц гараагүй, БНСУ-тай харилцаа нь эрс хүйтэрсэн. Үүнтэй зэрэгцээдАНУ болон Хятадын худалдааны дайн болон эдийн засгийн асуудалд Токио “холбох гүүр” болж чадаагүйгээр үл барам хөндлөнгийн ажиглагчийн байр сууринаас хандсан зэрэг гадаад харилцааны ноцтой алдаа, асуудал гарч, тэр нь Суга Ёшихидэгийн үед даамжирч магадгүй. 

Мухардалд орсон “Абэномик”

Японы “Асахи” сонин “Ерөнхий сайд Абэ мухардалд орсон “Абэномик”-ийг замын дундаас хаяж байна” гэсэн нийтлэл гаргасан. Түүний засаглаж эхэлсэн эхний жилүүдэд хамгийн их найдвар төрүүлж, ажиглагчдаас өөдрөг таамаглал сонсожбайсан эдийн засгийн стратеги өдгөө мухардалд орж байна гэж уг нийтлэлд онцолж байв. Дефляцын түвшин хэвээр, цалингийн хэмжээ өсөөгүй, баян хоосны ялгаа улам нэмэгдсэн гэхчилэн эдийн засагч, нийгэм судлаачдын сэтгэлийг түгшээсээр буй асуудлууд дээр одоо коронавирусийн халдвар, цар тахлаас улбаатай эдийн засгийн хүндрэл нэрмэж магадгүй нь. Цар тахлаас өмнө, 2019 онд Японы ДНБ-ий бодит өсөлт шинжээчдийн таамаглаж байснаас бага буюу дөнгөж нэг хувьтай байсан. Энэ онд дээрх үзүүлэлт өснө гэх найдвар бага. Ажил эрхлэгчдийн цалин хөлс нэмэгдэхгүй буйгаас худалдан авах чадвар суларч, энэ нь эргээд бизнес, үйлчилгээний салбарт сөргөөр нөлөөлөх төлөвтэй. 

“Хувийн” улс төр 

Абэгийн гаргасан хамгийн том алдаа нь улс төрийг хувьчлах гэсэн хандлага гэж сөрөг хүчнийхэн шүүмжилдэг. Сайд нарыг томилох, чухал албан тушаалтай холбоотой шийдвэрүүд дээр үүнийг ажиглаж болно. Улс төрийн нөлөөгөө бэхжүүлэхдээ “Сакура таашаагчдын нийгэмлэг” гэх мэт хачирхалтай, ойлгомжгүй байгууллага, нэгдэл байгуулдаг нь эрх баригч намыхны ч  гайхашралыг төрүүлдэг гэх. Парламентад сөрөг хүчний төлөөллийн тавьж буй асуулт, дэвшүүлсэн асуудлыг үл хайхардаг нь ч шүүмжлэлийн бай болдог байлаа. Энэ мэт улс төрийн ойлгомжгүй тактик, хувийн чанартай тоглолт нь ганц Абэ Шинзогийн ч бус, эрх баригч намын нэр хүндэд сөргөөр нөлөөлсөөр ирсэн. 
Ерөнхий сайдаар ажиллахдаа залуу үеийнхэнд эх оронч сэтгэлгээг төлөвшүүлсэн боловсролын тухай хууль баталж, Америктай хүйтэрсэн байсан харилцаагаа сэргээн, улсын аюулгүй байдлыг хамгаалах олон чухал шийдвэрийг гаргасан Абэгийн халааг юутай ч Суга Ёшихидэ авлаа. Өмнөх Ерөнхий сайдын үед шийдэгдээгүй олон асуудлыг тэрбээр хэрхэхийг харах үлдлээ.