ЗАСАГ УНАХААС ӨМНӨ ЗАНГАА ТАНИУЛАГСАД

Б. Бадралмаа:
Улс төр- Тэрслүү үг

2025-05-26, 1352

Уул үзэлгүй хормой шууж, ус үзэлгүй гутал тайлагсад Төрийн ордныг “түймэрдэж” мэдэх нь ээ, үнэндээ. Улс төр тогтворгүй энэ цаг үед хамгийн тогтвортой, олон ургалч үзэл санаатай, улс төрийн мэдрэмжтэй байх ёстой УИХ-ын гишүүд нь юуны түрүүнд хөл алдаж, гүйгээд Засгийн газрыг унахаас өмнө төрийн хэргийг самарч орхих дөхөөд байна.

Улс төрд зурчихсан зураг, тохирсон яриа бий гэдгийг төрд түшээдээр сууж байгаа гишүүд хэн хүнээс илүү мэддэг баймаар. Харамсалтай нь, тэд улс төрийн наад захын соёл, төлөвшил гэгч байсангүй. Юу ч болоогүй байхад гомдож гүйх нь гүйгээд сошиалд “солиорч”, ард түмнээс илүү улс төрийн төлөвшилгүй, тогтворгүй улстөрч олон байгаа нь ажиглагдлаа, өнгөрсөн хугацаанд.

Нэг ёсондоо Ерөнхий сайд Л.Оюун-Эрдэнийг огцруулах эсэхийг МАН-ын Бага хурлаар ч шийддэг юм биш. Парламентад шийдэх бүрэн эрх нь бий. Цаашлаад хамтарсан Засгийн газар гэрээгээ дуусгах эсэх нь хараахан шийдэгдээгүй байна. муу эр дайнд хөөрнө гэгчээр Засаг унахаас өмнө зангаа таниулсан улстөрчид учраа олохгүй гүйлдэж байх.

Тухайлбал, хамтарсан Засгийн газарт багтсан ХҮН намын дарга, Шадар сайд Т.Доржханд “ХҮН хамтрал дээрээ зогсоно. Гэрээнд нэг нам дангаар шийдвэр гаргаад гарах тухай асуудал байхгүй. АН, ХҮН-ын нэг гишүүн очиж гарын үсэг зуржээ. ХҮН гишүүндээ хариуцлага тооцно. Ардчиллын зарчмаас ухарсан Ж.Золжаргал гишүүнд хариуцлага тооцно. Намын дүрмийн хүрээнд хариуцлагаа тооцоод явна аа. ХҮН, АН-ын дөрвөн гишүүн тэнд гарын үсэг зурлаа гээд энэ бол шалтаг шүү. Манай нам 17.30 цагт хуралдана. Үр дүнгээ хараад гэрээнд зурсан гурван албан тушаалтан гэрээгээ дүгнэнэ ээ. Засгийн газар тарах үндэслэл байхгүй, тийм асуудал ч яригдсангүй. Хадган дээр тавьсан урилгаа буцаавал ХҮН сөрөг хүчин шиг сөрөг хүчин байж чадна. Та нар улсынхаа эрх ашгийн төлөө явж чадахгүй бол дараагийн үе чинь гарч ирнэ шүү. 2028 оны сонгуульд ялна уу, ялагдана уу хамаагүй. Үүнээс хойш Засгийн газар дандаа хамтарч явна. Дангаар явах ямар ч боломжгүй. 60-аас дээш суудал авах улс төрийн хүчин дахиж гарахгүй. АН хамтрах соёлоо ойлго. Унш, судла. Намайг яаж ч шүүмжилж болно. Гэхдээ бид үзэл бодолдоо хатуу байна. Дэлхийгээс тусдаа Монгол Улс гэж байхгүй” хэмээн мэдэгдсэн. Нэг ёсондоо ХҮН намын дарга Т.Доржханд хамтарсан Засгийн газарт багтаж үлдэхийн тулд Засгийн газрын бодлогыг шүүмжилсэн намынхаа гишүүнд хариуцлага тооцоод ч болов тогтож үлдэх саналтай байгаагаа ийн бачуурч илэрхийлсэн гэж харж болохоор байна.

Түүнтэй зэрэгцэж, зангаа таниулсан гишүүдийн нэг нь УИХ дахь АН-ын бүлгийн дарга О.Цогтгэрэл. Хамтарсан Засгийн газраас Ардчилсан намыг гаргах асуудал дөнгөж сөхөгдөж эхэлмэгц л түүний хөлд хий орсон аятай, хэвлэл болгонд яриа өгч, “Намын даргаа суудлаа хүлээлгэж өгнө гэсэн” хэмээн ярих нь нэмэгдэх болсон. Нэг ёсондоо “Зуд болоход нохой зоолно” гэгчээр хамтарсан Засгийн газраас Ардчилсан намыг гаргах шалтаг хайж байхад О.Цогтгэрэл бүхэл бүтэн УИХ дахь намын бүлгийг тэргүүлж байгаа дарга хэрнээ намын дарга нь сандал суудлаа хүлээлгэж өгөхийг онцлоод хэвлэлд яриад зогсож байлаа.

Уг нь Ардчилсан нам хамтарсан засгийн газрын гэрээний ямар заалтыг яаж зөрчсөн бэ гэдгийг хамгаалж, хариу мэдэгдэл хийх үүрэг хүлээсэн Бүлгийн дарга байтал харин ч намын даргын суудал нь суларч байгааг онцолж зогссоноор ямар улстөрч юм бэ гэдгээ таниулсан гэж болно.

Тэгвэл МАН-ынхнаас УИХ-ын гишүүн А.Ариузаяагийн улстөржилт хэрээс хэтэрсэн гэж болно. Угтаа бол өнгөрсөн хэд хоногт А.Ариунзаяа гишүүн МАН-ын хэвлэлийн алба, эсвэл Ерөнхий сайдын ажлынх албаныхнаас ч илүү Ерөнхий сайдын талаарх мэдээллийг хэвлэлийнхэнд өгч, “Бүрэн эрхт төлөөлөгч”-өөс нь дутахааргүй байсан гэхэд болно. Тухайлбал, А.Ариунзаяа Ерөнхий сайдын хүү О.Тэмүүлэнг хэдэн цагт онгоцноос бууж, хэдэн цаг АТГ-т мэдүүлэн өгсөн бүрэн мэдээллийг тэр хэвлэлийн төлөөлөгч нараас нь түрүүлж мэдээлсэн. Тэрбээр хэвлэлд өгсөн мэдээллийнхээ үеэр “Ерөнхий сайдын хүү өглөө ирмэгцээ АТГ-т мэдүүлэг өгч, дөрвөн цаг байцаагдсан гэх мэдээлэл авлаа” хэмээн ярьсан байдаг.

Мөн тэрбээр “Ерөнхий сайдын хүү койноор ч мөнгөтэй болсон байж болно” гэх агуулгатай мэдээлэл хийж байсан түүхтэй. Тодруулбал, “Энэ асуудлын тухайд гэвэл Ерөнхий сайдын 20 нас хүрсэн хүүгийн найз охиндоо бэлэг сэлт өгсөн асуудал яригдаж байгаа юм байна лээ. Тэр үүднээсээ хэзээ тийм асуудал болсон юм, яг тийм бэлэг өгсөн юмуу, ямар орлогоос тэр хүү өгсөн юм гэдэг асуудал яригдах ёстой байх. Миний бодлоор тухайн насанд хүрсэн хүү энэ бэлгийг өгөхдөө аав ээж, ах дүү хамаатан садан, эсвэл койноос олсон орлогоороо ч өгсөн байж магадгүй. Юу ч байж болно” хэмээн хэвлэлд хэнэгч гүй ярьж зогссон нь А.Ариунзаяа гишүүн байлаа.

Засаг огцрохоос өмнө зангаа таниулсан гишүүдийн нэг нь Боловсролын сайд П.Наранбаяр байлаа. Тэрбээр өнгөрсөн амралтын өдрүүдэд цахим хаягтаа “Ойр ажилласны хувьд хэлье. Ерөнхий сайд Л.Оюун-Эрдэнэ Боловсролын сайдаар ажиллаж байгаа надад нэг ч хүн шахаагүй. Зөв жишиг” хэмээн мэдэгдсэн нь олныг гайхшируулаад байна. Угтаа бол түүний ил мэдэгдлээс Ерөнхий сайдад тал зассан нь илт мэдрэгдэж байгаад олон нийт дургүйцлээ илэрхийлсээр байна.

АН-ын гишүүдээс арай л эрт ард түмнийг сэтгэлийг үймүүлэх гэж улайрч яваа нь УИХ-ын гишүүн Ч.Лодойсамбуу байлаа. Улстөрчийн хувьд эрүүлээр шүүмжилж, мэтгэлцэж, санал гаргаж болох ч, дэндүү улайрч тэр байтугай иргэдийн дунд төр түшилцэх хариуцлагатай үүрэг хүлээсэн хүн хэдий ч “Засгаа авч үлдэхийн тулд хоёр триллион төгрөг гишүүдэд тарааж байна” гэх мэдээлэл хүртэл хийж харагдсан. Хоёр триллион төгрөг нь хоёр их наяд буюу багагүй их мөнгө. Гэтэл төр түшилцэж, тангараг өргөсөн гишүүн нь хэвлэлийнхний өмнө ийм баталгаагүй мэдээлэл хийж байгаа нь дэндүү хариуцлагагүй байлаа.

Ийн Засгийн газрыг огцорохоос өмнө зангаа хувиргасан, эсвэл илт тал зассан гишүүд олон байна. Уг тэд ард түмнийхээ өмнө хамгийн хариуцлагатай, хүний эрхийн мэдрэмжтэй байх хариуцлага хүлээсэн, тангараг өргөсөн хүмүүс баймаар. Харамсалтай нь, энэ мэтээр улс төрд буурь суугаагүй, урваж, шарвасан гишүүд олон байгааг дээрх хэдхэн жишээгээр төлөөлүүллээ.

ЗАСАГ УНАХААС ӨМНӨ ЗАНГАА ТАНИУЛАГСАД

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.