...Амьжиргааны баталгаажих түвшнээс доогуур орлоготой иргэдийн хөдөлмөр эрхлэлтийг нэмэгдүүлж, ядуурлыг хоёр дахин бууруулна. Эдийн засгаа хямралаас гаргаж, татварын дарамтыг багасгана. Зээлийн хүүг бууруулж, нийгмийн даатгалын  шимтгэлийг бууруулна. Улсын төсвийн орлогыг дотоодын нийт бүтээгдэхүүний 25 хувь болгож бууруулна. Инфляцыг бууруулж, төгрөгийн ханшийг тогтворжуулна...” гээд хар дээр цагаанаар дурайтал бичсэн олон биелэгдээгүй хөтөлбөрийг эрх баригч намынхан мөн ч олон жил ярьж байна даа. Энэ мэт биелэгдээгүй амлалтууд олон бий, Ардын намынханд.

    Сүүлдээ бүр дараа дараачийн Засгийн газартаа шилжүүлж, түүнийгээ үе дамжуулж ярьдаг бэлэг тэмдэг болгоод удлаа. Өнгөрсөн хугацаанд бодит байдал дээрээ нийгэмд дундаж орлоготой иргэд бүсээ чангалж, мөнөөх нь тасраад, тэр чинээгээрээ ядуурлын төвшин нэмэгдэж, ажилгүйдэл гаарлаа. Цаашлаад аж ахуйн нэгжүүд татварын дарамтад дарлуулж, хаалга барьж байгаа нь ч олон байна.

        Үе дамжсан Засгийн газрын биелэгддэггүй амлалтыг Ерөнхий сайд Г.Занданшатар амалж аваад удаагүй байна. Танхимаа бүрдүүлж, халаа сэлгээ хийхтэй зэрэгцээд төсвөө тодотгох хүндхэн даалгавартай нүүр тулж байна. “Эрчим хүчээ экспорлодог болно” гэж олон жил амалж байсан эрх баригчид өнөөдөр бодит байдал дээрээ эрчим хүчний хүндрэлтэй нүүр тулж, цахилгаан станцууд нь амь тариа нэхээд, тамир нь тасраад, дэлбэрчихсэн бодит үнэнтэй нүүр тулж байна даа.

       Яг л ийм л байдлаар хоосон амлалтуудыг өгсөөр нийгэмд болж буй  мэтээр ярьж, төсөөлж, мөрөөдсөөр амь тариа залгуулж суугаа хоосон амлалтууд ээлж дараалан элгээрээ хэвтэхийн хамгийн том сануулга боллоо. Утаа, түгжрэлээс ангижрах тухай ойрын хэдэн жилдээ мөрөөдөлтэй болсныг нийгэмд өрнөж байгаа олон асуудал бэлхнээ илтгэж байна. Цаашлаад Г.Занданшатарын танхимын сайд нараас хүлээх хүлээлт тун бага байна. Тэр тусмаа Сангийн сайдаар Б.Жавхлан улирч, эдийн засаг элгээрээ хэвтэж байгааг тоон мэдээллүүд хангалттай тод харуулна. Төгрөгийн ханш суларч, гадаад валютын ханш тэнгэрт тулсан. Шатахууны үнэ нэмэгдсэн гээд МАН-ын амлалтууд орвонгоороо эргэсэн энэ цаг үед Г.Занданшатарын танхимынхан халаа сэлгээ, сандал суудлынхаа ажлын эхлэлийг тавьж байна.    Засаг шилгээж, шинэ танхим бүрдээд ердөө долоо ч хонохгүй төсвийн тодотгол оруулж ирлээ. Төсвөө жилд хоёр удаа тодотгодог, тогтворгүй эдийн засагтай улс дэлхийн хаана ч байхгүй гэдгийг захын эдийн засаг энгийн гаргалгаагаар тайлбарлаад өгөхөөр байна.

     Биелдэггүй амлалт, хийдэггүй ажлынхаа төлөө хариуцлага хүлээдэг байсан бол өнөөдөр Ардын намынхан, халаасны намуудтайгаа аль хэзээний улс төрийн давцангаас арчигдах байлаа. Харамсалтай нь, ард түмэн ачааг нь үүрч, ардын намынхан ашиг хүртдэг гаж тогтолцооноос болоод эрх мэдлийн бялуу хуваалт хэрээс хэтэрч, эдийн засаг элгээрээ хэвтэж байна.

    Монгол Улс зэсээ баяжуулж, нүүрсээ угааж, алтаа цэвэршүүлж, газрын тосоо боловсруулж, дотоодын хүнсээ хангаж, түүхий эд нийлүүлэгч улсаас аж үйлдвэржсэн улс болох Аж үйлдвэржилтийн сэргэлт бол эдийн засгийн тусгаар тогтнол, бие даасан байдлын суурь баталгаа болно. Шинэ сэргэлтийн бодлогын хүрээнд нэмүү өртөг шингэсэн уул уурхай, хөдөө аж ахуйн эцсийн бүтээгдэхүүн боловсруулах үйлдвэрүүдийг үе шаттайгаар байгуулна. Ган болон зэсийн баяжмал боловсруулах үйлдвэртэй болно. Эрдэнэтийн зэсийн баяжмал боловсруулах үйлдвэр, Тавантолгойн нүүрс баяжуулах үйлдвэр болон Дархан-Сэлэнгийн бүсэд гангийн үйлдвэрүүд барьж, ашиглалтад оруулна. Дарханы арьс шир боловсруулах үйлдвэр болон татан авах дэд төвүүдийг байгуулах ажлыг зохион байгуулна. Газрын тос боловсруулах үйлдвэрээ цаг алдалгүй ашиглалтад оруулж, бензин шатахуунаа дотооддоо үйлдвэрлэдэг болно гэх хоосон амлалтууд өнөөдрийг хүртэл биелэлээ олоогүй, хүлээгдсээр байна.

     Шинээр томилогдсон Ерөнхий сайд Г.Занданшатар “Нүүрсний экспорт зогсонги байдалд орж, төсвийн орлого тасалдаж, гадаад валютын нөөц, монгол төгрөгийн ханшид сөрөг дарамт учирч, инфляц нэмэгдэж байна. Урьдчилсан тооцооллоор жилийн эцэст төлбөрийн тэнцлийн алдагдал нэг тэрбум ам.долларт хүрч магадгүй боллоо. Мөн эрчим хүчний системийн найдвартай, тасралтгүй үйл ажиллагаанд гэнэтийн эрсдэл үүслээ.Тиймээс эдийн засгаа тогтворжуулж, иргэдийнхээ орлого, амьжиргааг тамиржуулах, эрчим хүчний гэнэтийн доголдол зэрэг тулгамдсан асуудлуудыг нэн яаралтай шийдвэрлэх шаардлага үүслээ.Үүний тулд Засгийн газар Үндэсний аюулгүй байдал, монгол хүний эрх ашигт заналхийлж, итгэлийг нь үгүй хийж, мөрөөдлийг нь сүүдэртүүлж байгаа асуудлуудыг эрэмбэ, шат дараатай шийдвэрлэхийг эрхэм зорилгоо болгоно. Улсын эдийн засаг хүнд байгааг шулуухан хэлье. Зардлаа багасгаж, орлогоо хэмнэхээс өөр сонголт бидэнд алга” хэмээн чуулганы индэр дээрээс хэлсэн нь эрх баригчдын олон жилийн хоосон хөрсөн дээрээ хэрхэн буусныг харуулж буйн тод жишээ.

      Эцэст нь, хэрэгжүүлдэггүй төлөвлөгөөгөө хэдэн зуун удаа  амлаад ард түмнийг хуурсаар цонхны цаанаас чихэр долоолгосоор байгаа энэ тогтолцоонд цэг тавих, буух эзэн буцах хаягтай үлдээдэг баймаар байна, үнэндээ.