Төрийн түшээд, УИХ-ын гишүүд Эзэн Чингис хааны хөшөөндөө цэцэг өргөж, төрийн далбаанд хүндэтгэл үзүүлэхдээ тод ягаан, гүн ногоон, цайвар бор гээд өнгө өнгийн хувцас өмсөж, ёслож байхыг үзлээ.

        Эрх чөлөөт нийгэмд хэн ямар хувцас өмсөж, хэрхэх нь огт хамаагүй ч ёс ёмбогор, төр төмбөгөр байх нь зүйтэй. Тэр байтугай Чингисийн хөшөөн дээр очиж, Төрийн далбаанаас адис авах эрх эгэл жирийн ард түмэнд тэр бүр олдоод байдаггүй юм шүү дээ. Ойрхон очиж зургаа авахуулах эрх ч олддоггүй юм.     Тиймээс ард түмнийг төлөөлж, төрийн том үйл хэрэгт оролцож байгаа УИХ-ын эрхэм гишүүд загвар, брэнд хөөхөөс илүү төр ёсоо хүндэлж, ёс зүйтэй хувцаслах нь иргэн, төрөө хүндэлж байгаа том шалтгаан болж буйг энэд сануулах гэсэн юм.

"LV" ОРООЛТ, “UNITED COLORS OF BENET­TON”

        Санаж байгаа бол УИХ-ын гишүүдийн өмссөн хувцас, зүүсэн цаг нь хүртэл олны дунд дуулиан дагуулдаг. УИХ-ын гишүүн асан М.Оюунчимэг Төв талбайн жагсаалд оролцохдоо  LV брэндийн үнэтэй ороолтоор гангарч, түүнийгээ “Бэлгэнд авсан” гэж олны шүүмжлэлийг дагуулж байсан.

        2016 оны парламентад сонгогдсон эмэгтэй гишүүд Өмнөд Солонгост ажлын айлчлал хийх үеэр албан ёсны арга хэмжээнд "нүд эрээлжилсэн" зохимжгүй хувцас өмссөн гэсэн шүүмжлэлд өртөж, олны анхаарлын төвд орсон. Хэтэрхий олон янзын, тод өнгөтэй хувцсаар “гангарч”, нийгмийн сүлжээнийхнээс “United colors of Benet­ton” гэдэг хоч хүртэл авч байсан юм.

ПҮҮЗТЭЙ “ПИ-АР”

        УИХ-ын гишүүн, Шадар сайд Т.Доржханд гишүүнээр дөнгөж сонгогдоод тангараг өргөхөөр ирэхдээ Төрийн ордонд пүүзтэй ирж, түүнийгээ цахим орчинд “Тэр өмсдөг гуталтайгаа л ордон руу явж орчихлоо. Сонгуулийн нээлтийн өдөр Доржханд ганган байсаан. Зангиа, ганган ботинктой байсан. Үзэл, зорилго, мөрөөдөл нэгт андуудаа зоригжуулан гараанаас үдэж өгөхдөө тэр нэг удаа гангарсан юм. Нөхөд нь зангиагаа тэгшилж, дан дээлээрээ цэмцийгээд гарцгаасан. Маргаашнаас нь бүгд л пүүз кетэндээ орцгоосон.

         Харин одоо Доржханд ганцаараа ордонд байна. Дарга гэдэг үгтэй хоршиж дасал болсон зангиа, костюм, давхар эрүү, булбарай арьс түүнд алга. Бас дарга гэдэг үгтэй хоршиж дасал болсон авилга, хулгай, албан тушаалын хэрэг гэсэн чимэгүүд түүнд байхгүй.  Дарга нар ганган ботинктойгоо биднээс алсарсаар байна. Харин тэр пүүз ард бидний итгэлийн дөл болон сүүмэлзлээ. Ордон дотор энгийн нэг гудамжны пүүз алхаж явна. Ордон дотор гудамжин дахь олны итгэл, хүсэл алхаж байгаа нь тэр шүү” хэмээн бичиж, олны анхааралд орж байсан удаатай. Түүнийг өмссөн хувцасаараа Төрийн ордонд “пи-ар” хийсэн хэмээн олон нийт дургүйцлээ илэрхийлсэн нь бий.

ЕРӨНХИЙ САЙД БОЛОН ГИШҮҮДИЙН ЦАГ

       Түүний дараа Ерөнхий сайд Л.Оюун-Эрдэнэ ХБНГУ дахь хийх үеэрээ нь "Rolex" брэндийн 18 каратын цагаан алттай "Date Just" загварын цаг зүүж олны шүүмжлэл өртөж байлаа. Ерөнхий сайдын гартаа зүүсэн цаг Олон улсын жишиг үнэ нь 23,228 ам.доллар. Монгол төгрөгөөр ханшаар 78.2 сая төгрөг болж дуулиан дагуулсан билээ. УИХ-ын гишүүн асан Ж.Мөнхбатын цаг мөн Хилларигийн үнэтэй хүрэмтэй харьцуулагдаж,_олны анхаарал татаж байсан.

         Хамгийн сүүлд УИХ-ын эмэгтэй гишүүд Анхдугаар Үндсэн хуулиа батласаны 100 жилийн ой, Бүгд найрамдах улсаа тунхагласны өдрөөр УИХ-ын дарга, гишүүдийн хамт Их жанжин Д.Сүхбаатарын хөшөөнд цэцэг өргөн хүндэтгэл үзүүлэх үеэр УИХ-ын эмэгтэй гишүүд өнгө өнгийн хувцас өмсөж, цахим орчинд шүүмжлэл дагуулж байлаа. Үүний хариуд УИХ-ын гишүүн М.Нарантуяа-Нара “Ер нь албан ажилд учиргүй шалдан нүцгэн гуя хас энгэр цээжээ учиргүй задгайлчихаагүй л бол ягаанаа өмсөнө үү ногооноо өмсөнө үү хүний эрхэнд бүү халдаж бай. Ягаан хувцастай хүнийг гахай гэж харж байгаа хүний тархи л эмгэгтэй юу гэхээс өмссөн нь хүн нь нохой гахай болчихгүй юм” хэмээн өөрийгөө өмөөрч байсан удаатай.

        Ерөөс энэ мэт жишээнээс харахад УИХ-ын гишүүдийг формжуулахад буруудах зүйл алга. Гишүүдийг өмссөн зүүснээр нь ялгаж байгаа хэрэг юм биш. Төрийн ордон, хүндэтгэлийн арга хэмжээ, төрийн том айлчлал, хурал цуглаан гэх ач холбогдолтой уулзалт, арга хэмжээнд УИХ-ын гишүүд албан ёсны хувцастай байснаар тэд ядаж л Монгол Улсыг төлөөлж, нүүр царай нь болж байгаа гэдгээ мэддэг, мэдэрдэг байх хэрэгтэй байна.

          Цаашлаад УИХ-ын гишүүдийн өмссөн зүүсэн, үс гэзэгний талаарх яриа улс төрийн чухал асуудлыг мартагнуулах, улс төрд өрнөж байгаа үйл явдлыг олны анхаарлаас холдуулах кампанит ажил болдог нь ч нууц биш. Гишүүдийн барьсан утас, өмссөн хувцас, зүүсэн цагаар нь ялгаж суухаас илүүтэй манайд шийдэх, шийдвэрлэх асуудал хангалттай олон бий. Гэтэл энэ мэт жижиг асуудлаар олны анхаарлыг өөр зүйлд хандуулж, улс төрийн амин чухал асуудлаа орхигдуулсаар ирсэн жишээ ч цөөнгүй бий.  Тиймээс УИХ-ын гишүүдийг Төрийн ордон, чуулганы хуралдаан, томоохон айлчлалын багт багтаахдаа албан ёсны дүрэмт хувцас өмсдөг байхаар журам гаргах нь ёс зүй, өнгө үзэмж талаасаа буруудахгүй юм гэдгийг дахин сануулах нь зүйн хэрэг биз.