Мазаалайн нутгаас сонгогдож, төрийн түшээ болсон гишүүн нь мазаалайг хүн, амьтны хөлөөс дайжиж, эзгүй хээр говийн гүнд амьдардаг гэдгийг мэдэхгүй болохоор яалтай ч билээ дээ. Хэлэх ч үг олдохгүй байна.

УИХ-ын гишүүн О.Амгаланбаатарын нүд “сохорчээ”, үнэндээ. Мөнгө улаан, нүд цагаан гэгч л болж байх шиг байна. Сүүлийн хэдэн жилийн хугацаанд Нарансэвстэйн боомтыг сэргээхээр улайрч, УИХ-ын гишүүний сэнтийд заларсан даруйдаа хуульд тусгуулж орхилоо. Гишүүн болсноосоо хойш Нарансэвстэйн боомтыг сэргээж, Мазаалайг устгах ажиллагаа нь эрчимжүүлэв. Тэр санасандаа хүрэх нь. Харин хэдэн мазаалайн амь хутганы ир, зэрлэг ан, амьтны сүүлчийн өлгий нутаг сүйрэх замдаа орж байна.

       О.Амгаланбаатар гишүүн Говь-Алтай аймгийн иргэдтэй уулзалт хийх үедээ “Та нар дунд мазаалай харсан хүн байна уу. Нарансэвстэйн боомтыг нээж, автозам тавьснаар хавтай, мазаалай сүйд болно гэж эрдэмтэд ярьж байгаа юм. Яах вэ дээ, мазаалайгаар тэжээлгэж, гадаад, дотоодоос санхүүжилт авдаг хэдэн эрдэмтэн байдаг юм шиг байна. Яг үнэндээ мазаалайгаа өөрсдөө ч хараагүй. Би Цогт сумын иргэдээс асуусан. Мазаалай харсан хүн байхгүй байна лээ. Энэ дотор сууж байгаа хүмүүсээс хэд нь мазаалай харсан бэ. Гараа өргөцгөө дөө. Ганцхан хүн л байх шиг байна. Энэ хүн чинь Цогт сумын Баянтоорой багийн захирагчаар насаараа ажиллаж байгаа юм чинь аргагүй байх. Харин Цогт сумын Засаг даргаар хоёр, гурван удаа улирч ажиллаад, одоо аймгийн ИТХ-ын дарга Л.Насанбуянгаас асуухад “Насаараа би Засаг даргаар ажилласан. Нэг ч мазаалай хараагүй” гэж байна лээ. Хэдэн жилийн өмнө тоо толгой нь 2000 гарч байсан хавтгай өнөөдөр 600 толгой болоод байна. Дархан цаазат газрыг хамгаалаад байгаа юм бол яагаад хавтгай, ан амьтны тоо буураад байгаа юм бэ” гэж ярьсан нь иргэдийн эгдүүцлийг хүргэв.  

Л.НАСАНБУЯН: БИ НЭГ Ч МАЗААЛАЙ ХАРЖ БАЙГААГҮЙ, НАРАНСЭВСТЭЙН БООМТЫГ СЭРГЭЭХИЙГ ДЭМЖИЖ БАЙНА

Харин энэ талаар бид Цогт сумын Засаг даргаар ажиллаж байсан Л.Насанбуянтай холбогдож, тодрууллаа.

     Тэрбээр “Мазаалай харсан уу” гэж асуулаа. Би мазаалай нэг ч удаа харж байгаагүй. Үзээгүй, хараагүй юм чинь худлаа ярилтай нь биш дээ. Харин зурагт, сонин, камераас харсан уу гэвэл харсан. Тэрийг би ч, чи ч харсан байлгүй дээ. Би Цогт сумын Засаг даргаар найман жил ажилласан.. Харин одоо аймгийн ИТХ-ын даргаар сонгогдоод байна. Би Нарансэвстэйн боомтыг сэргээн нээхийг дэмжиж байгаа” гэлээ.

О.Амгаланбаатар гишүүний гар, хөл Говь-Алтай аймагт ажиллаж, харин тэр өөрөө Улаанбаатар, урд хөршийн дунд ажиллаж байгаа бололтой.

Монголын эдийн засаг Алтайн нуруунд санаархаж, алтанд шунасан улстөрчдийн “захиалга”-аар зэрлэг ан, амьтдыг аюулд оруулахаар улайрч байгаа тод илрэл нь энэ. Говийн их Дархан цаазат газрын А хэсгийн урд хилээр автозам байгуулж, Нарансэвстэйн боомтыг сэргээх ажил ид өрнөж байна. Хамтарсан Засгийн газрын балаг эхнээсээ ил болж байгаа нь энэ. 32 жилийн өмнө нээгдээд, хаагдсан Нарансэвстэйн боомтыг сэргээх нь хавтгай, мазаалай тэргүүтэй амьтдыг “чихмэл” болгохтой адил хэрэг л дээ, үнэндээ. Энийг улстөрчид ойлгохгүй, орон нутгийн удирдлагууд хөхүүлэн дэмжиж байгаа нь тун ч харамсалтай.